Fehu’ia pe ’e lava ‘a e tesi ‘a e Ikale Tahi mo Uelesi he Pa’ake Teufaiva ‘i Sune Featured
Taha 'o e ngaahi tesi 'a e 'Ikale Tahi mo Uelesi
10 Fepueli, 2016. ‘Oku tu’u fehu’ia ‘aupito pe ‘e lava ‘a e tesi ‘a e ‘Ikale Tahi mo e timi ‘a Uelesi ‘i he Pa’ake Teufaiva ‘i Sune ‘o e ta’u ni.
Na’e lava mai foki ‘a e kau ‘ofisiale mei he timi ‘a Uelesi mo e Poate ‘Akapulu ‘a mamani ke vakai ‘a e tu’unga ‘o e Pa’ake Teufaiva ‘i he konga ki mui ‘o e ta’u kuo’osi pea na’e fakapapau’i foki mei he Pule’anga mo e Poate ‘Akapulu ‘a Tonga ‘e lava ke fakahoko ‘a e va’inga ko’eni.
Kuo ‘ova he ta’u ‘e 10 ‘a e ‘ikai toe fakahoko mai ha tau ‘akapulu fakavaha’a Pule’anga ki he Pa’ake Teufaiva pea na’e ‘amanaki lelei foki ‘a e kakai ‘o e fonua ‘e lava ‘a e ngāue ko’eni kae lava ‘a e tesi ni.
‘I he’ene tu’u ‘i he taimi ni ‘oku toe pe ‘a e mahina ‘e 4 nai pea ‘oku te’eki ke kamata ha ngāue pe ‘e mahino mai ‘oku ‘i ai ha kautaha kuo nau ma’u ha tenitāke fakahoko ha ngāue ki he Pa’ake Teufaiva.
Na’e faka’eke’eke foki ‘a e Palēmia ‘e he ngaahi mītia pea na’a ne fakapapau’i mai ki he fonua ‘e lava lelei ke fakahoko ‘a e tesi ko’eni pea ‘e a’u ki Sune kuo kakato ‘a e ngāue ke fakalelei ‘a e Pa’ake Teufaiva.
Ko e me'a pe 'oku mahino mai he ngaahi 'aho ni 'oku matangi mo malavalava ange 'a e ngāue ki he pa'ake Va'epopua 'i he Pa'ake Teufaiva
‘Oku lahi hono ‘ohake ‘a e kaveinga ni pea ‘oku tailiili ‘a e tokolahi ‘e ‘ikai lava ‘a e tesi ko’eni pea mole ai pe mo e faingamālie ke mamata ‘a e kakai ‘o e fonua ki ha va’inga ‘a e ‘Ikale Tahi ‘i Tonga ni.
