Muimui Folau ‘a e ‘Ōfisi ‘Omipatimeni 'i he Maa’imoa Faka’ali’ali Ngoue 2019 ki Tokelau Featured
Nanise Fifita mo Pilimisolo Tamo'ua mo e timi mei he 'Ofisi 'Omipatimeni 'i he Faka'ali'ali Ngoue 'a e Vahefonua Vava'u
20 Siulai, 2019. Ko e taha ‘o e ngaahi me’a na’e makehe ange ai ‘a e faka’ali’ali ngoue ‘o e ta’u ni ko e fuofua taimi ‘eni ki he ‘Ōfisi ‘o e ‘Omipatimení ke nau muimui ‘i he Maa’imoa Faka’ali’ali Ngoue ‘o e ta’u ni ‘o a’u ki Tokelau ke nau kau fakataha pea mo e sekitoa ngoué, toutaí, takimamatá pēhē ki he ngäue fakamea’á pea mo e ngaahi pisinisi kehekehe ‘i he fonuá.
‘I he fakamatala ‘a e ‘Ofisa Pule ‘o e Va’a Fakatotolo ‘a e ‘Ōfisi ‘o e ‘Omipatimeni Tongá, Pilimisolo Tāmo’ua, neongo ‘oku nau ‘osi fakahoko fatongia pē ki Ha’apai pea mo Vava’u ‘i hono tu’uaki atu ‘a e taumu’a ngäue ‘a e ‘Omipatimení ki hono faka’ai’ai ‘o e pule leleí ‘i he founga ngäue ‘oku fakahoko ‘e he pule’angá pea mo ‘ene founga fai tu’utu’uní.
“’Oku ‘i ai ‘a e fiefia lahi ‘i he faingamälie pehé ni, ‘oku mau ‘īnasi ai ke mau omi ‘o faka’ali’ali fakataha ‘emau ki’i ngäué mo tu’uaki atu ‘a e fa’ahinga sēvesi ko ení ki he kakaí. Fakataha pē ‘a ‘etau langa fakalakalaká ka ko e me’a tēpū ‘i he anga ‘o ‘emau fakakaukaú ‘oku ö fakataha ‘a e langá pea mo e ngaahi makatu’unga mālohi ‘o e anga totonú ‘o e fakahoko fatongiá, fakahoko taimi totonu ‘o e fai tu’utu’uní mo e ngäue.”
“’Oku mau ‘osi ha’u pe mautolu he taimi kehe pea mo e ngaahi taumu’a kehekehe ‘i he ngaahi pisinisi ‘a e pule’angá ki he ngaahi potungäué, ngaahi akó pea mo e ngaahi koló. Ka ko e faingamälie ko eni ‘i he ngaahi Faka’ali’ali Ngoué ‘oku kehe ia. Ko e fo’i ‘aho ‘e taha pe ua ‘oku tau fakataha ai he mala’e Niponí ‘i he ‘ahó ni.”
Taimi tatau na’a ne fakahä foki ‘a e mafana makehe ‘oku nau a’usia ‘i he ‘ahia ‘e he ‘Ene ‘Afió ‘a ‘enau tēpilé pea mo e ki’i taimi ne folofola ange aí makatu’unga pē ‘i he muimui folau ‘a e ‘ōfisí ki he ngaahi Maa’imoa Faka’ali’ali Ngoue.
“’Oku hanga atu mei heni ki he Ongo Niuá, ke fakaa’u ai pē ‘a e kaveinga tatau. Pea ko Niuafo’ou foki ‘oku te’eki ke tu’uta ai ha taha ‘i he ‘Omipatimení ke fai ‘a e ngäue ko ení ka ‘o kapau ‘e lava ‘eni, ko e fuofua taimi eni ke mau a’u ai ki Niuafo’ou.”
- MEIDECC
