Pekia ‘Eiki Palēmia Samuela ‘Akilsi Pohiva 'i hono ta'u 78 Featured
Pekia ‘Eiki Palēmia Samuela ‘Akilsi Pohiva
12 Sepitema, 2019. Kuo ma’u ‘a e fakahā kuo pekia ‘a e ‘Eiki Palēmia Samuela ‘Akilsi Pohiva ‘i he Falemahaki Mercy 'i ‘Aokalani Nu’usila ‘i he pongipongi ‘o e ‘aho ni 12 ‘o Sepitema 2019.
Na’e fakafolau fakavavevave fakafaito’o foki ‘a e ‘Eiki Palēmia ‘i he ho’atā ‘aneafi makatu’unga ‘i ha tu’unga fakatu’utāmaki na’e a’u kiai ‘e ne mo’ui.
Ko e fakamatala kuo ma'u 'oku pehe pekia ko'eni 'a e ‘Eiki Palēmia makatu'unga mei he niumonia na'a ne 'ohofia hono sino.
Ko e pekia ‘eni ‘a e ‘Eiki Palēmia Samuela ‘Akilsi Pohiva ‘i hono ta’u 78 pea ‘oku mahino 'oku te'eki ke faka'ofisiale hano talaki faka-Pule'anga 'a e pulonga ko'eni kuo tō 'i he fonua.
'Oku ‘amanaki ke toki ‘oatu mo muimui'i 'e he ongoongo ni ‘a e ngaahi fakaikiiki fekau'aki mo e taufa kafakafa ko'eni kuo a'usia 'e he fonua.
