Faka'ilo 'a 'Ikani Taliai ki he Lau'i kovi ^Featured

Ko 'ikaini Taliai koe  Sea ia 'o e Kosilio Sipoti 'a Tonga (Tonga Sports Council) pea ko hono faka'ilo ko'eni 'o Taliai 'e Lord Tupou mo Lord Sevele 'oku makatu'unga ia 'i he 'atikolo na'e pulusi 'e Taliai ‘i he’ene peesi Facbook ‘i he ‘aho 14 ‘o Tisema 2018 pe ofi kiai  ‘o hā ai ‘a e fakamatala 'oku ne tukuaki'i 'a Lord Sevele mo Lord Tupou.

Ko e tukuaki'i ko'eni 'o pehē na'e 'amanaki ke lesisita 'a e PGOC (Pacific Games Organizing Committee) ko e Incorporated society pe koha kautaha fakalao pea na’e ta’ofi eni ‘e Lord Sevele pea ne tu’utu’uni ke lesisita pe ‘a e PGOC ‘i he Charitable Trust Act 1993, koha Charitable Trust.

Na'e hā foki 'i he 'atikolo ko'eni 'a Taliai ko e fokotu'utu'u ko'eni 'e iku ma’u mo pule'i kakato 'e he kau memipa ‘o e Poate 'a ia 'oku kau ai 'a Lord Tupou mo Lord Sevele pea na'e totonu ke lesisita ko e kautaha pea fakamavahevahe’i fakalao’a e kau memipa mei he koloa ‘a e kautaha.

Na'e hoko atu 'a Taliai 'o pehē ko ‘ene hoko koe Charitable Trust ‘e ‘i ai e mafai ia ‘o ha hangē ko e  Poate PGOC kenau ma’u taautaha mo pule’i ‘a e $400 miliona ne teu ke ‘oatu kenau ngāue’aki ki he Pacific Game.

Na'a ne toe fakamatala foki he 'atikolo ko'eni kuo tau anga maheni he sio ki he mole ‘a e ngaahi pa’anga lahi ‘oku ‘omai ki Tonga ni pea tau fakakaukau leva pe koe hā ‘a e me’a na’e mei hoko kapau na’e ‘ave ‘a e pa’anga ‘e $400 miliona ki he PGOC ‘a ia koe Charitable Trust pea 'oku memipa ‘i he PGOC ‘a Lord Tupou mo Lord Sevele”

'Oku faka'ikai'i mamafa foki 'e Lord Tupou mo Lord Sevele 'a e fakamatala ko'eni he 'atikolo ko'eni na'e pulusi he peesi feisipuka 'a Taliai pea na'e 'ikai ha pa'anga 'e $400 na'e teu 'ave ke ngāue'aki ki he sipoti pe ko hano teu lesisita ha Charitable Trust.

Ko e faka'ilo ko'eni koe faka'ilo sivile pea 'oku fakahoko pe ia 'i he malumalu 'o e Fakamaau'anga Polisi.