Fakahaofi mo’ui kau toutai Fonoi ‘e toko 6 na’e mole ^Featured

Ko e toko ono ko’eni na’e ‘amanaki honau ngaahi fāmili tenau foki ki Fonoi he pō Tūsite 23 ka na’e ‘ikai ke hoko ‘eni.

Na’e lipooti foki ki he Potungāue Polisi ‘a e me’a ni pea na’e fai ai ‘a e ui tokoni ki he senitā fekumi mo fakahaofi a Nu’usila (New Zealand Rescue Co-ordination Centre) mo e Va’a Le’o Tahi ‘a e Pule’anga ‘Amelika (United States Coastguard).

Na’e ma’u ai ‘a e faingamalie ‘o e Vakapuna Hercule ‘a e Va’a Le’o Tahi ‘a e Pule’anga ‘Amelika (United States Coastguard) hili ha’a ne foki mei ha’ane kau atu kiha konifelenisi ‘i Nu’usila ki he Fekumi mo e Fakahaofi ‘i Tahi ke tokoni ki he ui tokoni mei Tonga ni.

Na’e ma’u ai ‘e he vakapuna ni ‘a e feitu’u na’e ‘i ai ‘a e toko 6 ko’eni ‘anepō pea fakahaofi kinautolu ‘e he Vakatau ‘a e Kautau ‘Ene Afio ‘i he pongipongi ‘o e ‘aho ni.

Kuo fakatokanga mamafa ai ‘a e Komisiona Polisi Stephen Caldwell ki he kakai ‘o e fonua kenau toe tokanga ange tautau tefito ki he kau toutai pea mateuteu ‘a e ngaahi naunau totonu ki he fakahaofi mo’ui.

‘Oku ‘ikai foki ke fa’a laua ‘a e pa’anga ‘oku fakamole ki he fekumi ko’eni ka ‘oku tau taa’i malie ‘i he tokoni ‘a e ngaahi Pule’anga muli pea ‘oku totonu ketau toe fakapotopoto ange.