'A'ahi mai ki Tonga ni Pilinisi Kalauni ‘o Norway Featured
Pilinisi Kalauni ‘o Norway Haakon Magnus mo Pilinisi Ata
7 ‘Epeleli, 2019. Na’e tu’uta mai ‘i he ho’atā ‘o e ‘'aho Falaite 5 'Epeleli ki he Mala’e Vakapuna Fakavaha’anga Pule’anga Fua’amotu ‘a e Pilinisi Kalauni ‘o Norway Haakon Magnus.
Na’e kau ‘i he folau mai mo e Pilinisi Haakon ‘a e Minisitā ‘a Norway ki he Fakalakalaka Fakavaha’a Pule’angá Dag-Inge Ulstein.
Ko e taumu’a ‘o e ‘a’ahi ko ení ke fakamalohia ‘a e vā fengāue’aki ‘a Norway pea mo e ngaahi fonua he Pasifiki Sauté ke faka’ai’ai ‘a e fepoupou’akí ‘i he ngaahi ‘īsiu ‘oku tui tatau ai ‘a e ongo fonuá ‘i he Pule’anga Fakatahatahá pea mo e ngaahi fengāue’aki fakavaha’a pule’anga ‘i he ngaahi kaveinga ‘o hangē ko e feliuliuaki ‘o e ‘ea, ‘ōsení, melinó pea mo e malú.
Na’e talitali ‘a e Tama Pilinisí ‘e he Tama ko Pilinisi Ata, Pilinisi Tu’ipelehake, ‘Eiki Tokoni Palēmiá mo e Minisitā ki he Ngaahi Ngāue Lalahi mo e Takimamatá Semisi Sika, Sekelitali ‘a e Potungāue ki Mulí Mahe Tupouniua pea mo e Sekelitali Lahi mo e Sekelitali ki Kapinetí Edgar Cocker.
‘E fakahoko a hono talitali ‘o Pilinisi Kalauni Haakon ‘i Polata’ane ‘aki ha ouau taumafa ‘i he efiafi ‘tatau ai pe ‘a ia ‘e ‘afio ai ‘a ‘Ene ‘Afifió Tama Tu’í Tupou VI pea mo Kuini Nanasipau’u.
Na'e lava lelei ai pe mo e fakataha ‘a e ‘Eiki Tokoni Palēmiá mo e Tama Pilinisi Kalauní 'i he 'aho Tokonaki 6 'Epeleli, kimu’a pea fakahoko ‘a e ‘a’ahi ki he ngaahi feitu’u ‘i he Vāhenga Hihifó ‘oku uesia ‘e he feliuliuaki ‘o e ‘eá ‘a ia ‘oku kau ki ai ‘a Houma, Kolovai pea mo ‘Ahau.
Na'eme’a ai pe 'a e Tama Pilinisí 'i he 'aho Tokonaki 6 'Epeleli ki Fisi pea toki faka’osi ‘ene ‘a’ahí ki Ha’amoa.
