Pa’anga tokoni Fale Alea ke ‘ave ki he kakai: 'Ikai koha me’a’ofa ‘a e Fakafofonga Featured
13 ‘Aokosi, 2018. ‘Oku lahi ‘a e laaulea he ngaahi ‘aho ni lolotonga ‘a e ‘a’ahi faka-Fale Alea ‘a e Fale Alea ‘o Tonga fekau’aki mo e pa’anga tokoni ‘oku foaki ‘e he Fale Alea ki he ngaahi vahenga fili.
‘Oku fe’unga mo e pa’anga ‘e uakilu ($200,000) ‘a e pa’anga kuo foaki ‘e he Fale Alea ke tokoni ki he vahenga fili takitaha.
Ko e pa’anga foki ko’eni koe pa’anga na’e fakapaasi ‘e he Fale Alea pea fakalao’i pea kuopau ke foaki ia ki he ngaahi vahenga pea ‘oku fakafou ‘i he Fakafofonga Fale Alea ‘o e vahenga fili takitaha.
‘Oku ‘i ai foki ‘a e hoha’a he ngaahi ‘aho ni ki he tu’unga hono vahevahe ‘o e pa’anga faka-vahenga fili pea mo e founga ‘oku vahevahe ‘aki pehe ki hono taumu’a.
Ko e poini mahu’inga ia heni ke mahino ki he kakai ‘o e fonua koe pa’anga ko’eni kuopau ke foaki kiate kinautolu ‘i he ngaahi founga kehekehe ka ‘oku ‘ikai koha pa’anga me’a’ofa ‘eni ia ‘a e Fakafofonga Fale Alea.
'Oku 'i ai 'a e totonu 'a e kakai 'o e vahenga fili kenau alea'i 'a e founga ke nague'aki 'a e pa'anga tokoni ko'eni 'a ia na'e tanaki mei he tukuhau 'a e kau totongi tukuhau 'o e fonua.
‘Oku toutou fakamahino pe foki ‘a e kaveinga ko’eni ‘e he Sea ‘o e Fale Alea ‘i he taumu’a ke fakamahino ‘a e makatu’unga hono toutou fehu’ia ‘a e kaveinga ni.
