Fakamalo’ia ‘e he Palemia 'a e Tokoni Afaa Mei he Kakai ‘o Mundubbera Featured
‘Eiki Palemia, Samuela ‘Akilisi Pohiva, Tokoni Pulekolo ‘o Mundubbera, Kiunisilani, Cr. Faye Whelan.
3 July, 2018. Na’e fakamalo’ia ‘e he ‘Eiki Palemia, Samuela ‘Akilisi Pohiva, ‘a e tokoni afaa mei he kakai ‘o e kolo ‘oku tu’u ‘i Kinisilani, ko Munduberra, lolotonga ‘ena fakataha mo e Tokoni Pulekolo ‘o Mundubbera, Faye Whelan, ‘i he ‘Ofisi Palemia he ‘aho 2 ‘o ‘Aokosi 2018.
‘Oku ‘i Tonga ni foki ‘a e Tokoni Pulekolo, Faye Whelan, mei he ‘aho 31 ‘o Siulai ki he ‘aho 7 ‘o ‘Aokosi, ke tufa e naunau fakame’atokoni mo e faito’o fakafalemahaki,naunau ako, mo e naunau langa, na’e kumi’aki e pa’anga na’e foaki ‘e he kakai ‘o Mundubbera ‘’i ha’anau feinga pa’anga ke tokoni ki ngaahi famili masiva ‘i Tonga na’e uesia honau ngaahi nofo’anga mo ‘enau ngaahi ma’u’anga mo’ui ‘e he Saikolone ko Gita ‘I Fepueli ‘o e ta’u ni. ‘
Na’e me’a e ‘Eiki Palemia ‘o pehe, “’Oku ou hounga’ia ‘aupito Tokoni Pulekolo Whelan ‘i ho’o taki’i hono uki e kakai ‘o Munduberra kenau foaki e ngaahi pa’anga lahi ke kumi’aki e me’atokoni mo e ngaahi naunau kehekehe kuo ke folau mai moia ke tufa he kakai ‘o Tonga ni. Kataki ‘o fakahoko atu ki he kakai ‘o Mundubbera, ‘oku hounga’ia ‘a e Pule’anga mo e kakai ‘o Tonga ‘i he ’enau ‘ofa ‘aufuatoo kuo fai. Malo ‘aupito.”
Ko e tokolahi ‘o Mundubera ko e toko 1,261 pea ‘oku tu’u ia he vahefonua ko North Bennet ‘i Kuinisilani, fe’unga nai mo ha kilomita ‘e 400 ki he tokelau-hihifo ‘o e kolomu’a ko Brisbane.
‘Oku taku foki ‘e he kakai ‘o Mundubbera ko honau kolo ko e “Kolomu’a ia ‘oe Moli”, ka na’e pehe ‘e he Tokoni Pulekolo, ‘oku nau toe ngoue’i mo e mango, blueberry pea mo e kalepi ‘oku fakataumu’a ki he ma’ume’atokoni. Na’e toe pehe foki ‘e he Tokoni Pulekolo na’e fuofua tu’uta ange ki Mundubbera ‘ae kau nague tolifo’i’akau mei Tonga ni he 2009.
Na’a nau toko 30 pe ka ‘i he ‘aho ni kuo nau a’u ‘o toko 300, tukukeheange e ngaahi famili Tonga e 15 nai ‘oku nau ‘osi nofo fonua he kolo.
Na’e fakamatala e Tokoni Pulekolo ‘o pehe ‘oku ongo’i ‘e he kakai ‘o Mundubbera ‘oku ‘iai honau fu’u mo’ua ki he kaungaue tolifo’i’akau mei Tonga ni he na’e hoko e fu’u fakatamaki he 2013 ‘o tafea ai honau kolo pea na’e a’u ki he vahetolu ‘e taha ‘o e ngaahi ‘api nofo’anga na’e meleuku he tafea ko eni. “Ko e kau ngaue tolifo’i’akau mei Tonga ni na’a nau fakahaofi e ngaahi famili mei honau tukui ‘api mo ’enau ngaahi nga’oto’ota. ‘Okapau na’e ‘ikai kenau kapa mai ‘o tokoni, ko e faka’ofa ee ka ko mautolu!,” ko ‘ene fakamatala ia.
‘I he ‘ene lea fakamalo, ne’a pehe ‘e he Tokoni Pulekolo, “Ko e momeniti na’a mau fanongo ai he maumau na’e fakahoko ‘e Gita, na’a mau pehe, ‘’E anga fefee ha’atau tokoni?’ Ko e ki’i tokoni ko ia kuo mau folau mai moia koe ki’i me’avalevale ka ‘oku ne fakafofonga’i atu ‘emau hounga’ia he tokoni lahi ki Mundubbera, ‘a e kau tolifo’i’akau mei Tonga ni kae’um’aa e kainga Tonga kuo nofonua homau kolo. Ko ‘emau toka’i mai ia ‘enau ‘ofa ‘i Munduberra mo hono kakai”.
‘Oku tufa e tokoni afaa mei Mundubbera ki he ngaahi famili ‘i Popua, Patangata, Nukuleka, pea mo e ki’i ‘apiako kinitakateni ‘i Mau’fanga fakatatau ki he fale’i mei he Potungaue Ngaahi Ngaue Fakalotofonua pea mo e ‘Ofisi ‘o e Talafekaulahi ‘a Tonga ki ‘Aositelelia ‘oku tu’u ‘i Kenipela.
