Ma’u tofua’a ‘e 4 kuo ‘osi fana’i ‘o mate kotoa ‘i ‘Ata ^Featured

Ko e motu foki ko ‘Ata na’e angamaheni ‘aki mei fuoloa ‘ene ‘i he malumalu ‘o e Potungāue Pilīsone pea na’e tuku mai foki ‘a e ngaahi ‘ata ‘o e tofua’a ko’eni ‘e 4 na’e ma’u kuo nau ‘osi mate ‘i he motu ni.

‘I he fakamatala ‘a e ‘Ofisa Sela ma’olunga ko Kolianita Feke ‘i hono lipooti ‘e he ongoongo ‘a e senolo 7 (7 News) ‘a ‘Aositelēlia na’e pehē ‘e Feke na’e ‘ilonga pe ‘a e ava ‘i he ‘ulu ‘o e katoa ‘o e tofua’a ko’eni ‘e 4 ‘a ia na’e mahino ko hono fana’i kinautolu ‘aki ha me’afana.

Na’e ‘ikai foki ke tui ‘a Feke koe fanga ki’i ‘uhiki’i tofua’a ‘eni ‘o fakatatau ki honau lalahi ka na’e faka’ikai’i ‘eni ‘e he mataotao mei ‘Aositelēlia ko Vanessa Pirotta ‘a ia ‘oku lolotonga fakahoko ‘e ne fakatotolo ki hono mata’itohi Toketā (PhD) ‘i he fekumi ki he tofua’a ‘i he Macquarie University.

‘I he fakamatala ‘a Pirotta koe kalasi eni ia ‘o e tofua’a ‘oku ui ko e pilot whales ‘a ia ‘oku ‘ikai kenau fu’u lalahi fefe pea ‘oku ‘ikai fo’ou ‘enau ‘asi ‘i he ngaahi potu tahi ‘o e Pasifiki.

Na’ e talu foki hono ta’ofi ‘a hono toutai’i ‘o e tofua’a ‘i Tonga ni ‘i he ta’u 1978 pea ‘oku fakamea’pango’ia ‘a kinautolu na’e ‘i he motu ni he ngaue pango ko’eni kuo fakahoko ki he fanga tofua’a ko’eni na’e ma’u kuo nau mate.

Na’e ma’u foki ‘a e tofua’a kalasi ko’eni ko e pilot whales ‘e 140 kuo nau mate he matātahi Hamelin Bay ‘i he Saute ‘o Perth ‘i he mahina ‘e 2 kuo hili atu.

‘I he mahina ko Fepueli ‘o e ta’u kuo’osi 2017 na’e ma’u ai ‘a e tofua’a ‘i he kalasi pe ko’eni pilot whales ‘e 600 na’a nau hake ‘i he taha pe ‘o e ngaahi matāfanga ‘o e Motu Saute ‘o Nu’usila.