Ma'u mo'ui e tangata 'Eua na'e mole 'i tahi Featured
25 'Epeleli, 2017. Ko e ongoongo fakafiefia ia hono toe ma'u mo'ui 'a e tangata 'Eua na'e mole 'i tahi talu mei he efiafi Tokonaki 22 'Epeleli, 2017.
'I ha fakamatala mei he senitā fakahaofi mo'ui 'a Nu'usila (New Zealand Rescue Co-ordination Centre) ki he Letio Nu'usila na'e ma'u 'a e tangata ni fakafuofua ki he taimi 2:00 efiafi 'o e 'aho ni 'e he vakapuna tau Orion 'a e Laulāpuna 'a Nu'usila.
Na'e ma'u foki 'a e tangata ni 'oku ta'alo hake mei he ki'i vaka fakahaofi mo'ui (life raft) fakafuofua ki he kilomita 'e 13 mei he Tonga-Hahake 'o 'Eua. Koe tangata ni foki na'e folau he vaka misini mei Manuka ki 'Eua ka 'oku te'eki mahino mai ha fakamatala ki he tu'unga 'o e vaka misini.
Ko e folau mai foki 'a e vakapuna tau Orion 'a e Laulāpuna 'a Nu'usila makatu'unga 'i he kole mei he Potungāue Polisi 'a Tonga pea 'oku anga maheni 'aki pe foki 'a e polokalama fetokoni'aki ko'eni 'o talu mei mu'a.
