Fiema'u Maa'imoa 'Akapulu ke Laka ki Mu'a ^Featured

’Oku ‘iai ‘a e lesoni mahu’inga lahi ‘aupito ke tau ako mei ai pea ke fai hano siofi koe’uhi kapau ‘e lava ketau fai ‘a e me’a totonu ko iaa pea ‘oku ‘iai leva ‘a e ‘amanaki lelei kiate kitautolu ki he kaha’u ‘i he maa’imoa ‘akapulu pea mo e fu’u ngaue’anga ni.

Ko e ‘uluaki ngaue ke faii pea ‘oku matu’aki mahu’inga lahi ‘aupito ketau fai ‘a e fo’i ngaue ko ‘eni ‘aia ko hono fakama’opo’opo kitautolu.Pea ‘oku ‘uhinga leva ia ‘e pau ke ‘uluaki tafi mo  fufulu hotau loto fale ke matu’aki ma’a ‘aupito kae lava ke hu ha ‘ea ‘oku fo’ou, lelei, taau mo fe’unga ki loto fale. Na’e tokolahi foki e kakai ‘i he komiti na’a nau tui kinautolu ki he feinga tohoaki 'a e kau politikale ka ‘oku lava ke fakamo’oni’i ta’etoeveiveiua ‘i he ngaahi ‘aho ni ko e ngaahi me’a ko iaa ‘oku ‘ikai ke mo’oni ha me’a ia ai.

Na’e ‘iai e ngaahi palopalema na’e fehangahangai mo e ‘akapulu pe ko e ngaue ‘anga ni ki mu’a atu pe ia ‘i he ngaahi ta’u kuo maliu atu pea ‘e fu’u fiema’u ia ke ‘oua ‘aupito na’a toe ‘asi mai e palopalema ko ia ‘i he’etau langa ngaue ko ‘eni ‘oku ‘amanaki ke tau fuesia he ‘e ‘ikai ke ‘aonga ia ki he lelei fakalukufua ‘a e fonua. Sai ko e tefito’i palopalema ‘oku fehangahangai mo kitautolu pea ‘oku ou kole pe keu ngaue’aki pe ha ngaahi lea ‘oku faingofua pea mahino ngofua kae lava ke tau sio ki he ngaahi palopalema ‘oku tau fekuki mo ia ‘aia kuopau ke tau feinga ke lava ke kumi hano faito’o ‘i he vave taha kae lava ke tau nga’unu ki mu’a.Ko e ‘uluaki palopalema ko e ‘ikai ke lava ketau ngaue’i fakalelei mo fa’u ha ngaahi palani lelei mo tolonga ke lava ketau ngaue’aki ki he anga hono fakalele ‘o e ngaue‘anga ni.

’Oku ‘iai foki hotau ki’i alangaa fokoutua ‘oku tau fekuki mo kitautolu ko ‘etau oo atu mo hotau masiva ‘ango’ango ‘o feinga ke ma’u mo’ui he’etau ki’i fatongia. Ko e ngaahi tonounou kotoa ko ‘eni ‘oku fakatupu kotoa ia mei he ta’e faitotonu pea ‘oku tupu leva ‘a e ta’e faitotonu mei he ‘atakai na’e ‘o hake ai kitautolu ‘a ia ‘e pau pe ko ‘api ne kamata mei ai. Teu ‘oatu e ki’i fakatataa ko ‘eni ko e tokolahi taha ‘i he kakai ne nau ngaue ‘i he komiti ‘akapulu pe ngaue’anga ni ne nau ngaue'aki hala ‘e kinautolu 'a e pa’anga ‘a e komiti kae ‘ikai ke ngaue’i e komiti ke ma’u ha pa’anga ke tanaki ke lahi koe’uhi ke fai’aki e ngaahi fatongia ki he komiti ‘i he kaha’u.

’Aia ko hono mo’oni ne nau fu’u siokita ‘aupito pe kinautolu ‘o puli ’aupito meiate kinautolu e ngaahi me’a lelei ne tonu kenau fakahoko. ’I he fokotu’utu’u fo’ou ko ‘eni ‘oku ou ‘amanaki au ‘e ‘ikai ‘aupito ke toe tali ha kakai ma'u me'atokoni mei he pa'anga ‘oku nau ngaue ki he komiti ‘akapulu pe ‘oku nau politiki pea ‘e fekau kinautolu kenau oo ‘o kumi e feitu’u ‘oku fai ai e politiki. Kuopau ke teke’i kinautolu kenau oo ‘o fai ‘a ‘enau politiki mo 'enau 'ilo pa'anga ‘i ha feitu’u kehe.

Toki hoko atu.

Faka’apa’apa Atu,

Eliesa Fifita-Kolomotu’a.