Malōlō tangata All Blacks tutuku ko Sione Lauaki ‘i hono ta’u 35 ^Featured

Ko e malōlō ‘eni ‘a e talavou koia mei he Makahokovalu mei ‘Uiha ‘i hono ta’u 35 makatu’unga ‘i ha palopalema ki hono kofuua.

Ko Sione Lauaki na’a ne va'inga tesi tu’o 17 ma’a e All Blacks ‘a Nu’usila pea na’e tu’o 70 ‘ene fakafofonga’i ‘a e timi Chiefs ‘a Waikato ‘i he mala’e super 14 pehe foki ki he fe’auhi fakavahe lalahi ‘a Nu’usila.

Na’e ako foki ‘a Sione Lauaki ‘i he ‘apiako Waitakere College pea hiki mei ai ki he Kelston Boys High pea na’a ne va’inga ai ma’a e timi senior fakaako (1st XV) 'a e 'apiako ‘o kamata mei ai hono fakatokanga’i hono taleniti.

Na’a ne toe va’inga foki ma’a e timi fakatahataha ‘a e Pasifiki ‘i he ta’u 2004 kimu’a ia pea ne fuofua kau atu ki he timi ‘a e All Blacks he tesi mo Fisi ‘i he 2005.

Ko e matāpule foki ‘a Lauaki na’e lahi ‘a hono siofi ‘e he founga ‘i loto he mala’e va’inga mo tu’a foki ka na’e ‘ikai ke puli koe tangata fefeka mo va’inga malohi ‘a Lauaki.

Na’e polepole ‘a e fonua ni ‘ia Lauaki pehe ki he’ene a’usia ‘a e tumutumu ‘o e va’inga ‘akapulu.

'Oku tokolahi 'a e kau sitaa 'iloa he mala'e 'akapulu 'oku nau fakahoko atu 'enau popoaki fie kaunga mamahi ki he to'a ni 'o kau ai hono kaunga va'inga ko Sonny Bill Williams 'a ia na'a nau ui foki 'a Lauaki ko Dox.

Na’e fa’ele’i foki ‘a Sione Lauaki ‘i Ha’apai ‘i he ta’u 1981 pea ko’ene malōlō ‘eni ‘i hono ta’u 35.