Uekasopu & Poloseki Ako He 'Aati 'a Tonga Ma'ae Kau 'Atisi Tonga Featured
'Ata: Kau ngaue 'a e Tonga Skills fakataha mo e tokolahi 'o e kau 'atisi Tonga. Otu mu'a, mei m-h: Hufanga Palofesa Dr 'Okusitino Mahina (fika 2), 'Emeline Tuita (3), Andrew Ford (4), Uili Lousi (5), Dr 'Uhilamoelangi Fasi (6), Sione Fonua (8). Nonga Soakai, Puleako, Fokololo (mei mui tu'a 'o 'Emeline Tuita), Benjamin Work ('otu mui).
30 May, 2018. Na'e lava lelei hono fakaava 'a e uekasopu mo e poloseki ako mo e fekumi he 'aati 'a Tonga ma'ae kau 'atisi Tonga he Fale 'o Tonga he Fanga 'o Pilolevu 'i Nuku'alofa 'i Tonga'eiki / Tongatapu / Tongalahi 'e he Haikomisona 'Aositelelia 'a Andrew Ford he 'aho Tusite 29 'o Me 2018.
'Oku fai 'a e uekasopu 'e he Uili Lousi Art Studio mo e Tonga Skills mo fakapa'anga 'e he 'Emipesi 'a 'Aositelelia he'ene polokalama AusAid tokoni ki muli, 'a ia 'e fe'unga hono loloa mo e mahina 'e taha, 'o hoko atu he uike kaha'u ki 'Eua mo Vava'u mo Ha'a ki he faka'osinga 'o Sune.
Na'e fakahoko 'a e lea talitali 'e he Talekita 'o e Tonga Skills 'a Dr 'Uhilamoelangi Fasi moe lea fakafe'iloaki 'e he Talekita 'o e Uili Lousi Art Studio ko Uili Lousi pea toki fakaava 'e he Haikomisoni 'Aositelelia ko Andrew Ford fakataha mo 'ene lea mo fai 'a e lea fakamalo 'e he Talekita 'o e Potungaue Takimamata ko 'Emeline Tuita.
Na'e taumu'a 'a e uekasopu mo e poloseki ako mo e fekumi he 'aati 'a Tonga ke hiki 'a e tu'unga 'ilo mo e poto mo e ngaue faka'aati 'a e kau 'atisi Tonga he funga 'o e ako mo e fekumi ke lava ke nau vaa'ivaka he levolo fakamamanilahi, mo lava ke fakapa'anga 'enau ngaue he founga fakapisinisi.
Na'e fakaafe'i mai ha kau 'atisi 'iloa mei Nu'usila ko Kosipeli Talia mo Benjamin Work fakataha mo e 'atisi, 'akatemika mo e 'aati mo e litileli kilitiki ko Hufanga Palofesa Dr 'Okusitino Mahina ke nau fai ha ngaahi lea tefito mo e ako mo e kau 'atisi, pea 'ikai ngata ai ka 'oku to e kau 'a Hufanga Palofesa Dr Mahina hono fakahoko 'a e poloseki 'aati.
