Hoko ‘a Tonga ko e fonua hono 187 ke Mēmipa ‘i he ILO (Kautaha Fakamamani Lahi ki he Ngāue ‘a e Kakai) Featured
Nuku'alofa, 3 Ma'asi 2016. Kuo hoko ‘a Tonga ko e Fonua hono 187 ke mēmipa he Kautaha Fakamāmani Lahi ki he Ngāue ‘a e Kakai pē (ILO) ‘o kamata lau ia mei he ‘aho 24 ‘o Fēpueli, 2016 hili ‘eni hono ma’u ‘e he Talekita Seniale ‘o e ILO, ‘a e tohi mei he Pule’anga ‘o Tonga ‘o fakapapau’i ange kuo ne tali ‘a e ngaahi Konisitutone ngāue ‘o e Kautaha Fakamāmani Lahi ki he Ngāue ‘a e Kakai.
Ko e Kautaha Fakamāmani Lahi ki he Ngāue ‘a e Kakaí (ILO) na’e fokotu’u ia ‘i he 1919 pea ‘oku fa’u ‘aki e ngaahi sino ngāue tefito ‘e tolu, ‘a ia ‘oku mahu’inga tatau pe honau ngaahi le’o; ‘a e le’o ‘o e kau ngāue’ (workers), le’o ‘o e ngaahi ngāue’anga’ (employers) pea mo e le’o ‘o e pule’anga’ (government), pea ‘oku fakapapau’i ai ko e ngaahi fokotu’u fakakaukau mei he ngaahi hoa ngāue ko ’eni’ ‘e fakakau kotoa ki hono fokotu’utu’u ‘o e ngaahi tu’utu’uni ngāue mo e ngaahi polokalama ngāue.’
‘I he hoko ko ’eni ‘a Tonga ko e mēmipa ‘o e Kautaha Fakamāmani Lahi ki he Ngāue ‘a e Kakai (ILO), ‘oku ne fakahā ‘ene poupou kakato ki he ngaahi tefito’i tui fakangāue ‘oku totonu mo taau, pea mo hokohoko atu ‘a e feinga ke fakakakato ‘a e ngaahi tu’unga ‘oku tali fakamāmani lahi ki he ngāue ‘a e kakai.’ ‘I he founga ngāue ni ‘e tukupā ai a Tonga ki hono faka’ai’ai ‘o e ngaahi ngāue ki he kakai’ ‘oku totonu mo taau kau ai mo hono hiki’i hake ‘a e malu’i ‘o e kau ngāue, mo hono to e fakamalohia ‘a hono talanga’i ‘o e ngaahi palopalema ‘oku fehangahangai mo ha ngāue.
‘Oku te’eki ke fakamo‘oni ‘a Tonga ki ha Konivesio ‘o e Kautaha Fakamāmani Lahi ki he Ngāue ‘a e Kakai hili hono fokotu’u ko e mēmipa.’ Ko e fakamo’oni ki ha taha ‘o e ngaahi Konivesio ‘o e Kautaha Fakamāmani Lahi ki he Ngāue ‘a e Kakai, ‘e makatu’unga ia mei hano ‘uluaki fakahoko ha alealea kimu’a mo e ngaahi kupu fekau’aki.’
‘Ofisi ‘o e Palēmia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644 Fax: (676) 23 888; Ngaahi Faka’eke’eke- Email: This email address is being protected from spambots. You need JavaScript enabled to view it.
 "Pin It")
2 comments
-
Koe taha foki eni ha fakakaukau fisifisimu'a ke memipa 'a Tonga he "ILO". 'Oku ou faka'amu lahi ke nga'unu leva e Pule'anga ke fakahono hono ngaahi fiema'u 'ae Konivesio ko 'eni kae hoko 'a Tonga koe memipa kakato pea 'e toki l ava leva 'a Tonga ke benefit mei ai. Ko 'ene tu'u ko'eni he taimi ni, 'oku kei "Lip Service" pe Pule'anga 'o fakangalingali mai mo 'ai mai e ngaahi ongoongo ke hiki hake ai e mahalo moe fakakaukau atu 'ae kakai kae hili ko ia 'oku 'ikai hano fu'u mahu'inga 'e taha. Kole atu mu'a kihe Pule'anga ke mou fakato'oto'o mu'a 'o fai mo fakahoko e ngaahi me'a mahu'inga 'oku totonu ke fakahoko, kae lava ke sii lave ai e kakai e fonua he ngaahi lelei e hoko. Malo!
-
Te'eki fakapaasi 'etau Employment Bill kuo tau piki kitautolu ki he me'a koeni. Kapau ange ne 'osi maau 'etau structure ki he kau Ngaue 'e ngaholo e toenga 'o e process 'o e 'otu me'a ni mahalo. Kaikehe ko e taimi ia mo e kuonga, ko e talia pe ha ngaahi peau 'e hake mai.
Malo e Ngaue!