Tu’utu’uni Tama Tu’i ke kamata leva ha ngaue fakavavevave ki he Tohi Tangi ‘a e Kakai. Featured
Tama Tu'i Tupou VI
25 Ma'asi, 2019. Kuo tu’utu’uni ‘a ‘Ene ‘Afio ‘i he Fakataha Tokoni ‘i he ‘aho Tu’apulelulu 21 ‘o Ma’asi 2019 ke kamata leva ‘a e ngaue fakavavevave ‘a e ma’u mafai ki he ngaahi hoha’a ‘a e kakai ‘o e fonua ‘a ia na’e fakafou atu ‘i he Tohi Tangi ‘e 3 ki he ‘Ene ‘Afio ‘i he ‘aho 18 ‘o Fepueli 2019.
Ko e tu’utu’uni ko’eni ‘a e Tama Tu’i ‘i he Fakataha Tokoni na’e anga pehe ni leva:
[a] Ke tuku atu ‘a e ngaahi Tohi Tangi ni ki he ‘Omipatimeni kene vakai mo ngaue fakavavevave ki ai, kene fakahoko ha ngaahi fakatotolo ‘oku ne pehe ‘oku fe’unga mo taau ke fakahoko pea mo fai ha’ane fakakaukau aofangatuku fekau’aki mo ha ngaue ‘e ‘ikai hoa mo e fakapule’i ngaue lelei tene ma’u mei he’ene fakatotolo koia pea toki lipooti ki he ‘Ene ‘Afio.
[b] Ke tu’utu’uni ki he Pule’anga kenau ngaue fakavavevave ki hano fakapa’anga fe’unga ha Komisoni ki he Fakafepaki’i ‘o e Ta’efaitotonu ke kamata fakahoko fatongia ‘i he ‘aho 1 ‘o Siulai 2019 ‘o kau ai mo e vahenga ‘o ha Komisiona ke ‘i ha tu’unga vahenga fakakamaau ke tali ‘e he ‘Ene ‘Afio; pea,
[c] Ke tuku atu ‘a e ngaahi Tohi Tangi ni ki he ‘Ateni Seniale mo e Talekita ki he Ngaahi Talatalaaki Hia ‘a e Pule’anga, pea mo e Komisiona Polisi ke fakahoko ha fakatotolo ‘o taumu’a;
[i] ke fai ha faka’ilo ‘o kapau kuo maumau’i ‘a e Lao ki he Ngaahi Hia pea ‘oku ‘i ai mo ha tu’unga fakamo’oni fe’unga ke fai ha faka’ilo;
[ii] ke fai ha ‘eke pe hopo sivile ‘oku taau ke pouaki ‘a e ngeia mo e molumalu ‘o e Konisitutone mo e Lao ‘o Tonga;
Pea mo fale’i ki he ‘Ene ‘Afio, mei he taimi ki he taimi, felave’i mo e tu’unga ‘oku ‘i ai ‘a e ngaue ni.
‘Oku toe mahino mai foki koe tali ‘eni ‘a ‘Ene ‘Afio ‘i he Fakataha Tokoni pea na’e makatu’unga ‘i ha fale’i fakataimi mei ha Komiti Fakafakamaau ‘a e Fakataha Tokoni pea mo ha Fale’i Fakalao mei he ‘Ateni Seniale Le’ole’o ‘o hange koia na’e ‘osi fakaha mai pe ki mu’a ki he Komiti Fakafonua ki hono Fakafepaki’i ‘o e Faihala mei he Tauhi Sila Fakatu’i ‘a ‘Ene ‘Afio (Lord Privy Seal).
Fakatatau ki he fakamatala ‘a William Clive Edwards mei he Komiti Fakafonua ki hono Fakafepaki’i ‘a e Faihala (KFFF) ‘oku hounga kiate kinautolu mo e Komiti pehe ki he kakai tokolahi na’a nau fakamo’oni mo poupou ki he Tohi Tangi ko’eni ‘a e tali kuo fakahoko mei he Tama Tu’i ‘i he ‘Ene Fakataha Tokoni.
‘I he lau ‘a Edwards ‘oku ne pehe koe tali matu’aki fakapotopoto, faka-Kalisitiane mo fakafiefia ‘eni he ‘oku mahino mai ‘oku fakahoko ‘a e ngaue ki he hoha’a ‘a e kakai ‘o hono fonua pea koe ngaue koia ‘oku mahino mai ‘oku fakavavevave.
