‘Ikai Mo’oni Tala ‘e he Palēmia ‘oku Hala Pa’anga (Bankrupt) ‘a e TASANOC Featured
Takitoa Taumoepeau, Sekelitali Seniale TASANOC
Nuku’alofa, 3 Fepueli 2016. Kuo faka’ikai’i mamafa ‘e he Sekelitali Seniale ‘a e TASANOC (Tonga Sports Association and National Olympic Committee) Takitoa Taumoepeau ‘a e fakamatala ‘a e Palēmia ‘i he Fale Alea ‘o Tonga ‘i he ‘aho Pulelulu 3 ‘o Fepueli ‘o pehe ‘oku ‘ikai ha pa’anga ‘a e kautaha.
Na’e hā foki ‘i he fakamatala ‘a e Palēmia ‘oku ‘ikai toe lava ‘e he kautaha ko’eni ‘o fakahoko honau fatongia he ‘oku bankrupt pea ‘ikai ha pa’anga ke totongi ‘aki honau ngaahi mo’ua ‘o kau kiai ‘enau nō mei he Pule’anga.
Ko e fakamatala foki ‘eni ‘a e Palēmia hili ia hano fehu’i kiate ia ‘e he Fakafofonga Nopele ‘o ‘Eua Lord Nuku pe ko e fē ‘a e sino faka-Lao na’e ‘osi fokotu’u kene tokangaekina ‘a e Sipoti lolotonga ‘a e folau mai ‘a e kau ‘a’ahi mei Papua Niukini ki Tonga ni ‘i he uike ni ‘o taki mai ‘e he ‘enau Minisitā Sipoti Hon. Justin Tkatchenko.
Na’e hoha’a ‘a e ‘Eiki Nopele he koe ‘a’ahi ko’eni mei Papua Niukini ‘oku nau fakataumu’a mai ki he Mala’e Sipoti Teufaiva ke fakahoko hano fakalelei lolotonga ko’eni ‘oku ‘i ai ‘a e sino faka-Lao ‘a ia koe Komiti Fokotu’utu’u ki he Sipoti ‘a e Pasifiki 2019 ‘a ia ‘oku fengāueaki vāofi mo e TASANOC. Na’e hoha’a foki ‘a e Nopele he ‘oku lolotonga fakahoko ‘a e fokotu’utu’u ‘a e komiti pea ‘oku totonu kenau femahino’aki mo e Pule’anga telia na’a fehopokaki (duplicate) ‘enau ngaāue ‘i he me’a tatau pe.
Kaikehe, na’e hoko atu foki ‘a e Palēmia ‘i he’ene fakamatala na’a ne ui ‘a e fakataha mo e TASANOC pea mahino kiate ia ‘a e palopalema ‘oku fehangahangai mo e kautaha ni pea ko hono mo’oni ‘oku ‘ikai ha toe ‘aonga ‘o e kautaha ni he ‘oku ‘ikai ha’anau pa’anga.
‘I he fakamatala ‘a Takitoa Taumoepeau ko e Sekelitali Seniale ‘a e TASANOC ki he ongoongo ‘a e Letiō Tonga na’a ne faka’ikai’i mamafa ‘eni pea na’a ne toe fakahā foki ‘oku lele ‘i matangi ‘a e ngāue ‘a e kautaha ‘o kau ai foki mo e ngāue teuteu ko’eni ki he Sipoti.
Ko e vā foki ‘eni ‘oku lolotonga hoko ‘i he fonua ‘i he vaha’a ‘o e Komiti Fokotu’utu’u ‘o e Sipoti 2019 ‘a ia na’e tu’utu’uni ‘e he lao mo e Palēmia he kuo a’u ki he tu’unga kuo fokotu’u atu ‘e he Palēmia ki he Komiti ko’eni kenau fakafisi. Ko e komiti foki ‘eni ‘oku Sea ai ‘a Lord Sevele pea ‘oku nau tu’utu’u tau’ataina ‘o ‘ikai mafai ‘a e Palēmia ke tuku kinautolu ki tu’a fakatatau ki he lao ‘o e fonua.
