‘Ikai Mo’oni Tala ‘e he Palēmia ‘oku Hala Pa’anga (Bankrupt) ‘a e TASANOC Featured
Takitoa Taumoepeau, Sekelitali Seniale TASANOC
Nuku’alofa, 3 Fepueli 2016. Kuo faka’ikai’i mamafa ‘e he Sekelitali Seniale ‘a e TASANOC (Tonga Sports Association and National Olympic Committee) Takitoa Taumoepeau ‘a e fakamatala ‘a e Palēmia ‘i he Fale Alea ‘o Tonga ‘i he ‘aho Pulelulu 3 ‘o Fepueli ‘o pehe ‘oku ‘ikai ha pa’anga ‘a e kautaha.
Na’e hā foki ‘i he fakamatala ‘a e Palēmia ‘oku ‘ikai toe lava ‘e he kautaha ko’eni ‘o fakahoko honau fatongia he ‘oku bankrupt pea ‘ikai ha pa’anga ke totongi ‘aki honau ngaahi mo’ua ‘o kau kiai ‘enau nō mei he Pule’anga.
Ko e fakamatala foki ‘eni ‘a e Palēmia hili ia hano fehu’i kiate ia ‘e he Fakafofonga Nopele ‘o ‘Eua Lord Nuku pe ko e fē ‘a e sino faka-Lao na’e ‘osi fokotu’u kene tokangaekina ‘a e Sipoti lolotonga ‘a e folau mai ‘a e kau ‘a’ahi mei Papua Niukini ki Tonga ni ‘i he uike ni ‘o taki mai ‘e he ‘enau Minisitā Sipoti Hon. Justin Tkatchenko.
Na’e hoha’a ‘a e ‘Eiki Nopele he koe ‘a’ahi ko’eni mei Papua Niukini ‘oku nau fakataumu’a mai ki he Mala’e Sipoti Teufaiva ke fakahoko hano fakalelei lolotonga ko’eni ‘oku ‘i ai ‘a e sino faka-Lao ‘a ia koe Komiti Fokotu’utu’u ki he Sipoti ‘a e Pasifiki 2019 ‘a ia ‘oku fengāueaki vāofi mo e TASANOC. Na’e hoha’a foki ‘a e Nopele he ‘oku lolotonga fakahoko ‘a e fokotu’utu’u ‘a e komiti pea ‘oku totonu kenau femahino’aki mo e Pule’anga telia na’a fehopokaki (duplicate) ‘enau ngaāue ‘i he me’a tatau pe.
Kaikehe, na’e hoko atu foki ‘a e Palēmia ‘i he’ene fakamatala na’a ne ui ‘a e fakataha mo e TASANOC pea mahino kiate ia ‘a e palopalema ‘oku fehangahangai mo e kautaha ni pea ko hono mo’oni ‘oku ‘ikai ha toe ‘aonga ‘o e kautaha ni he ‘oku ‘ikai ha’anau pa’anga.
‘I he fakamatala ‘a Takitoa Taumoepeau ko e Sekelitali Seniale ‘a e TASANOC ki he ongoongo ‘a e Letiō Tonga na’a ne faka’ikai’i mamafa ‘eni pea na’a ne toe fakahā foki ‘oku lele ‘i matangi ‘a e ngāue ‘a e kautaha ‘o kau ai foki mo e ngāue teuteu ko’eni ki he Sipoti.
Ko e vā foki ‘eni ‘oku lolotonga hoko ‘i he fonua ‘i he vaha’a ‘o e Komiti Fokotu’utu’u ‘o e Sipoti 2019 ‘a ia na’e tu’utu’uni ‘e he lao mo e Palēmia he kuo a’u ki he tu’unga kuo fokotu’u atu ‘e he Palēmia ki he Komiti ko’eni kenau fakafisi. Ko e komiti foki ‘eni ‘oku Sea ai ‘a Lord Sevele pea ‘oku nau tu’utu’u tau’ataina ‘o ‘ikai mafai ‘a e Palēmia ke tuku kinautolu ki tu’a fakatatau ki he lao ‘o e fonua.
