Pailate’i ‘o e Poloseki ke One Way Hala Vaha’akolo ^Featured

Ko e taumu’a mo e faka’amu ‘o e fokotu’u ko ‘eni, ke fakasi’isi’i e kiu ‘a e hala pule’anga tautautefito ‘i he taimi pongipongi ‘i he fononga ki he ako mo e ngaue pea ke kei malu aipe mo hao ‘a e fefononga’aki he hala pule’anga mei he Vahe Hahake.

Ko e fakakaukau ‘o e ngaue ni, ke ngaue’aki ‘a e Hala Vaha’akolo ko e Hala One Way, mei he sipa’ila ‘i Tofoa ki he mangafā ‘i he ‘Apiako Polisi Longolongo Mei he taimi 7:00am – 9:00am pongipongi he ‘aho Monite ki he Falaite kotoa.

‘Oku fai mo e fengau’aki vaofi mo e Potungaue Polisi, kae lava ke a’u ‘a e faka’amu mo e fakakaukau ko ‘eni.

'Oku ‘osi kamata ke ngaue atu ‘a e Pule lahi ‘o e Potungaue, Ringo Fa’oliu mo e Va’a Fefononga’aki Hala Pule’anga ke fakahoko ‘a e talatalanoa mo e ngaahi kolo takatakai ‘i he Hala Vaha’akolo pea mo tuku atu ‘i he televisone ‘a e fo’i vitio ke mahino ki he kakai ‘o e fonua ‘a e fakakaukau fo’ou ko ‘eni.

Ne kamata’i ‘e he kainga ‘o Koheleti, ‘i Tofoa, ‘a e polokalama talatalanoa ko ‘eni pea ‘oku ‘i ai e ‘amanaki lelei ki he ngaue ‘oku ‘amanaki fakahoko.

‘Oku tokoni lahi ‘aupito mo poupou mai ki he fokotu’u fakakaukau ko ‘eni ‘a e Potungaue Polisi va’a fefononga’aki hala pule’anga.

Ki hono ngaahi fakaikiiki fetu’utaki kia Tevita Lavemai, Talekita ‘o e Va’a Fefononga’aki Hala Pule’anga,

-MOI