Tali Tangi ‘a Clive Edwards: Toe mo’ua pe ‘Akilisi Pohiva, Laucala, Mateni Tapueluelu mo e Nusipepa Kele’a ^Featured

Ko e tu’utu’uni 'a e Tu'i Fakamaau Lahi 'i he 'aho ni na'e makatu'unga  ia ‘i he hopo ‘i he vaha’a ‘o Edwards mo e kau Faka’iloa ‘i olunga pea koe hopo tangi ko’eni na’e fakahoko ia ‘i he ‘aho 17 ‘o Me, 2018 ‘a ia koe mahina ia kuo tau situ’a kiai.

Na’e tuku fakatafa’aki ‘e he Tu’i Fakamaau Lahi Owen Paulsen ‘i he’ene tu’utu’uni ko’eni ‘i he Fakamaau’anga Tangi ‘i he malumalu ‘o e Fakamaau’anga Lahi (Supreme Court of Tonga Appellate Jurisdiction)  ‘a e tu’utu’uni ‘a e Fakamaau’anga Polisi ‘a ia na’e fakahoko ‘e he Fakamaau Polisi ko Similoni Tu’akalau 'i he 'aho 29 'o Me 2012.

Na’e tali ai ‘a e tangi ‘a Edwards, fakata’e’aonga’i ‘a e tu’utu’uni na’e fakahoko ‘i he Fakamaau’anga Polisi pea ‘oange mo e faingamalie kia Edwards ke kole kiha totongi huhu’i ki he maumau tukukehe ange hono tali ke totongi ‘a e pa’anga na’e ‘eke ‘e Edwards ‘i he Fakamaau’anga Polisi.

Ko e hopo foki ‘eni ‘i he ‘atikolo na’e paaki ‘e he Nusipepa Kele’a ‘i he ‘aho 9 Sanuali 2012 ‘o ‘ulu’i tohi ‘aki ‘a e fakalea na’e pehe: “Hoko Minisita Lao William Clive Edwards ko e toitoi’anga ‘o e kau fai hia.”

Na’e faka’ilo foki ‘e William Clive Edwards ‘a e Nusipepa Kele’a mo e kau Faka’iloa ‘i he Fakamaau’anga Polisi ‘o ‘eke hono ongoongo mo e maumau fe’unga mo e pa’anga ‘e $10,000 ‘o fe’unga pe mo e lahi ‘o e pa’anga ‘oku ‘i he mafai ‘o e Fakamaau’anga Polisi.

Na’e tukuange foki ‘a e kau Faka’iloa ‘i he tu’utu’uni ‘a e Fakamaau’anga Polisi hangē koia ‘oku hā atu ‘i ‘olunga pea na’e pau ai ke tangi ‘a Edwards ki he Fakamaau’anga Lahi ‘a ia na’e makatu’unga mei ai ‘a e tu’utu’uni ‘i he ‘aho ni.

Na’e fakamahino ‘i he tu'utu’uni ko’eni ‘a e Tu’i Fakamaau Lahi koe ‘atikolo ko’eni na’e pulusi 'e he Nusipepa Kele'a pea fatu 'e he kau Faka'iloa na'e fu’u mahino ‘ene natula lau’ikovi’i pea ‘ikai ngata ai ka na’e fepakipaki 'a hono kakano pea ‘ikai mo’oni.

'I he tu'utu'uni ko'eni na'e fakamahino ai na’e fa’u 'a e 'atikolo ko'eni ‘i he loto ‘oku kovi mo ‘ikai hangamalie pea mavahe mei he mo'oni.

Na’a ne toe hoko atu ki he’ene pehe ‘oku ‘ikai ha fakamo’oni ‘e taha ke poupou ki he ngaahi tukuhifo mo hono tukuaki'i kovi ‘o Edwards ‘i he ‘atikolo ko’eni ‘a ia na’e ‘ikai hano makatu’unga ‘e taha pe koha ngaahi tohi poupou 'e fakahu mai ki he Fakamaau'anga.

Ko e tukuaki’i foki ‘eni ‘o pehe na’e fakahoko ‘e Edwards ‘a e ngaahi ngaue hala lolotonga ‘ene hoko koe Minisita Polisi ‘i he ta’u 1993 ‘o kau ai ‘a e ngaahi faihala fekauaki mo e paasipooti pehe ki he’ene foaki ‘a e paasipooti ki he tangata Siaina ko Ming Seng Tsai, tanu hono ‘api nofo’anga ‘i Mataika ‘i he Fanga’uta lolotonga ‘oku Minisita Polisi pehe ki he’ene fakafofonga’i ‘a Ming Seng Tsai ‘i ha fakatonutonu fakalao ‘i he ta’u 1997 pea fakamulituku 'aki hono tukuaki'i koe tokotaha fahia 'oku ne poupou'i 'a e faihala 'i he fonua.