Ko hono faka’ikai’i mamafa mai ko’eni ‘e he TASANOC ‘a e fakamatala ‘a e Palēmia ‘oku mahino mei heni ‘a e fefūsiaki ‘oku hoko ‘i he ngaahi fokotu’utu’u fekau’aki moe sipoti ka ‘oku kei mahu’inga pe foki mo totonu 'i he taimi tatau ‘a e muimui ki he lao mo e ngaahi tu’utu’uni kuo fokotu’u fekau’aki mo teuteu ‘a e fonua ki he Sipoti ‘a e Pasifiki ‘i he 2019.
 ‘a e TASANOC "Pin It")
13 comments
-
'Oku ha mamalie mai 'ae MO'ONI.........Pea malo Tofavaha 'ae 'omai 'ae Tafa'aki ko'eni mei he Palesiteni Lahi/ Lopini Tu'ivakano....Tau Ta pe mo Laka, kae hoko atu 'ae ngaue ia , koe'uhi koe Kaha'u 'o Tonga.
Tau saupulu pe hotau vaka mo Takanga 'etau Fohe he koe folau 'oku loloa.... -
Ko e fo'i fakamatala eni ia ku 'ata kehe ku 'ohake 'e Tofavaha pea 'oku maalie etau ma'u kotoa e tafatafa'aki, pea kapau ko e founga ena ia ne ma'u 'aki 'e he Palemia e Talanoa na'e founga pehee ta ku ne lohiaki'i 'e ia e Fale Alea he na ne fakaha 'eia ko e ngaahi fakamatala mei he lipooti mo e ha fua e me'a fakapepa. Pea 'oku 'i ai mo e tokotaha ia na'e ma'u mei ai e fakamatala ko Lopini Tu'ivakano, na na'e konaa ia 'o lea tavale.
-
Malie 'a e feinga fakatonuhia 'a Takitoa ka ko e ngaahi me'a kotoa ko ena ne fakaha 'ehe Palemia 'I Falealea ko e ha'u kotoa mei he ngutu 'o Lady Robyn Tuivakano (Palesiteni 'o e TASA) ki he Palemia he mala'e tapulu Manamo'ui 'I he efiafi Tokonaki 7 'o Novema 2015. Na'a ne fakaha ki he Palemia 'oku bankrupt 'a e TASA pea tokolahi e kakai na'e fanongo kiai. Na'e 'ikai tu'o 1 pe 2 pe 3 ka ne tu'olahi 'ene pu'aki 'a e bankrupt 'a e TASA. Ko Robyn tatau pe eni mo 'ene komiti na'a nau tuku ki tu'a 'a Takitoa mei hono lakanga ko e Sekelitali Seniale he TASA he ngaahi ta'u si'i kuo maliu atu kae fokotu'u hake 'a 'Ahongalu Fusimalohi ke le'ole'o he lakanga kae toki fili ha taha kiai. Koeha leva e lakanga 'o Takitoa he TASA he lolotonga ni kene fakahalaki ai e lau 'a e Palemia lolotonga ko e ha'u kotoa mei he ngutu e Palesiteni, Robyn Tuivakano?. Kapau 'oku tuai e report ta 'oku 'iai e me'a 'oku namunamu faikehe, he 'oku 'ikai ko ha miliona ke tuai hono fakama'opo'opo. Kaikehe ko e tanaki atu pe ki he 'etau talanga, 'ofa atu.
