‘E fakamahino nai mei Siaina ‘a e ‘uhinga hono ‘omai ‘o e pa’anga ki he Tongasat? ^Featured

Na’e fakamahino pe foki ‘i he tu’utu’uni ‘a e Tu’i Fakamaau Lahi ‘oku ‘i ai ‘a e ngaahi fakatonutonu kehe ‘oku lolotonga fakahoko pea 'oku nau fekaukau'aki mo e hopo ko'eni pea  ‘e mahino lelei ange mei ai ha tu’utu’uni aofangatuku fekau’aki mo e kaveinga ni 'okapau ‘e malava  katoa hano fakakakato 'a e ngaahi fakatonutonu fakalao ko'eni.

‘Oku ‘ikai ke fehu’ia heni ‘a e tu’utu’uni ia ‘a e Fakamaau’anga he ‘oku aofangatuku pea ‘oku fakaofo’ofa pe ia ‘iate ia ka ‘i he taimi tatau ‘oku ‘ikai ke mahino ‘a e tu’unga ‘oku ‘i ai ‘a e Pule’anga pe ‘e tangi ki he Fakamaau’anga Tangi fekau’aki mo e tu’utu’uni ko’eni pe ‘ikai pea 'e toki mahino mei ai 'a e aofangatuku 'a e tu'utu'uni ko'eni 'oku fai hono talanga'i.

Ko e poini ia heni ‘oku totonu ke fai ha vakai kiai ‘a ia ‘oku mahu’inga ke tokoni mai heni ‘a e Pule’anga Siaina ke fakamahino ‘a e taumu’a mo e founga pehe ki he ‘uhinga hono totongi mai ko’eni ‘a e pa’anga 'e 50 miliona Tonga ko'eni he ko e Tongasat koe fakafofonga ia ‘o e Pule’anga Tonga ‘i he ngaahi alelea fekau’aki mo e satelaite.

‘Oku ‘i ai pe foki mo e totonu ‘a e Tongsat ki he pa’anga ko’eni ‘o fakatatau mo e aleapau ngaue ‘i he vaha’a ‘o e Pule’anga mo e Tongasat pehe ki he kautaha 'i Siaina na'a nau lisi 'a e tu'unga satelaite na'e makatu'unga mei ai 'a e totongi ko'eni he koe anga maheni pe '

'eni ‘a e fengaue’aki ‘a e ongo paati ko’eni mo e pa'anga 'e lau miliona kuo totongi 'e he Tongasat ki he Pule'anga ko'ene loyalty 'o fakatatau mo 'ena aleapau.

Kaikehe na’e fakamahino pe ia ‘i he tu’utu’uni ‘a e Fakamaau’anga ‘oku ‘ikai ha mafai ia ‘a e ongo talatalaaki ‘i he hopo na’a tau situ’a kiai kena ‘eke ha pa’anga ke fakafoki mei he Tongsat pea ko e konga ia ‘oku lahi hono talanoa’i pea kehekehe mo hono faka’uhinga ‘e he ni’ihi ke hohoa tatau mo ‘enau fiema’u.

‘Oku mahino foki ko e fale’i fakalao ke totongi ‘a e pa’anga ko’eni ki he Tongasat na’e fakahoko pe ia ‘e he ‘Ateni Seniale mo e va’a fakahinohino lao ‘a e Pule’anga he 'aho koia pea ko kinautolu pe foki na’a nau fakafofonga’i ‘a e Pule’anga ‘i he hopo ko’eni 'i he malumalu ia 'o e pule'anga 'oku Palemia ai 'a e Talatalaki he hopo ni 'Akilisi Pohiva..

Kaikehe ‘oku ‘i ai ‘a e fakamatala falala’anga ia ki he ‘uhinga mo e founga na'e fakafou mai ai ‘e he Pule’anga Siaina ‘a e pa’anga ko’eni ‘i he Pule’anga ke totongi ki he Tongasat pea ‘oku ‘i ai mo e faka'amu 'e tukuange mai ‘e he Pule’anga Siaina ‘a e fakamatala mahino ki heni ‘a ia ‘e tokoni ki hono solova ‘a e tala’a ‘oku ‘i he tokolahi fekau’aki mo e akatonutonu ko’eni.