Fakafepaki'i hono toe ngaue'aki 'a e milemila pelesitiki - 'No Pelesitiki' ^Featured

Na'e hifoaki foki 'e he kulupu ko'eni 'a 'enau kemipeini 'oku ui ko e "No Pelesitiki" 'a ia ko 'enau faka'ai'ai foki 'eni ke 'oua 'e toe ngaue'aki 'a e milemila pelesitiki.

'Oku poupoua foki 'e he hou'eiki, kau politikale mo e Fale 'o e Tu'i 'a e fakakaukau ko'eni pea kau ki ai mo e ngaahi mision muli 'i Tonga ni hange koe 'Ofisi 'o e Haikomisiona Nu'usila.

Na'e fakamatala foki 'e he taki 'o e kulupu ni 'Eleni Leveni ki he ngaahi kautaha ongoongo koe founga 'eni ke foki ai ki he ngahai kato faka-Tonga 'o hange koe 'oa moe kato lalanga mei he lou niu mo e lou'akau.

'Oku pehe foki 'e Leveni koe founga totonu 'eni kene fetongi hono ngaue'aki 'o e milemila pea 'oku manakoa.

'I he fakamatala 'a Leveni na'a nau kamata hifoaki 'a e fakakaukau ko'eni 'i he 'aho Monite pea na'e 'osi katoa 'enau ngaahi kato 'o kau ai 'enau ngaahi 'oa mo e kato faka-Tonga hono fakatau.

'Oku pehe 'e Leveni 'oku lahi 'a e ngaahi 'ota mai ki he'enau ngaahi kato pea 'oku ne faka'aiai 'a e kakai 'o e fonua mo e to'utupu kenau poupou 'a e "No Pelesitiki" pe ko hono fakafepaki'i 'o e pelesitiki.

'Oku toe tapou foki 'a e kulupu ni ki he kau ma'u mafai pehe ki he kau fa'u tu'utu'uni kenau poupou ki hono fakangata 'a hono ngaue'aki 'o e milemila pelesitiki 'i he fonua ni.

Kuo nga'unu atu foki 'a e ngaahii fonua lahi 'o e Pasifiki pea taki mai 'e Nu'usila 'o kau ai 'a Vanuatu ki hono ta'ofi hano toe ngaue'aki 'o e ngaahi milemila pelesitiki 'i he fonua pea 'oku makatu'unga foki 'eni 'i he 'uli ki he 'atakai pea toe fakatu'utamaki ki he mo'ui 'a e kakai.

'E tokoni foki 'eni ki hono toe ngaue'aki 'etau ngaahi kato tu'u fonua 'a ia 'oku lalanga mei he louniu mo e lou'akau pea koe ma'u'anga mo'ui lelei foki 'eni tukukehe ange ai 'ene ma'a 'a e 'atakai.