Fakafoki ki Tonga toko ua ko e hola he toli Featured
Ko e ongo tama hola. 'Ata mei he Tonganow Online Community
21 'Epeleli, 2017. “‘Oku ma fu’u matu’aki fakatomala kuo mole a feingamalie,” koe talaloto ia ‘a e ongo matāpule Tonga na’a na hola mei Hastings lolotonga ia ‘ena folau mai he polokalama toli (RSE) ki he ongoongo ‘a e Kaniva.
Na’e hola foki ‘a e tokoua ko’eni mei Hastings ‘i he ‘aho Monite ‘o e uike ni pea na’e iku kumi ‘o ma’u mai kinaua ki he ‘api ‘i Manurewa ‘i he Saute ‘o ‘Aokalani ‘i he pongipongi ‘o e ‘aho ni pea kuo papau ai pe ‘e fakafoki kinau ki Tonga he ‘aho ni.
Ko e tokoua ko’eni ko Sitiveni Junior Uasi pea mo Atonio Patua Kulitapa ‘a ia na’a hola mai he me’alele ‘a e kautaha na’a na ngaue kiai.
Na’e fakahoko foki ‘a e fakataha he ‘aho ni ‘a e ngaahi kupu fekau’aki ‘i he mala’evakapuna ‘Aokalani pea fakaha mahino ai pe kihe ongo pau’u ni ‘e fakaheka ai pe kinaua ki Tonga he ‘aho ni.
Ko e fakataha ko’eni na’e kau kiai ‘a e Pule Leipa ‘a e Mr. Apple Alistair Jamieson, Fakafofonga Pule’anga Tonga, Sefita Hao’uli, Fakafofonga Tonga ‘a e RSE ‘i Hawkes Bay Tevita Niulata, mo e toko 4 ‘o e kau taki Kulupu Tonga ‘a e RSE (RSE Tongan group leaders) pea kau atu kiai ‘a Uasi mo Kulitapa.
Na’e fakaha foki ‘ehe ongo tama ni ki he ngaahi kautaha ongoongo ‘oku na faka’amu mai na’e toe ‘oange mo’o kinaua ha toe faingamalie ka koe pango kuo mahua e ipu.
‘I he fakamatala ‘a e taha ‘o e kau taki kulupu Sifa Havili na’e ‘aho ua enau kumi ‘a e ongo tama ni pehe ki he me’alele ‘a e kautaha.
Ko e me’a pe na’e mahino na’e ki he kau kumi na’e ‘ikai ‘ilo ‘e he ongo hola ni ‘a ‘Aokalani pea ‘ikai kena ‘ilo pe koe fe feitu’u na’e li’aki ai ‘a e me’alele ‘a e kautaha ni
Ko ‘etau toki situ’a atu ‘eni mei he kole fakamamate ‘a e Palemia kia Manuofetoa ‘a ia na’e hola he ngaahi uike kuo maliu atu ‘i he tu’uta ‘enau kulupu toli he mala’evakapuna ‘Aokalani ka ko’eni kuo toe hola moe toko ua ia ko’eni.
‘Oku mahino mai ‘i hono ‘oatu ‘o e ongoongo ni na’e fakafoki ai pe 'a e tokoua ni ki Tonga 'i he ho’ata ‘o e 'aho ni.
3 comments
-
peheange mai nae iai pe ha ngaue'anga ia i tonga ni ke nofo pe ai e sii tamaiki koeni o kumi haa nau moui pea fakasiisii etau fakama ki mamani ee
-
Sai pe he 'oku tu'umalie pe hona famili 'o kinaua.
-
Faka'ofa koe 'atamai e tamaiki 'ikai kenau sio ki he faingamalie pea ngaue 'aonga 'aki. 'Ikai ketau kei 'ilo pe angafefe hano toe fakapoto'i 'a e fa'ahinga ta'ehounga'ia pehe ni. Kapau kuo na fakatomala pea 'oua 'e toe hoko 'i ha fa'ahinga faingamalie tena toe fou ai. 'Oku mahino pe he'ikai toe tali kinaua ha folau toli.