-
me'apango koe lahilahi e ngaahi fakamatala hala 'oku fa'a tuku mai he'e PM. 'Oku 'ata ngali vale 'aupito ai pea toe 'ata mai foki 'oku hangehange 'oku 'ikai ke fale'i lelei ia 'e hono kau fale'i pe ko 'ene kau ngaue. 'Oku tau anga maheni 'ihe ngaahi fonua 'i muli (NZ, Aus, USA) koe me'a 'oku lea mai 'aki 'e hono kau taki 'oku fakapapau'i pea toki hu mai ki tu'a kihe public. Ka ko 'eni ia 'oku hange 'oku 'ai'ai noa'ia pe 'ae PM ia, koe tukuaki'i ko 'eni 'oe TASANOC na'e tonu kene matu'ak fakapapau'i 'oku mo'oni 'ene me'a 'e lea'aki pea toki lea'aki. tau maia 'oku 'ikai haane kau ngaue ke nau check e ngaahi me'a ko'eni pea fale'i lelei ia. Faka'ofa 'aupito 'ene to'onga pehe he 'oku ne tuku hifo ai hono ngeia pea toe tuku hifo ai foki moe NGEIA 'oe Falealea.
-
'Oku 'alu pe taimi moe ha mahino mai e natula taki 'o 'Akilisi Pohiva koe Palemia 'o Tonga. Koe tangata foki ne lahi hono ngaahi kovia he kuo hili pea kuo ne ngaue lelei 'aki leva 'i he'ene hoko hake ki he Palemia ke feinga saunii ai leva e ngaahi me'a ne hoko kia teia. 'Oku ha lelei ia 'i he 'ene ngaahi 'oho noa'ia, 'oho kui, feinga ke tuli e kakai, faka pale'i 'a hono kau poupou he ngaahi lakanga he pule'anga, fieme'a ki he tofi'a e Tu'i, moe ha fua e ngaahi me'a kehekehe kuo mou vakai lelei pe ki ai. Mou vakai lelei pe ki he'ene ngaahi faka malanga he falealea mo 'ene ngaahi fakafekiki 'a e faka kauleka vale moe fakahoa pe ene ngaue ki he ngaahi pule'anga kuo osi. Koe taki ko ia ko Manitela 'o 'Afilika, na'e 'ata mei pilisone pea ne hoko koe taki pea na'e 'eke ki ai pe tene sauni'i e kakai ko ia ne nau ngaahi kovia ia, ka na'ane tali, he koe ha hono 'aonga. Koe ngaahi me'a ko ia 'e tuiku kotoa ia ki mui he 'oku 'ikai ke fai ha langa hake ia ai. Koe me'a 'oku fie ma'u ke tau hanga ki mu'a pea fai ha ngaue fakataha ke langa e fonua mo tokoni'i e masiva. Koe tama ia ko eni 'a tautolu, kuoi mahino mai eni koe feinga sauni ai leva he teemi ko eni mo tufi ha'anau silini he kupo mahino pe ia ko 'ene faka'osi 'ana e.
-
Kuo fakahalaki mai ehe Komiti e foi fakamatala a e Palemia. Pea kapau oku mooni e Komiti ta koe tukuhifo molale ia a e Palemia moe ngutulau heikai ke toe osi.
-
'E ngata 'afe 'ikai fetaulaki e taki moe ngaahi kupu 'oku fengaue'aki moe PUle'anga?......
-
Ta koe report ke fkkakato Masi'i koe MISSING FUNDS he loto'i komiti, Fai mo fkkakato kae tafe mai 'ae Tokoni pea lava ke tau fea'uhi he Olimipiki 2016
-
Pea fielau ka ko ha fo'i me'a eni ia ku lea mo'oni ai e Palemia kuo faingata'a ia ketau kei tui kiai.
-
Fai mo fkkakato 'ae Fkmatala/Report kihe Komiti Olimipiki a Mamani, kae Lava ke tau kau atu kihe Sipoti Olimipiki 'oe Ta'u ni 2016 Ki Rio/Sth America.
Fu'u lahi 'ae fkmatala fkpoto !!!!..
.Ka koe report 'eni 'oku 'ikai lava ke fkhu on time???