Na’e toe pehe foki ‘e Edwards ‘oku mahino mei he tali ‘a e Tama Tu’i koe kamata pe ‘eni ‘a e ngaue pea ‘oku te’eki ke aofangatuku he kuo fakamahino mai ‘oku kei fiema’u ‘e he Tama Tu’i ke lipooti ange ‘a e ola ‘o e ngaahi ngaue ‘e fakahoko.
‘Oku ‘ikai ngata ai ‘oku te’eki ke maau ange mo e fale’i mei he Komiti Fakatotolo mo Fakama’opo’opo ‘o e Ngaue Hohoko mo e Tala ‘o e Fonua ki he Komiti Fakafakamaau ‘a e Fakataha Tokoni fekau’aki mo e ngahai Tohi Tangi ‘i ‘olunga moha fakahinohino kau ki he anga faka-Tonga pe tukufakaholo ‘a ia ‘e toki fakahoko ha tu’utu’uni kiai ‘a e ‘Ene ‘Afio ‘i he Fakataha Tokoni ka hoko.
Na’e hoko ‘a Edwards ‘o pehe ‘oku mahino mo’oni pe ‘a e langimama’o ‘a e Tama Tu’i pea mo fakahoko ‘Ene Tu’utu’uni ‘i he founga melino mo ma’a ‘a ia ‘e lelei ki he tafa’aki ‘oku launga pehe ki he tafa’aki ‘oku launga’i pea mahulu ange ‘a e si’isi’i ha longoa’a ‘i he fonua.
Na’e aofangatuku ‘aki ‘e Edwards ‘ene fie fakafofonga’i ‘a e fiefia mo e hounga’ia ‘a e KFFF ‘a ia na’a nau tataki ‘a e Tohi Tangi ko’eni mo e fu’u kakai tokolahi na’a nau poupou mo fakamo’oni ki he tangi ko’eni ‘i he mahino koe ngaue ‘eni kuo kamata pea moe ‘amanaki lelei ki ha ola ‘e tokoni ki hono fakafepaki’i ‘a e faihala ‘i he fonua.
8 comments
-
Ke kei faitapuekina, tataki mo malu'i ma'u ai pe 'ehe 'Otua mafimafi 'a 'Ene pain Siaosi Tupou.VI
-
Ko e anga eni 'eku sio vaivai ki he fekau kuo tuku mai 'e he Hau kiate kitautolu kotoa he fonua ni o tatau ai pe pe ko fe tui fakapolitikale pe fakalotu 'oku tau 'iai pea 'oku ou tui koe lelei taha ia ki he'etau nofo pea fielau he koe Pani 'a Sihova. Koe popoaki 'o hono finangalo ke tukuange mu'a ia ke ne tau'ataina mei he Politikale he 'oku 'iai e ngaahi feitu'u totonu ke 'ave kiai e ngaahi me'a 'oku 'ikai totonu.He'ikai mahulu hake ha taha he Lao , 'ave ki he lao ke ne fakatonutonu. Tuku hotau Hau he 'oku 'iai hono ngafa 'oku toe mahulu hake. Ke tu'uloa e Pule 'a Tupou.
-
Spencer W Folau you too smart for them. They they don't want to listen to the truth as they have been brainwashed for so long. Its so sad...
-
The PATOA Facebook page kicked me out today from participating at their page. I assume they did not want me to comment on this particular topic. Facebook group "My Tonga Online Community" introduce the same topic today as being rejected but the King. Why no media outlet tie to Tonga politic is capable of telling the truths. Kuo honge faitotonu a Tonga? Me'a 'oku ou pehe koe fakapiko e lau "'Otua mo Tonga ko hoku tofi'a." 'Oku fai pe e lotu loi kae kei fai lahi ange pe kaka.
-
koe malo ia kapau 'e fai ha ngaue pehe fekau'aki moe ngaahi tohi tangi...'ofa pe ke ma'u e ola lelei ma'ae kakai 'oe fonua kotoa…
-
Ke kei faitapuekina ehe 'Eiki a ene Sevaniti ka ko ene ke Tu'i ki hono kakai o laui kuonga mo laui to'utangata a ene pule.
-
Fakafeta'i
-
Fkmalo lahi heni kihe Langi mama'o a ene Afio Siaosi Tupou VI, ihe ene afioi ae ta'e manonga hono kakai o ne fai ai ene tu'utu'uni Fkpotopoto mo fkkonisitutone ke fai ha ngaue fkvavevave kihe tohi tangi ae kakai oe fonua, fkmalo atu ki ho'o mou ngaue lahi kuo lava. Ma'u ha ofa lahi atu kia kimoutolu pea pehe ki ho tau Hau, King Siaosi Tupou VI, koe Tu'i oe otu Tonga.
Maliki Latai Nikua snr...Batemans Bay NSW australia.