Puke ha matapule Fahefa moha faito'o konatapu (ice) mo e maliuana ^Featured

Na'e puke 'e he timi ni fakafuofua ki he taimi 3:00 am pongipongi 'aneafi ha matapule ta'u 22 mei Fehefa mo e faito'o 'aisi mo e maliuana.

Ko e konga pe 'eni 'a e polokalama le'o mo hono taketi'i 'ehe timi 'a e kau tila pea na'a nau fakatokanga'i ai ha motokaa 'ikai ha peleti laiseni 'oku tau 'i he toumu'a 'o e 'apiako Ocean of Light 'i Hofoa.

Na'e fai hano hua 'o e me'alele ni 'o iku ke ma'u ai 'a e milemila 'aisi kuo 'osi fa'o peketi (methamphetamine) 'e 10 'a ia 'oku fakafuofua ia ki he kalami 'e 3.48, peketi maliuana kalami 'e 0.87 mo e faito'o kehe pehe ki he pa'anga.

'I he fakamatala 'a e pule 'o e 'Apitanga Polisi Nuku'alofa Tevita Vailea koe konga pe 'eni 'o e ngaue moe feinga ke ta'ofi 'a e ngaue pango ni pea 'omai mo e kakai ko'eni ke fakamaau'i ki he ngaue ta'e'ofa ko'eni ki he fonua mo e hakotupu.

'Oku toe fakahoko mai ai pe mo e kole ki he kakai 'o e fonua kenau fetu'utaki ki he fika 23417 pe 922 kapau 'oku nau 'ilo ki ha fa'ahinga ngaue ki hono fakatau mo fetuku holo 'a e faito'o konatapu.

Lolotonga foki 'eni kuo tuku mai 'e Televisone 'Uluaki (One News) 'a Nu'usila ha polokalama (documentary) ki he lahi mo hono 'ohofia 'e he faito'o konatapu 'a e fonuai pea iku ki hono fakahua'aki ko e Pule'anga 'o e 'Aisi. 

'Oku mahino mai 'oku 'ikai mama'o 'eni mei he lekooti ko'eni ko hono toutou puke 'o kinautolu 'oku nau fetuku holo 'a e faito'o konatapu 'a ia 'oku matu'aki fakatu'utamaki ki he fonua.

'Oku kei tauhi 'e he kau polisi 'a e matapule ni 'o tali ai ke fai hano fakamaau'i.