Ko hono faka’ikai’i mamafa mai ko’eni ‘e he TASANOC ‘a e fakamatala ‘a e Palēmia ‘oku mahino mei heni ‘a e fefūsiaki ‘oku hoko ‘i he ngaahi fokotu’utu’u fekau’aki moe sipoti ka ‘oku kei mahu’inga pe foki mo totonu 'i he taimi tatau ‘a e muimui ki he lao mo e ngaahi tu’utu’uni kuo fokotu’u fekau’aki mo teuteu ‘a e fonua ki he Sipoti ‘a e Pasifiki ‘i he 2019.
 ‘a e TASANOC "Pin It")
13 comments
-
Na'a ku ki'i fanongo hake he talanga Fale Alea 'aneuhu peau fiefia lahi he ngaahi fakfehu'i na'e fai 'e NOPELE NUKU he ko e fakamoleki o e pa'anga e Fonua oku fiema'u ke 'ilo. Kuo tala ia 'e he Palemia 'oku mole taimi. 'Eke'i o e fakamole kuo mole taimi ia. Ko e 'eke'i 'o ha ngaue 'oku tuai kuo talamai ke tuku ange ha taimi, 'a e ngaahi fo'i setesi na'e fisi'ia pea ne uki ai e tutu e fonua.
-
Kou tui 'okapau na'e 'uluaki poupou pe Palemia ki he sipoti 'i he'ene 'uluaki hu hake 'o pule'anga na'e faingofua ke lele 'i matangi e ngaue...ka kuo toki hu hake ia 'o lele fakatafa'aki 'ene ngaahi alea he mahino 'oku 'i ai e fatongia e pule'anga na'e 'osi fai e femahino'aki fakalao ki ai..he ko hono mo'oni 'oku nofo e Palemia ke ne kaiha'asi mai e fatongia e komiti na'e 'osi fili koe'uhi ko hono ongoongo ke 'asi lelei ko ia na'a ne fai e teuteu ki he sipoti..kataki Palemia ko ho fatongia koe poupou pe ki he ngaue 'a e komiti mo kumi ha tokoni kae 'ikai ko ho'o lele atu 'a'au ke ke pule ai...kole atu tuku ki he kakai 'oku nau 'ilo e me'a ke fai ka ke poupou pe na'a hange ko ho'o 'oho kui holo he ngaahi fokotu'utu'u fo'ou kuo ke fakahoko 'o iku longoa'a ai e fonua..pea tuku a hono fakapolitiki'i e ngaahi ngaue 'oku 'ikai fiema'u ke politiki..'oua teke feinga ke ke campaign 'aki e sipoti ki ho ongoongo ka ke nofo 'o feinga'i e fonua ke fiemalie he ngaahi me'a koena 'oku nau kei tala'a ai 'i ho'o fokotu'utu'u..
-
Kuo 'ikai toe ha me' a he 'ohonoa takai holo ai 'ae palemia. Lolotonga fai e valau tu'u 'ae matu'a he ola e sivi moe ta'emahino e kaha'u 'oe ako 'i Tonga tupunga mei he 'ohonoa 'ae palemia mo hono foha, kuo hiki hake eni 'o 'oho atu ki he sipoti lolotonga ia 'oku 'iai e sino fakalao ke nau tokanga'i e tafa'aki ko ia. Toe lele hake 'o 'ohonoa fiematamu'a atu he tofi'a 'oe Tu'i, ko hai ia ke 'alu atu 'o fiepule atu ki he koloa 'ae Tu'i. Vakai atu foki na'a 'oku toe 'iai ha polokalama komipiuta 'a piveni mo siaosi ke fakalele'aki e sipoti mo palani'aki e mala'e tapulu he 'oku lahi e pa'anga tokoni 'oku teuaki mai ki ai. Kole atu kihe palemai ke takitaha tu'u hono laini kae maau e ngaue 'ae fonua, he koe tupunga 'etau fa'a hee koe fehopokaki holo he siakale. Pea kuo 'alu pe taimi moe toe lahi ange 'asi mai 'ae loi moe mio'i 'ae palemia ko eni. Ta na'e tonu pe 'ene toutou mo'ua he ngaahi hopo ngutulau atu ki mu'a he ta koaa koe siana loi faka'ulia e. Tane'ine'i ke na kapani mo Lavu, koe kengi 'ae kau loi mio'i kakaa lahi.
Tonga e mou 'a hake kae tuku e mohe, na'a mou toki 'ohovale hake pe kuo to e fonua ha fu'u matol.