Fiema'u ke fakafisi leva ‘a Fe’ao Vunipola mei he ‘Akapulu ^Featured

Nuku’alofa,

6 Siulai, 2018

‘Etita,

Kapau ‘oku ‘i ai ha me’a ‘oku tukungatamaki pea ‘oku totonu leva ke fakalelei’i.

‘Oku ou fai atu ‘a e tohi ni mo ‘eku kaunga poupou mo e kakai tokolahi he fonua pehe ki he kau mamahi’i ‘akapulu tokolahi ke kole kia Fe’ao Vunipola ‘a ia ‘oku CEO Le’ole’o ‘i he ‘Iunioni ‘Akapulu ‘a Tonga ke kataki aa ‘o fakafisi mei he fatongia.

Ko e founga ‘eni ‘e malava ke tau feinga ke toe fakakake ai ‘a e maa’imoa ‘i he fonua.

‘Oku fu’u mahino ‘a e fakafaha’i taha ‘a e tui faka-politikale ‘a e motu’a ni pea ‘oku ‘ikai kene toe lava ‘o fakapulipuli’i ‘o iku ke uesia ai ‘a maa’imoa ‘akapulu ‘a ia ‘oku totonu ke taua’ataina.

‘Oku ‘afungi pea sio lalo pea ‘oku ‘ikai pe kene malava ‘a e fatongia he kuo au ki he tu’unga kuo lea mai ai ‘a e fanau va’inga ‘a e ‘Ikale Tahi ‘a ia ‘oku nau va’inga fakavaha’a Pule’anga ‘o pu’aki mai ‘ene to nouno pea ‘ilo e mamani.

Kuo kau mo e faiako Toutai Kefu ‘a ia koe tangata ‘iloa mo ‘ilonga ‘i mamani he mala’e ‘akapulu pea koe faiaako ia ‘a e ‘Ikale Tahi hono talamai hangatonu ki he fonua mo e ngaahi kautaha ongoongo fakavaha’a Pule’anga ‘a e ta’efe’unga ‘a e motu’a ni.

Kuo tuku mai he ngaahi kautaha ongoongo ‘a e lahi ange hono taimi ‘i Pilitania pea koe ‘osi ‘eni ‘a e mahina ‘e 18 ‘oku te’eki ke fetaulaki ia moe Faiako ‘a e ‘Ikale Tahi pe ko ha’ane ‘asi ange pe aa ki he teuteu ‘a e timi ki he’enau ngaahi tau.

‘Etita ‘oku ou manatu ki he taimi na’e kei sea ai ‘a ‘Epeli Taione ‘i he Poate pehe ki he kei CEO 'a Fuka Kitekei'aho ‘a hono fakaanga’i ta’etuku kinaua ‘e Fe’ao Vuniupola pea ko’eni kuo heka ki he Sea ‘oku toe pango ange ia.

Na’e lea he ngaahi fakataha ‘oku ‘ikai koha palopalema ‘a e pa’anga ia ka ko’eni kuo mahino ki he motu’a ni ‘oku kehe ‘a e lea he hake mo e hifo.

Kuo totonu mo taau ke fakafisi a kae fetongi ‘eha taha ‘oku tau’ataina pea ‘ikai ke fakapalataha ‘ene ngaue.

Kuo mahino lelei ‘a e tukunga ‘ene ngaue pea 'oku lahi mo hono ngaahi fakamo'oni .

'Oku ‘i ai ‘a e matu’aki kole mo’oni ke fakafisi a kae teuteu lelei atu ‘etau ‘akapulu ki he tau’i e Ipu ‘a Mamani 2019.

Faka’apa’apa Atu,

Mamahi'i 'Akapulu