Fakamo'oni Va Fengaue'aki Pacific China Friendship Association mo e Pacific Islands Development Forum ^Featured

Ko e Pilinisesi Pule Pilinisesi Sãlote Mafile’o Pilolevu Tuita na’e fakamo’oni hingoa ma’a e PCFA ‘i hono lakanga ko e ‘Eiki Pataloni, pea ko Misa Francois Martel na’e fakamo’oni hingoa ma’a e PIDF, ‘i ho no lakanga ko e Sekelitali Seniale.

Na’e ‘i he ouau fakamo’oni ‘o e Aleapaú ni foki ‘a Misa Michael Gong, ko e fakafofonga ia mo e ‘Amipasitoa e Kautaha ‘a e Kakai ‘o Siainá ki he Anga’ofa Fakakaume’a mo e Ngaahi Fonua mulí (pe Chinese People’s Association for Friendship with Foreign CountriesCPAFFC).

Na’e ‘i ai foki mo e fakafofonga me i he ‘Amipasitoa ‘o Siaina ki Fisí, mo ha ni’ihi ‘oku nau fekau’aki tonu mo e aleapau kuo fakahokó.

‘Oku fakamahino he Aleapau Fengãue’aki ‘a e ngaahi ‘ēlia tefito ‘o e fengãue’aki ’a ia te ne tataki e PIDF mo e PCFA ke a’usia ‘ena ngaahi kaveinga ngãue he Aleapaú.

Na’e to e fakataha foki e kau fakafofonga ‘o e PIDF mo e PCFA he ‘aho 14 ‘o Sepitema 2018, ke alea’i hano founga ke fakahoko ‘aki e Aleapaú, pea ke a’usia e ngaahi taumu’a ngãue ‘a e ongo kautahá ni.

Ne fakakaukau’i foki ‘e he fakatahá ni ke hokohoko atu e fetu’utaki mo e Lepapilika ‘o Siainá ki ha taumu’a fengãue’aki ‘i he malumalu e founga ngãue ki he fetokoni’akï he pōto’i ‘ilõ, vahevahe ma’u’anga fakamatala mo e tekinolosiá, ‘o a’u ki hono fakapa’anga e ngaahi poloseki vivili ‘i he Pasifiki fekau’aki mo hono hakeaki’i e tu’unga masivesiva e kakai ‘o e Pasifiki pea pehe ki hono tauhi ke malu ange mei he ngaahi uesai fakanatula ‘oku hoko ko e pole lahi ki he ngaahi fonua ‘o e Pasifiki (pe South-South Cooperation).

Hiliange ha ngaahi alēlea ki ha ngaahi founga ngãue ke fakahoko’aki e ngaahi taumu’a e Aleapaú, ne tu’utu’uni leva ‘e he Fakatahá ‘a e ngaahi tefito’i fatongia ko ‘enī ke kamata’aki ‘enau ngãué:

1. ’E hoko atu ai pē ki he kaha’ú na,’i he malumalu e Aleapaú ‘a e palani leva ‘a e ongo kautahá ni (PIDF & PCFA), ke na ngãue fakataha ki ha ngaahi fatongia pe kaveinga teuaki tokamu’a, ’o fakatefito hano fekumi ki he ngaahi taumu’a ngãue ke fakamo’oni’i hono mahu’inga ke fakahokó.

2. Ka ‘i he taimí ni ‘e siofi leva ‘e he PIDF mo e PCFA e ngaahi ‘ēlia ko ení:

i. Ke fekumi leva ha feitu’u ke tu’u ai ha ‘ulu’i ‘ōfisi e ongo kautahá ni, pea ta’etotongi foki ‘o ‘ikai ha’ana fakamole ki ai.

ii. Ke ngãue’aki ‘e he PCFA hono ngaahi ‘ōfisí ke tokonia e PIDF, he ngaahi fetu’utaki ‘ena fengãue’aki kotoa pē.

iii. Ke alea’i mo fokotu’utu’u leva ke fakahoko ha akongãue mei he ‘aho 17,18,19 ‘o ‘Okatopa 2018 fekau’aki mo ha palani fetokoni’aki pea, na’a lava e kau takī ke tokonia ha ngaahi kautaha fakafeitu’u fekau’aki mo e kaveinga ngãue ‘a e PIDF mo e PCFA, ke langa’i ai ha tokangaekina ‘e he ngaahi fonua e Pasifiká mo ‘Ēsiá.

3. ’E fakataha fakamãhina ono (6) e PIDF mo e PCFA, tukukehe ka ai ha ‘uhinga mamafa pea ui leva ha fakataha, ke vakaia e tu’unga ivi ngãue ‘a e ongo kautahá ‘o fakahoa ki he Aleapaú.

4. Na’e fakahoko foki ‘e he Sekelitali Seniale ‘a e PIDF, ko Francois Martel ‘a ‘ene fakamãlõ loto hounga’ia mo’oni kia Pilinisesi Salote Mafile’o Pilolevu Tuita, he fakataha lelei kuo kamatá, pea ke hokohoko atu e fetu’utaki vãofi ko iá mo tulituli ki hono ngaahi kaveingá.

5. Na’e fakahoko foki ‘e he Palesiteni ‘a e PCFA, Toketa Hiria Ottino, ‘a e fakamãlõ e ‘Eiki Pataloni ki he PIDF ‘i he ‘enau sio loloa ki he kaveinga fengaue’aki ni, ma’ae lelei fakalukufa ‘a e kakai ‘o e Pasifiki.

Na’e faka’osi e fakatahá ‘aki e fakatu’amelie lahi ‘o fakatefito he Palani Aleapau Fengãue’aki ‘a e PIDF mo e PCFA kuo lava hono fakatoká.