Faka’atā ‘a e kalapu kava tongá mo e naiti kalapú ‘i he Falaite mo e Tokonakí pē Featured
2 Me 2020. Kuo fakahā ‘e he ‘Eiki Palēmia ‘o Tongá Hon Faifekau Dr Pohiva Tu’i’onetoa ‘i he efiafi ‘o e ‘aho ni ‘e kei hokohoko atu pe ‘a e ngaahi fakangatangata fakafonua ki he COVID-19 ‘i he uike ‘e ua ka hoko maí ‘o kamata ‘i he 8:00 efiafi ‘o e ‘aho ni ki he 8:00 efiafi Me 15.
‘E kei hokohoko atu pe ‘a e tapui ‘o e fe’alu ’aki ‘i he po’ulí mei he taimi 9:00 efiafi ki he taimi 5:00 pongipongi.
‘I he tu’utu’uni ne tuku mai he efiafi ni ‘i ha fakataha mo e kau faiongoongό ‘i he Fale Fakataha’anga Fā’oneluá kuo faka’ata ai ke fakaava ‘a e ngaahi fakatau’anga kava laiseni kotoa pē, ‘o kau ki ai mo e naiti kalapú, kae pehē ki he ngaahi fai ’anga kava tongá, ka ‘i he ‘aho Falaite pe mo e ‘aho Tokonaki.
Ka kuo pau pe ke kei tauhi pe ‘a e va mama’o (social distancing), pea mo e tokolahi ko e toko 20 ‘i loto pea ke tapuni pe ki mu’a ‘i he taimi fakataputapui ‘a e fe’alu’aki ‘i he po’ulí.
Kuo faka’atā foki ke fakahoko mo e ouau lotu ‘i he ngaahi ‘aho kehé ‘a ia ‘oku fakahoko ‘e he ngaahi siasi ‘e ni’ihi ‘o kau heni ‘a hono faka’atā mo e ma’u kava tali malanga pongipongi Sapate pē.
‘Ikai ke ngata pē aí ka ‘oku faka’atā foki mo e ngaahi fale fakamalohisinό mo e ngāue fakasipotí, kae kei tapui pē ‘a e ngaahi ouau ‘o hangē ko e pingikou mo e ngaahi sipoti ‘oku fetu’utaki ha konga ‘o e sinό.
‘I he ngaahi fakataha’anga fakatokolahí, kuo faka’atā ‘a e ngaahi fakataha’anga fakafiefia hangē ko e mali mo e fai’aho, ka kuopau ke kei muimui pē ki he tu’utu’uni ko e toko 20 ‘i fale pea 40 ‘i tu’a, ‘o ‘ikai kau ki ai ‘a e lotú mo e akό.
