Ma‘a Lahi mo Masani Atu Faka‘ali‘ali Ngoue Fakatu‘i ‘a e ‘Otu Ha‘apai mo e Fo‘i ‘One‘one Featured
Lotolotonga ‘a e ha’ele mo ‘afio ‘a e Tama Tu’i Tupou VI ki he mahu ‘a e fua ‘o e fonua mo e pakeina ‘a e toutai mo e nimamana mo e nimamea’a ‘a e tangata mo fafine
24 Sune, 2018. Na‘e hoko atu ‘a e ‘otu katoanga ‘a e ‘Otu Ha‘apai mo e Fo‘i ‘One‘one ‘oku fakahuafa ko e fakamanatu mo e ma‘alali ‘a e ‘Aho ‘Alo‘i ‘o e “Tu‘i Ha‘apai” mo e “Katoanga Ha‘apai Masani 2018” he ‘aho 17 ‘o Sune ki he ‘aho 4 ‘o Siulai 2018 ki he Faka‘ali‘ali Ngoue Fakatu‘i 2018 na’e fai he ‘aho Tokonaki 23 ‘i Pangai, Ha‘apai, ‘a ia na‘e ha‘elea mo hūfia he‘ene ‘Afio Tama Tu‘i ko Tupou VI.
Na‘e fakatefua he kātoanga ‘a e hou‘eiki mo e kau fakaafe tokolahi mei Tonga kotoa, pea pehē ki he kau minisita 'o e kapineti mo e kau faifekau ‘o e ngaahi siasi mo e kāinga tokolahi ‘o tukukehe ange ‘a e kau fa‘a mo e kau toutaiika ka e ‘uma‘a ‘a e kau ‘ātisi tufunga mo e nimamea‘a na‘e faka‘ali‘ali ai ai ‘a e fua ‘o e fonua mo ngatai honau nimamana mo e nimamea‘a mo e ngaahi me‘a kehekehe.
Neongo ‘a e holongā ‘a e ngaahi me‘a kehekehe he faka‘ali‘ali ka na‘e to e fakaholomamata mo kinokinoifia tofu ‘a e nimamana mo e nimamea‘a ‘o e kau ‘ātisi, ‘o hangē ko e ongo palepale ‘o e lālanga mo e koka‘anga ‘a e fefine Ha‘apai mo e pākeina ‘o e mata‘u ‘a e tangata toutaiika ‘a e Fo‘i ‘One‘one ‘ene mohu mo fonu he ko e mālohinga ia ‘o e ‘Otu Ha’apai mo Ha‘apai Veu.
