Faka’ali’ali Vakapuna tō tahi ‘oku ‘amanaki ‘e tokoni ki he ngaahi ‘otu motu ‘o Tonga Featured
Vakapuna Kodiak 100
18 Siulai, 2017. ‘Oku ‘i ai ‘a e ‘amanaki ‘e hoko ai pe ‘a e vīsone mo e ‘amanaki kuo tataki ‘e he ‘Eiki Kōvana Vava’u mo e Ongo Niua ke ngāue’aki ‘a e vakapuna to tahi Kodiak 100 ki hono fakahoko ‘a e fefononga’aki vakapuna ki he ongo motu mama’o.
Na’e fakaafe’i foki ‘e he ‘Eiki Kōvana ‘a e Kautaha ko e Setouchi Holdings Inc. mei Siapani ‘a ia koe kautaha ‘oku ‘a kinautolu ‘a e vakapuna Kodiak 100.
Na’e pau ai ke puna mai ‘a e vakapuna ni mei Nu’usila ‘o tu’uta ‘i Vava’u ‘i he uike kuo ‘osi Tusite 11 ‘o Siulai ke faka’ali’ali ‘a e ngaahi lavame’a ‘a e fa’ahinga kalasi vakapuna ko’eni pea mo e malava ke tokoni ki he tu’unga fefononga’aki ‘i he ‘ea ‘i he fonua.
Ko e kalasi vakapuna ko'eni 'oku fo'u 'ehe kautaha 'Amelika ko e Quest Aircraft pea na'e fuofua puna 'a e kalasi ko'eni 'i he ta'u 2008.
Fakatatau ki he fakamatala ‘a e ongoongo ‘a e Matangitonga na’e folau mai he vakapuna ni ‘a Dr Go Okazaki, Talēkita Pule ‘o e Setouchi Holdings Inc., Tenshin Yazawa, Talēkita ki he Pacific International Ltd ‘a ia koe fakafofonga ia ‘o e kautaha ‘i Tonga ni pea mo e tangata pailate ko John Goulet.
Nae puna foki vakapuna ni ‘o fakahoko ‘a e ngaahi tesi ‘i Niua Toputapu mo Niuafo’ou pea mahino mei ai ‘a e’ene malava ke tō ‘i ‘uta mo tahi. Na’e kau ai ‘ene tō mo puna mei he Vailahi ‘i Niua Fo’ou pehē foki ki he tafa’aki ‘oku tu’u ai ‘a e uafu Falehau ‘i Niua Fo’ou.
Na’e toe faka’ali’ali foki ‘a e vakapuna ni ‘i he Taulanga Puatalefusi. ‘Oku mahino ‘e malava ke tokoni ‘a e vakapuna ki he ‘otu motu ‘oku ‘ikai ‘i ai ha mala’e vakapuna ‘oku kau ai ‘a e ‘otu motu ‘o Ha’apai.
‘I he fakamatala ‘a e ongoongo ‘a e Matangitonga na’e kau atu ai pe ‘a e kau pasese ‘o e vakapuna ni ‘o taki ‘e he ‘Eiki Kōvana Vava’u ki he Faka’aliali Ngoue ‘a Niua Toputapu pea na’e fe’iloaki ai ‘a e kau folau mo e Tama Tu’i Tupou Vi.
Na’e mokoi ‘Ene ‘Afio ki he fakakaukau ko’eni moe ‘amanaki ‘e tokoni ki hono langa e ‘ikonomika ‘o e fonua ‘o tauatau tefito ki he Takimamata.
‘Oku toe kau kiai ‘a e mahu’inga ke fetuku ‘a e tokoni ki he ngaahi ‘otu motu mama’o he taimi ‘oku fiema’u ai mo e tokoni ki he kau mahaki ‘oku fiema’u ha tokoni falavavevave kiai.
‘Oku te’eki ke mahino ha taimi ‘e fakahoko ai e sevesi ko’eni ka ‘oku ‘i ai ‘a e fakaangaanga ‘e ngali ke kamata ‘i Siulai 2018.
2 comments
-
Koe lave i olunga oku ne fkmanatu e kii mea tatau ne talanoa mai hee motua eku fae. Naa nau alu holo he ngaahi vaka toutai he 60 moe 70 tau. Nau afe atu i Tofua o ta tapaka, au atu ki niua ta tapaka koe tapaka kotoa a e motua apaplangi hala pe ha ilo ia koe maliuana o fkfolau atu ki Ausie ta ne fuoloa kaliu ene takai ana he fonua ni kae pehe tokua koe tupu lelei e toutai pea puli atu aii pe kautaha ni mei Tonga ni.
-
Na'e 'osi 'iai e ki'i vakapuna totahi na'e fa'a puna ki Niuafo'ou koaa pe ko Tofua he ngaahi ta'u ki mu'a atu. Toki ma'u ki mui ta koee 'oku 'iai e ki'i ngoue maliuana ia 'ae pailate mo 'ene kau tama he motu. Taimi pe na'e 'ilo ai e maliuana koe hola ai pe ia 'ae ki'i pailate mo 'ene ki'i vakapuna mei Tonga ni 'o pulia ai pe.
Vakai'i atu moe kau 'ai vakapuna ko eni na'a 'oku 'iai mo ha ki'i 'asenita kehe ia hange koe ki'i 'uluaki vakapuna moe kau 'alu 'iote.