Fua ‘e he CEO le’ole’o ‘Onetoto ‘Anisi ola ‘o e tu’utu’uni ‘a e Minisita Malolo ‘Akosita Lavulavu ^Featured

Na’e tu’utu’uni foki ‘e he Minisita Maloloo ‘Akosita Lavulavu ‘i he konga kimu’a ‘o e ta’u ni lolotonga ‘ene kei hoko koe Minisita ‘i he Potungaue Ki he Ngaahi Ngaue Fakalotofonua ki he’ene CEO le’ole’o ke fakangofua hono ngaue ‘aki ‘a e pa’anga ‘a e Potungaue ki hono totongi hono hoa ‘Etuate Lavulavu kena folau ‘i he folau ‘a e Minisita ki ‘Aositelelia ke ‘a’ahi ki he kau toli fo’i’akau.

Na’e ‘ikai foki ke tali ‘e he Kapineti ‘a e fokotu’u mei he Minisita Malolo ke totongi ‘e he Pule’anga hono hoa ke muimui folau ‘iate ia ‘i he folau ko’eni pe na’e iku ai ki hono tu’utu’uni ‘e he Minista ke fua ‘e he Potungaue mei he kuletiti ‘a e Potungaue na’e ‘i he taha ‘o e ngaahi kauataha vakapuna ‘a e totongi ‘o e tikite ‘a e hoa ‘o e Minisita Malolo.

Na’e fe’unga foki mo e pa’anga ‘e $7000-00 tupu ‘a e mahu’inga ‘o e tikite 'i he kalasi pisinisi ko’eni mo e ngaahi fakamole kehe ki he folau ni pea na’e iku ai ke tautea ‘e he PSC ‘a ‘Anisi kene totongi fakafoki ‘a e konga lahi ‘o e pa’anga ko’eni.

Fakatatau ki he fakamatala ‘a ‘Anisi ‘i hono faka’eke’eke ia ‘e he ongoongo ‘a e letio 87.5 ‘i he pongipongi ‘o e ‘aho ni na’e toe ‘oange mo e tu’utu’uni ia ‘a e PSC mo e tohi ‘o fakamahino ange ai ‘a e fakatokanga mamafa kiate ia (severe reprimanded) kapau tene toe fakahoko ha ngaue hala pea ‘e tuli leva ia mei he ngaue faka-Pule’anga.

Ko e fakatokanga koia fakatatau ki he fakamatala ‘a ‘Anisi kuopau ke tuku ia ‘i he’ene personal file (PF) pe ko’ene faile fakataautaha ki he pa’angangalu pea ‘oku ne ongo’i he kuo laka he ta’u ‘e uofulu ‘a ‘ene ngaue he Pule’anga pea koe iku’anga ‘eni ‘oku fakamamahi.

Na’e toe fakamahino ‘e ‘Anisi ‘oku toe ‘i ai ‘ene tangi ‘oku fakahoko ki he mafai ‘oku toe ma’olunga ange he ‘oku ne ongo’i ‘a e mafatukituki ‘o e tautea pea ‘e ala mole ai hono faingamalie ke lava ke tohi ki he lakanga CEO he ‘oku lolotonga tu’uaki he lolotonga ni.

‘I he fakamatala ‘a ‘Anisi ‘oku ne ongo’i he ko’ene fakahoko ‘a e tu’utu’uni ‘a e Minisita Malolo pea iku ‘one fua ‘a e hia kae ‘ikai tautea ‘a e Minisita ia.

Kaikehe koe fakatokanga mamafa foki ‘eni ki he kau CEO mo e kau ‘ofisa ma’olunga ‘a e Pule’anga ke fakapapau’i ma’u pe ‘enau fakahoko ‘a e tu’utu’uni ‘a e kau Minisita pea ke mahino ‘oku muimui foki ki he lao.