Ola lelei fakataha ‘a e Pule‘anga Tonga mo e kāinga Tonga ‘o Pilisipeini ^Featured

Na‘e fakafofonga‘i ‘a e ‘Eiki Palēmia ‘o Tonga´ ko Samiuela ‘Akilisi Pōhiva ‘e he Sekelitali Pule mo e Sekelitali ki he Kapineti´ mei he ‘Ōfisi ‘o e Palēmia ‘o Tonga´ ko ‘Etika Koka pehē ki he Tokoni Sekelitali ko ‘Ofa Fīnau.

Na‘a´ na lava mai ki he kolomu‘a ‘o e vahefonua la‘ala‘āina (Sunshine State) ke kau atu ki ha fakataha fakavaha‘apule‘anga ma‘ae kau sekelitali ki he kapineti ‘o e tukui fonua ‘o e Pasifiki´, ‘a ia na‘e fakahoko ki Pilisipeini pea na‘a´ na loto lelei ke ngāue‘aki ai pē ‘a e
faingamālie ke fakahoko ha fepōtalanoa‘aki mo e ni‘ihi ‘o e komiuniti ‘a e kāinga Tonga nofo
Kuinisilani.

Ko e ‘asenita na‘e fokotu‘utu‘u ‘e ‘Etika mo ‘Ofa na‘e pehē ni:

1. Ngaahi fokotu‘utu‘u ‘a e Pule‘anga Tonga ki he ta‘u ‘e 5 ka hoko mai´;

2. Ngaahi fokotu‘utu‘u ‘a e Pule‘anga Tonga ke fakatupu ‘a e ‘ekonomika ‘o e fonua´;

3. Ngaahi felotoi mo e ngaahi taumu‘a faka-politikale´;

4. Ngaahi faingamālie pisinisi ‘i Tonga;

5. Ngaahi fakalakalaka ‘i he sekitoa taautaha´;

6. Palopalema ‘o e faito‘o kona tapu ‘i Tonga.

Na‘e fakahoko ‘a e fakataha ko‘eni´ ki he ‘apisiasi ‘o e Siasi Fakatahataha ‘a e kakai Tonga (Park Church) ‘i Highgate Hill pea na‘e lotu kamata ‘a e Tokoni Palesiteni ‘o e kōmiti ma‘ae komiuniti ‘a e kāinga Tonga ‘i Pilisipeini´ (Brisbane Tongan Community - BTC) ko Faifekau
Suli Helu, ‘a ia na‘a´ ne fakamālō ki he kau fakafofonga mei he Pule‘anga Tonga´ ‘ena tuku taimi ke fe‘iloaki mo e komiuniti Tonga ‘i he kamata‘anga koia ‘o e Uike Tapu ki he ta‘u´ ni.

Ko e ongo kaveinga na‘e lahi hono tālanga‘i ko e mo‘ui lelei ‘a e kakai ‘o Tonga´ pea mo e ako´, ka ko e kaveinga na‘e lahitaha hono tālanga‘i ‘e he kāinga´ ko e palopalema koia ‘o e faito‘o kona tapu ‘i Tonga´, kae tautautefito ki he feinga ‘a e Pule‘anga Tonga ke fakafepaki‘i
‘a e tufaki koia ‘o e ‘aisi´ pea mo e maliuana´.

“Kuo hoko ‘a e palopalema ‘o e faito‘o kona tapu ‘i Tonga ko ha palopalema fakatu‘utāmaki ‘aupito ki he fonua´ pea kuo pau ke mau ma‘u mai ha femahino‘aki kuo‘osi ‘iai ha palani ‘a e Pule‘anga Tonga ke fakafepaki‘i hono tufaki ‘o e faito‘o kona tapu ‘i Tonga´ pea ‘ikai ke ngata
ai´ ka ko e hā ‘a e tupu‘anga hono ngāue‘aki ‘e hotau kakai ‘a e faito‘o kona tapu´,” ko e lau ia ‘a Toakase Layt mei he komiuniti Tonga´.

Na‘e pehē foki ‘e Sela Fonua, “Hangē nai ‘oku ‘ikai pē ke tupu e ‘ekonomika ‘o Tonga pea ka tu‘u ha pisinisi, taimi si‘i pē kuo mate ‘a e pisinisi koia´. Ka ko e me‘a lelei ‘oku ngāue ‘a e Pule‘anga Tonga ke faka‘ai‘ai ‘a e kakai ke fokotu‘u hanau pisinisi ‘i Tonga ke tokoni ki hono
fakalakalaka mo fakatupu ‘a e ‘ekonomika ‘o Tonga, neongo ko e fonua si‘isi‘i ‘a Tonga´.”

Na‘e mavahe e kau folau mei Pilisipeini he ‘aho ‘e taha ‘o hoko atu ‘ena folau ki Nu‘u Sila ke ‘ahia e ‘Eiki Palēmia ko ‘Akilisi Pōhiva, ‘a ia ‘oku ne lolotonga ‘a‘ahi ki he toketā ‘i ‘Aokilani, ki mu‘a pea´ na foki atu ki Tonga.