Fu’u ‘ilonga ‘a e lahi ‘a e me’alele ‘i he fonua ^Featured

‘Oku ‘ilonga lahi ‘eni ‘i he taimi pongipongi ‘i he ngaahi ‘aho anga maheni ‘oku fai ai ‘a e ngāue pea kuo ‘alu ‘eni ‘a e kiu ‘a e ngaahi me’a lele ‘o hange koia ‘oku hoko ‘i he ngaahi fonua muli.

Ko e Hala Taufa’ahau ‘oku kamata pe kiu ‘i he taimi pongipongi ‘o fakafuofua ki he va’aha ‘o e 8:00 am pongipongi mo e 9:00 am pea ‘oku kamata mai pe mei Veitongo ‘a ia ko e faka’ilonga ia ‘o e lahi ‘a e me’alele.

‘Oku toe malava ke tala ‘i he fika lēsisita ‘o e ngaahi me’alele ‘o fakatātā ‘aki ‘a e kalasi me’alele ‘oku laiseni C kuo ‘ova hake ‘i he mata’i fika 20000 pea ‘oku tele ofi hake ai ‘a e fika ‘i he kalasi L.

Neongo ‘oku ‘i ai ‘a e ngaahi me’alele ia kuo ‘ikai toe ngāue ka ‘oku tala ‘ehe fika lēsisita ‘a e lahi ‘o e fika ‘oku a’u kiai ‘a e ngaahi me’alele ‘i he fonua.

Ko e faka’ilonga ‘eni ‘oku tu’unga lelei ‘a e tu’unga fakapa’anga ‘a e kakai pea ‘oku ‘ikai ke lau kiai ‘a e ngaahi me’alele koe me’a’ofa mo e foaki mei honau ngaahi famili mei muli.

‘Oku mahino pe ‘oku ‘i ai ‘a e ngaahi fokotu’utu’u ‘a e Pule’anga ki he me’a ni he kuo kamata ke ‘ilonga mai pea kuo kamata ke hoko koe palopalema ki he fefononga'aki.

‘I he lau ‘a e taha ‘o e kau ngāue faka-Pule’anga ‘oku nofo ‘i vahe Hahake kuo pau kenau mavahe ‘i he laini ‘o e 7 ki he haafe ‘a e 8 pongipongi kae malava kenau ma’u mai ‘a e ngāue ‘i he taimi haafe ‘a e 9 pongipongi makatu’unga ‘i he kiu mo e toe māmālie ange ‘a e fononga ‘a e ngaahi me’alele.