Hoha'a Ateni Seniale ngaahi fakamatala felave’i mo e pekia 'a Sione Feimoefiafi ^Featured

'Oku totonu ke mahino’i kakato ‘e he kakai kuo hanga ‘e he Kau Polisi Tonga ‘o fakaha ‘i he ‘aho Pulelulu 6 Fepueli 2019 kuo nau faka’ilo ‘a e ni’ihi ‘i he Fakamaau’anga Polisi ki hono fakapoongi ‘o Sione Feimoefiafi, pea ko e ngaahi faka’ilo ni ‘oku malava ke fakahoko ‘a e hopo ‘i he Fakamaau’anga Lahi ‘i he kaha’u.

Kuo a’u ‘a e ngaahi fakamatala ki he kakai ki ha tu’unga ‘oku malava ke faka’ilo hia ‘a e ni’ihi na’a nau fakahoko ‘a e ngaahi fakamatala ni ki he ‘ulungaanga ta’efaka’apa’apa ki he Fakamaau’anga, pe ki he hia ko e kaunoa ta’etotonu ‘i he ngaue ‘a e Fakamaau’anga ‘o maumau ai ‘a e kupu 65 ‘o e Lao ki he Ngaahi Hia, pe ki he hia ko e tuku atu ha ngaahi tohi fakamanamana ki he famili ‘o e kau faka’iloa, tautautefito ki he fanau ‘o e kau faka’iloa, maumau ai ‘a e kupu 111 ‘o e Lao ki he Ngaahi Hia.

Ko hono ‘aofangatuku pe ko e kau faka’iloa ni na’a nau fakatupu ‘a e pekia ‘a Sione Feimoefiafi ‘o fakatatau pea mo e lao ‘o Tonga, ko e fatongia faka-Konisitutone mo faka-lao ia ‘a e Ngaahi Fakamaau’anga ‘o Tonga, pea ‘ikai ko ha to e taha kehe.

‘Oku ‘ikai ‘aupito ko ha me’a ia ‘a e kakai ke nau tu’utu’uni ko hai na’a ne fakatupu fakatatau ki he lao, ‘a e mate ‘a Sione Feimoefiafi, pea ke fakaha ia ‘i he letio, ngaahi nusipepa, ‘initatnei pe ‘i ha fepotalanoa’aki.

Ko e tu’utu’uni koia ‘e fakahoko ia ‘i he Fakamaau’anga Lao, ‘i hano fakamaau’i ‘e ha fakamaau tau’ataina, pea mo ha sula tau’ataina, kapau ‘e fili ki ai ‘a e kau faka’iloa.

Koia ai ‘oku faka’amu ‘a e ‘Ofisi ‘o e ‘Ateni Seniale ke fale’i ki he kakai kenau kataki ‘o ngaue’aki ‘a e fakama’uma’u, pea ke nau faka’ehi’ehi ke nau fakahoko ha fakamatala ki he kakai felave’i pea mo e ngaahi mo’oni’i me’a na’e hoko ‘o fakatupu ai ‘a e pekia ‘a Sione Feimoefiafi.

Ko e ngaahi fakamatala ki he kakai ‘oku hoko ko e ‘ulungaanga ta’efaka’apa’apa ki he Fakamaau’anga ‘oku kau ai ‘a e ngaahi fakamatala ki he kakai ‘oku ‘i ai ‘a e fakatu’utamaki lahi ke kau noa pea mo e ngaahi fakahoko fatongia mo e ngaahi ngaue ; ‘a e Fakamaau’anga ke ne fakahoko totonu mo lelei ‘a e fakamaau totonu.

‘Oku kau foki, pea tautautefito ki he me’a ko’eni na’e hoko, ‘a e ngaahi fakamatala te ne malava ke fakaloto’i ‘a e kakai, ‘a ia ‘e malava ke fili kinautolu ko e kau sula ke nau fai fakama’opo’opo ‘a e ngaahi me’a na’e hoko, pea mo fakahoko ‘a e tu’utu’uni felave’i pea mo e tu’unga halaia, ke nau ma’u ha loto taufehi’a pe faka’ofa’ia felave’i pea mo e ni’ihi na’a nau kau ki he me’a ko’eni na’e hoko.

‘Oku mateuteu ‘a e ‘Ofisi ‘o e ‘Ateni Seniale ke faka’ilo hia ha taha pe ‘oku ne fakahoko ha fakamatala ‘oku ne tui ko e fakahoko ‘a e ‘ulungaanga ta’efaka’apa’apa ki he Fakamaau’anga, pe ko e hia ko e kaunoa ta’etotonu ‘i he ngaue ‘a e Fakamaau’anga ‘o maumau’i ai ‘a e kupu 65 ‘o e Lao ki he Ngaahi Hia, pe ko e hia ko e tuku atu ha ngaahi tohi fakamana maumau ai ‘a e kupu 111 ‘o e Lao ki he Ngaahi Hia.

‘Oku ‘oatu ai ‘a e kole ki he kakai ke nau fakamo’oni ‘oku kei pule ‘a e lao ‘i Tonga ni, pea ko kitautolo kotoa, ko e fonua, ‘oku tau faka’apa’apa’i mo malu’i ‘a e tau’ataina ‘a e Fakamaau’anga, pea mo e totonu ‘a e kau faka’iloa kotoa pe kuo faka’ilo ki he Fakamaau’anga ki he fakamaau’i tau’ataina, neongo ‘a e mafatukituki ‘a e ngaahi hia kuo faka’ilo’aki kinautolu.