Mapaki e fā kae kei 'alaha: Pekia Palesiteni Mālōlō SUTT Faifekau Lopeti Taufa Featured
27 Novema, 2019. Ko e tā kuo ongo ki he fungavaka 'o e Siasi Uesiliana Tau'atāina 'o Tonga 'a e ui ma'oni 'oni 'a e 'Otua ki he Tangataʻeiki Palesiteni Mālōlō ʻo e siasi Faifekau Lopeti Taufa ʻi Falemahaki Vaiola 'i he pongipongi Sapaté 24 'o Novema.
Ko e pekia 'eni 'a Faifekau Lopeti Taufa 'o Hunga Vava'u kae nofo Havelu 'i hono taʻu 92 hili ha'ane mālōlō mei hono ngaahi fatongia mei he Siasi Uesiliana Tau'atāina 'o Tonga talu mei he ta'u 1998.
Ko Faifekau Lopeti Taufa naʻe hoko ko e Palesiteni ia hono 13 ʻo e Siasi Uesiliana Tauʻataina ʻo Tonga mei he 1993-1998 pea na'a ne toe hoko foki ko e Faifekau Fakatuʻi ki Heʻene ʻAfió, Taufaʻahau Tupou IV lolotonga 'ene hoko koe Palesiteni 'o e SUTT.
Ko e hoko atu ia ʻe Lopeti ʻa e fatongia Palesitení mei a Sione Lepa Toʻa (1992-1993). Hili ʻa e maʻu Ngaue Malōlō ʻa Faifekau Lopeti Taufá ne hoko atu ai ʻa Dr ʻAlifeleti Malakai Mone (1998, 2009), aʻu mai ki he ʻahó ni ko Dr ʻAhio ʻi he fatongiá ni talu mei he 2009.
Naʻe maʻu hoa ʻa Lopeti Taufa kia Mele Simiki kuo ne ʻosi pekia pea na'e 'i ai mo 'ena fanau 'e toko ua 'a ia ko Sela Taufa Latailakepa pea mo Miki Aleamotuʻa.
Na'e ngāue pe 'a Faifekau Lopeti Taufa 'i he siasi 'i he ta'u lahi 'o kau ai 'ene hoko atu 'o fakahoko fatongia 'i he Kolisi Tohitapu 'a e Pasifiki 'i Fisi (Pacific Theological College) pea na'a ne hoko ko e pule 'o e Kolisi Sia'atoutai pehe ki he'ene hoko ko e Sekelitali lahi 'a e SUTT pea ne toki a'usia 'a e lakanga Palesiteni 'o e Siasi 'i he ta'u 1993.
‘Oku'amanaki ke fakahoko 'a e malanga fakamavae mo e mo'unga'i tangata ko'eni 'o e lotu mo e fonua 'i he falelotu SUTT 'o Havelu 'i he 'aho Tu'apuleulu ko hono 28 'o Novema 2019.
'Oku 'ikai ke puli 'a e tou'anga 'a Faifekau Lopeti Taufa 'i he lotu mo e fonua pea 'oku mo'oni ai 'etau lea fakatalutalu "Kuo mapaki e fā kae kei 'alaha".
