Tō Folofola 'a 'Ene 'Afio Tupou VI 'i hono huufi 'a e Faka'ali'ali Ngoue 'a e Vahefonua Vava'u 2019 ^Featured

Ko e tuku fonua ē na’e fai ki langi ‘oku kei taa’imalie ai ‘a e ‘otu Tonga.

Ko e tapuaki ‘oku ‘inasi lahi taha ai ‘a e Vahe Fonuá ni ‘i he kakaí, kelekelé, ‘ātakaí, ‘i ‘ōsení mo hono ngaahi faka’ofo’ofá mo e koloa fakaenatula.

Ko ‘etau tali pē fakataha mo e motu’a ko Taumālolo, fakafeta’i e ma’u koloa!

Tapu mo ‘Ulukalala mo e fakataha’angá ni kae fai ha lea ki he kātōanga faka’ali’ali ngoué, toutaí, takimamatá, pea mo e fefakatau’aki ‘a Vava’ú ‘i he 2019.

‘Oku kamata ‘a e mo’ui leleí mei he fakatupu ‘o e me’atokoni ‘oku fakatupu mo’ui leleí koe’uhí ‘oku hokohoko atu pē ‘a e feliliuaki ‘a e ‘eá.

Ko ia, ‘oku fiema’u ia ketau filio’i ‘etau fakatupu ‘a e koloa kotoa pē. ‘Oku toe mafana ange ‘a e ‘ea ‘o e mamaní pea ‘oku totonu leva ketau vakai ki he ngaahi pulopula ‘e mo’uí pe tene matu’uaki ‘a e mafana ko ia ‘o e ‘eá.

‘I he a’u ‘a e fua mafana ki he tikili ‘e 35, ‘e ‘ikai leva ke fua e koane iá. ‘I he a’u ki he tikilī ‘e 39, ‘e ‘ikai leva ke foha ‘a e ‘ufi iá, ka ‘i he toe mafana ange ‘a e ‘eá, na’e lava pē ke toe lahi ange ‘a e foha ‘o e manioké ka ‘oku holo leva hono ivi ki he ma’u me’atokoni.

‘E lava pe ketau feliliuaki ke tō ‘a e ngaahi fua ‘oku nounou ange ‘a e vaha’a taimi ke motu’a ai kimu’a ‘i he utu ta’u hāngē ko e ngaahi vesitapoló mo e fa’ahinga ‘o e piiní ‘a ē ‘oku fakatupu mo’ui lelei ange. ‘I he founga ko ení, ‘e lava leva ketau ma’u ha ngaahi fua ‘e ua pE tolu ‘i he ta’u.

Ko Vava’ú ni ‘oku lahi taha ai e tō e kava ‘i Tongá ni, pea toki ua ki ai ‘a e vanilá ‘a ia ‘oku mahanga ai mo ‘Eua. ‘Oku lelei ‘aupito eni ki he fakatupu koloa komesialé, ka ‘oku totonu ke toe tō pē mo e me’atokoni ki he ma’u me’atokoni ‘a e familí koe’uhí ka ‘ikai pea he’ikai ke palanisi lelei e fakamaketí ka ‘e toe hiki lahi leva e totongi ia ‘o e me’atokoni.

Kapau tetau filifili pe fakalahi ‘o e ngaahi fa’ahinga kehekehe ‘o e monumanu ke tauhí pea ‘e lava leva ke toe ma’ama’a ange ‘a e kakano’i manú pea pēhē ki he malu ‘a e pa’anga muli ‘a ia ‘e lava ke faka’aonga’i ki he ngaahi fiema’u fakafaito’o mo fakaakó.

‘Oku malava ke tokoni’i ‘e he pule’anga e fakatupu koloa ko iá ke fetongi ‘aki ‘a e hū koloa mei mulí hāngē ko e pa’anga ‘e nimangofulu miliona ‘oku fakamoleki ‘i he ta’u ki he hū koloa me’akai mei muli.

‘E lava ke ngāue’aki ‘a e pa’anga ko iá ke tokoni’i ‘a e fakatupu koloa fakalotofonua pe ko e ngaahi sikolasipi ki he fiema’u vivili ki he mo’uí ‘o hāngē ko e kau mataotao he faito’ó pea pehē ki he ngaahi naunau fakafaito’o.

‘E lava leva ‘i he founga ko ení ketau pule’i mo ‘ilo ki he me’atokoni ‘oku fafanga ‘aki ‘etau fanga monumanú pea ke ma’u ha ola ‘oku toe lelei ange ki he mo’uí kae ‘ikai ko e fakafalala pē ki he koloa ‘oku fakatupu mo hū mai mei mulí ‘a ia ‘oku ‘uhinga ‘aupito ‘a e lea Tonga ‘To’u Kai mo hono Lohu’.

Ko e me’a tepū ko e fetongitongi ‘o e fakatupu koloa ‘i he fa’ahinga kehekehe ‘o fakatatau ki he feliliuaki ‘a e ‘ea. Manatu’i ‘oku ‘i ai pē ‘a e faingamālie ki he liliu.

‘Oku ou fakamālō atu ki he fepoupouakí mo e ngāue fakataha ‘a e kupu kotoa ‘o e vahe fonuá ni ‘oku ne fakamanatu mai ‘a e laumālie ‘o e tau tahí ketau lava pé ke matu’uaki ‘a e feliliuaki ‘a e ‘ea, ko e fili fakaonopooni ia ‘o Tonga ‘i he ‘ahó ni.

‘Ofa atu Vava’u.