Na’e fakatataa ‘aki ‘e he Tu’i Fakamaau Lahi ‘a e hala mo e ‘ikai mo’oni ‘a e tukuaki’i ko’eni ‘a e tatau ‘o e hopo (transcript) na’e fakahoko ‘i he Fakamaau’anga Polisi pehe ki he kakano ‘o e ‘atikolo ni ‘a ia na’e fakamahino ‘e he Tu’i Fakamaau Lahi ‘i he’ene tu’utu’uni na’e mahino lelei pe na’e ‘ikai ke Minisita Polisi ‘a Edwards ‘i he ta’u 1993 he na’e toki hoko ia koe Minisita Polisi ‘i he ta’u 1996.

Na’e toe fakamo’oni’i foki na’e ‘ikai ke fakafofonga’i ‘e Edwards ‘a Ming Seng Tsai ‘i ha hopo ‘i he ta’u 1997 pea ko hono tanu ‘o e ‘api ‘o Edwards ‘i Mataika na’e fakahoko ia ‘i he ta’u 1986-1988 lolotonga ia ‘oku nofo Nu’usila ‘a Edwards ia pea na’e te’eki hoko ia koha Minisita.

'Oku 'ikai ngata heni ka na'e 'etimiti (admit) pe 'e he kau Faka'iloa lolotonga 'a e hopo 'i he Fakamaau'anga Polisi 'o fakamahino 'oku mo'oni na'e 'ikai Minisita Polisi 'a Edwards 'i he taimi ko'eni na'e fai ai hono tukuaki'i mo hono lau'ikovi'i.

Na’e fakafalala ‘a e taukapo ‘a e Loea ma’a e kau Faka’iloa Laki Niu ‘i he tangi ko’eni ‘i he ‘uhnga ‘oku ‘i ai enau totonu faka-kualifai (qualify privilege) ke fakahoko hono pulusi ‘a e ongoongo ko’eni he ‘oku mahu'inga pea 'i ai 'ene kaunga tonu ki he fonua pea 'oku fiema’u ke ‘ilo kiai ‘a e kakai ‘o e fonua kiai.

Na’e fakamahino ‘e he Tu’i Fakamaau Lahi ‘oku ‘ikai koha qualify privilege ‘eni he ‘oku mahino koe ongoongo ‘oku ‘ikai mo’oni pea ‘oku loi pea ‘oku ‘ikai ha fakamo’oni ‘e taha kiai ke poupou ‘oku ‘i ai ha mo’oni ‘i he tukuaki’i na’e fakahoko ‘e he ‘atikolo ko’eni.

Na'a ne toe fakamamafa'i 'a hono ngauehala 'aki 'e he kau Faka'iloa 'a e ngaahi 'elemeniti 'o e taukapo 'o e qualify privilege 'a ia 'oku 'ikai tali ia 'e he Fakamaau'anga 'o fakatatau ki he Lao mo e ngaahi Keisi 'iloa kuo fakahoko 'i he 'uhinga fakataukapo koia.

Na’e toe fehu’ia foki ‘e he tu’utu’uni ko’eni ‘a e founga faka-faiongoongo mo e ‘ikai ke kumi ki he mo’oni mo e totonu kae fakahoko 'i he funga ‘o e loi mo e loto ‘taufehi'a ‘a ia ‘oku uesia lahi ai ‘a e ongoongo ‘o Edwards koe loea ‘iloa mo e tangata ma’u tu’unga ‘i he fonua.

'Oku mahino foki 'e totongi 'a e pa'anga 'e $10,000-00 na'e 'eke 'e Edwards 'i he Fakamaau'anga Polisi pea tanaki atu kiai mo e costs pe koe ngaahi fakamole ki he hopo ni 'o tatau pe 'i he Fakamaau'anga Polisi mo e Fakamaau'anga Tangi (Fakamaau'anga Lahi) 'o kau atu ki ai mo e maumau 'a ia 'oku fakafuofua 'e 'eva atu 'i he laumano lahi ki he kilu.

Na'e fakafofonga'i 'e William Clive Edwards Sr ia ‘i he hopo tangi ko’eni pea ko Laki Niu ma’ae kau Faka’iloa.