Pekia uaifi 'o e Palēmia Neomai Pōhiva Featured
Palēmia Samuela 'Akilisi Pōhiva mo Neomai Pohiva 'i he Falelotu SUTT 'o Sopu 'o Taufa'āhau
18 Tisema, 2018. Kuo ma'u 'e he ongoongo ni ha fakamatala kuo pekia 'a e uaifi 'o e Palēmia Neomai Pōhiva.
Kuo toe fakapapau'i foki mei he ongoongo 'a e Kaniva kuo fakapapau'i mei he Minisitā Polisi Mateni Tapueluelu 'a ia ko e husepaniti ia 'o e 'ofefine 'o e Palēmia na'e pekia 'a Neomai 'i he efiafi 'aneafi Mōnite 17 'o Tīsema 2018.
'Oku mahino foki ko e pekia 'eni 'a Neomai 'i hono ta'u 70 pea na'e fuoloa mai 'ene fe'ao mo e fokoutua kanisā.
Ko e me'afaka'eiki foki 'eni 'a e Pule'anga mo e fonua pea 'oku te'eki ke ma'u ha fakamatala kakato ki he polokalama 'o e me'afaka'eiki 'o Neomai.
Kuo kamata ke tukumai 'i he mitia faka-sosiale 'a e ngaahi pōpōaki fiekaungāmamahi fekau'aki mo e pulonga kuo tō tonu 'i he lotofale 'o e Palēmia 'o Tonga.
