Fili ‘Ofa Fa’anunu ke Palesiteni ‘i he Kautaha Fakafeitu’u ‘Esia mo e Pasifikí ki he Fakamatala ‘Ea Featured
Talēkita ‘o e Potungāue Fakamatala ‘Ea ‘a Tonga, ‘Ofa Fa’anunu
17 ‘Okatopa, 2018. Kuo fili ‘a e Talēkita ‘o e Potungāue Fakamatala ‘Ea ‘a Tonga, ‘Ofa Fa’anunu ke ne hoko ko e Palesiteni ‘i he Kautaha Fakafeitu’u ‘Esia mo e Pasifikí ki he Fakamatala ‘Ea, ‘i he ta’u ‘e 4 ka hoko mai, ‘o ne hoko ai ko e fuofua Tonga ke ne ma’u ‘a e lakangá ni.
Ko e hoko ‘eni ‘a ‘Ofa Fa’anunu ko e Palesiteni, lolotonga ia ‘a hono fakahoko mai ki Nuku’alofá ni ‘a e Fakataha Fakafeitu’u ‘a e Kautaha Fakamatala’ea ‘a e Pule’anga Fakatahataha ‘a Māmani(WMO), ‘a ia na’e kamata ‘i he uike kuo ‘osí.
Fakatatau ki he Pule Lahi ‘a e Potungāue MEIDECC Paula Ma’u, ko e fuofua ‘asenita ‘eni ‘o e Fakataha Fakafeitu’u ‘a e Kautaha Fakamatala’ea ‘a e Pule’anga Fakatahataha ‘a Mamani ‘i he pongipongi ‘aneafi, 16 ‘Okatopa, ko hono fili ‘o e Palesiteni.
Na’e tokotaha pē ‘a e Kanititeiti ki he Palesiteni ko ‘Ofa Fa’anunu. Na’e tuku mai he Sea ‘a e faingamālie ka na’e ‘ikai ke toe fokotu’u atu mo ha Kanititeiti ia.
‘I he fakamatala ‘a e Pule Lahi ‘a e Potungāue MEIDECC ko ha ongoongo fakafiefia ‘eni ki Tonga ni. Na’e ‘oatu aipē ‘a ‘ene talamonū ki he Palesiteni kuo filí ki he fatongia ‘oku ‘amanaki ke ne hoko ki ai.
Na’e fakamālo’ia aipē ‘e he Palesiteni kuo fili, ‘Ofa Fa’anunu ‘a e Sea, ka e pehē ki he kau ma’u fakataha ‘i he tuku mai ‘enau falala ke tataki ‘e Tonga ‘a e Kautaha Fakafeitu’u ki he Fakamatala ‘Ea ‘a e Pule’anga Fakatahataha ‘a māmani ‘i he ta’u ‘e 4 ka hoko mai.
Kuo ‘osi fakahoko atu aipē mo e talamonū ‘a e ‘Eiki Palemia Hon. ‘Akilisi Pohiva mo e Minisitā ‘a e Potungāue MEIDECC Hon. Poasi Tei, kia ‘Ofa Fa’anunu ‘i he mahino ‘a e falala’anga mo e ngāue tōtōivi kuo ne fakahoko ki he fakalakalaka ‘a e Fakamatala’ea, ‘o ‘ikai ngata pē ‘i Tonga ni ka e pehē foki ki he ‘ēlia fakafeitu’u ‘a ‘Esia mo e Pasifikí, ‘o a’u atu foki ki māmani lahi.
-MEIDECC
