Tālanga fakafonua ki ha palani ki hono tau'i 'o e faito’o konatapu Featured
21 Ma’asi, 2019. ‘Oku lolotonga fakahoko ‘a e tālanga mo e ngaahi kupu fekau’akí ke fokotu’utu’u ha palani ngāue fakafonua ke tau’i ‘aki ‘a e faito’o konatapu ta’e fakalaó ‘o hāngē ko e ‘aisi (ice) ‘i Tonga ni. Na’e fakaava ‘a e talanga ni ‘i he pongipongi ‘o e ‘aho ní ‘i he Hōtele Tanoa ‘e he ‘Eiki Minisitā ki he Potungāue Polisí, Tamate Afí mo e Ngaahi Me’a Fakafokifā´ pēhē foki ki he Potungāue Tānaki Pa’angá mo e Kasitomú Māteni Tapueluelu.
‘Oku fengāue’aki ‘a e Pule’anga Tongá pea mo e Fakataha’anga e Kau Taki ‘o e Pasifikí (PIFS) ke fakahoko ‘a e talanga ni.
‘I hono fakaava ‘o e polokalamá na’e fakahā ai ‘e he ‘Eiki Minisitā ko e taumu’a ‘o e palani ngaue ni ke ne siofi ‘a e ngaahi makatukia’anga pea mo e ngaahi faingamālie ke fakasi’isi’i, faito’o, fakaakeake pea mo fakamalohia ke fakasi’isi’i ‘a e ngaahi nunu’a kovi ‘o e faito’o konatapu ta’efakalaó.
Na’a ne pēhē foki ko e palopalema ‘o e faito’o konatapu ta’efakalaó ‘oku lahi ‘ene ‘así pea ‘oku ‘ikai ke fakangatangata pē ki he Potungaue Polisí ka ko e palopalema fakasōsiale ‘a ia mātu’aki fiema’u ‘a e ngāue fakatahá ke solova.
“’Oku fakamamafa’i ‘e he palopalema ni ‘a e mahu’inga ke ngāue fakataha ‘a e pule’angá, ngaahi kautaha ta’e fakapule’angá, sekitoa taautahá pea mo e ngaahi komiunitī. ‘E ‘ikai lava ‘e he pule’angá pe ko ha potungāue pē ‘e taha ke ne tau’i ‘a e palopalema ni. ‘Oku fiema’u e fonuá kenau tu’u fakataha ke fakafepaki’i ‘a e palopalema ‘oku ‘omai ‘e he faito’o konatapu ta’efakalaó ‘i Tonga ni pea mo e Pasifikí.”
‘Oku vahevahe ‘a e talanga ni ki he ngaahi kulupu ‘e fā ‘a ia ko e kulupu ‘uluakí ‘oku kau ki ai ‘a e kau taki lotú mo e kau taki he ngaahi komiunitī, kau pule fakavahé mo e kau ‘ōfisa koló. Ko e kulupu hono uá ‘oku kau atu ki ai ‘a e sōsaieti sivilé pea mo e ngaahi kulupu ‘a e kakai fefiné. Ko e kulupu hono tolú leva ko e ngaahi kulupu to’utupú pea faka’osí leva ko e kau pisinisí.
- MEIDECC
