Sipoti ke fakatahataha’i ‘ikai koe fakamavahevahe’i: Tō Folofola talitali Timi Mate Ma’a Tonga Featured
Tama Tu'i Tupou VI
16 Nōvema, 2019. Na’e talitali fakafonua pea faka’ilonga’i ‘aki ha ‘aho malōlō faka-Pule’anga ‘a e ikuna kafakafa ‘e he Timi ‘e he Kau To’a Mate Ma’a Tonga ‘a e timi hau Kangaroos ‘a ‘Aositelelia ‘aneafi ‘aho 15 ‘o Nōvema 2019.
Ko e ‘aho ‘o e mavava mo e ma’alali ki he Tonga kotoa pea na’e hā mahino mei he katoanga fiefia ko’eni ‘a e kātoa ‘a e fonua ‘o taha ke faka’ilonga’i ‘a e ikuna kafakafa ko’eni ‘a ia ‘oku ne ‘ave ai ‘a e Piliote ki he tumutumu ‘o e kolope.
Ko e tumu’aki ‘o e fiefia ni ko e Tō Folofola ‘a ‘Ene ‘Ene ‘Afio Tupou VI pea na’e mahino mei heni ko e Tō Folofola ‘a e taki mo’oni ‘i he laumalie 'o e melino mo e fiefia pea hiliō ai 'a e taumu’a ke fakatahataha’i hono kakai.
‘I he Tō Folofola ‘a e Tama na’e fakamahino mei ai ‘a ‘Ene langimama’o mo fakamahino koe sipoti ‘oku taumu’a kene fakatahataha’i (unite) ‘a e kakai ka ‘oku ‘ikai ko hono fakamavahevahe’i (divisions).
Ko e ngāue ma’ongo’onga kuo fakahoko ‘e he fānau va’inga ‘oku ne fakaava ‘a e matapā ki he ngaahi faingamalie pea kene faka’ai’ai ‘a e hakotupu ‘o e fonua kenau muimui ai.
Na’e toe tapou foki ‘i he Tō Folofola ‘a e Tama ki he Timi pehe ki he kakai ‘o e fonua ke tuku ki tafa’aki ‘a e tō kehekehe kae fai ha sio ki he ‘ata fālahi mo e ngaahi faingamalie ‘e lelei melino, tu'uloa mo ma’uma’uluta ai ‘a e fonua pea kene fakatahataha’i ‘a e fonua mo e kakai pea 'ilo ai kitautolu 'i mamani.
“Te tau malava ke fakahoko ‘a e me’a lahi kapau tetau tu’u fakataha ‘o hange kuo fakahaa’i ‘e he Timi ‘Akapulu Liiki ko’eni kiate kitautolu” koe konga ia ‘o e Tō Folofola ‘a e Tama Tu’i.
Na'a toe ha foki 'i he Tō Folofola 'a hono fakakau mai 'a kinautolu mei he timi mo e kau 'ofisiale ki he lisi 'o e kau ma'u metali fakalangilangi kuo foaki mei he 'Ene 'Afio 'a ia na'e fakahoko foki moe foaki metali fakalangilangi koia 'aneafi.
Na'e faka'osi 'aki 'a e Tō Folofola 'a e Tama mei he folofola tohi 'a Hepelu Vahe 12 Veesi 14:"Feinga ke mou nofo melino mo e kakai kotoa pe. Pea mou mo'ui ma'oni'oni. He ka 'ikai, pea 'e 'ikai te mou mamata ki he 'Eiki".
Ko e fekau mahu’inga ‘eni kuo tuku mei he Taloni ki he fonua pea koe makatu’unga fefeka ‘eni ke hoko atu kiai ‘a e ngāue ‘a e Pule’anga pea ke fakatahataha’i ‘a e Tonga ‘i he malumalu ‘o e fuka ‘i he laumalie ‘o e melino mo e fiefia.
