“Holoa Tu'unga 'o e Ako 'i Tonga: 'Eiki Minisita Ako 'Akilisi Pohiva” ^Featured

Na’e makatu’unga eni ‘i hono ‘analaiso ‘o e ngaahi fakamatala fakasitetisitika, kamata mei he 2002 ki he 2014, ‘a ia ‘oku tauhi pe ‘i he Potungaue Ako. Na’e mahino mei he ‘analaiso koeni, ‘a e holo ‘a e ola ‘o e sivi ‘a e fanau ako mei he Kalasi Taha (1) ki he Foomu Fitu (7).  Na’e toe me’a ‘a e ‘Eiki Palemia mo e ‘Eiki Minisita Ako mo Akongaue ‘o fakaha ko e pa’anga ‘e laui miliona kuo fakamole ki he feinga ke fakalakalaka ‘a e ako ‘i he vaha’a taimi tatau ‘o e hōloa ko eni.

Fakatatau ki he me’a ‘a e ‘Eiki Palemia mo e ‘Eiki Minisita Ako mo Akongaue Hon. Samuela ‘Akilisi Pohiva, ko e talu hono tukuatu ‘o e fakamatala ongoongo ‘o e ‘aho 8 Sepitema 2015 mo e te’eki ke ‘omai ‘e ha taha ha tali.  Tautautefito ki he ni’ihi ko eni kuo na’u ‘asi mai ‘o fehu’ia ‘a e fakahoko fatongia ‘a e ‘Eiki Palemia mo e ‘Eiki Minisita Ako mo Akongaue.  Na’e tukuaki’i ‘e Dr. ‘Ana Taufe’ulungaki ‘oku ‘ikai mahino ki he ‘Eiki Palemia moe ‘Eiki Minisita Ako mo Akongaue ‘ene ngaue ‘oku fai, pea ‘oku uesia ai ‘a e Potungaue.

Koe fakamatala koeni ‘oku ta’emo’oni, fakataumu’a ke tukuhifo ‘a e ‘Eiki Palemia mo e ‘Eiki Minisita Ako mo Akongaue, pea ha sino mai ai ‘a e ta’efaka’apa’apa lahi ki he kakai na’a nau falala mo fili ‘a e ‘Eiki Palemia ‘o Tonga ka ko e ‘Eiki Minisita Ako mo Akongaue ia ‘o e ‘aho ni, Hon. Samuela ‘Akilisi Pohiva.  ‘Oku ‘ilo’i lelei pe ‘e ‘Ana, ko e tu’unga Minisitaa ‘oku fakapolitikale pea faitu’utu’uni ‘i he levolo fakapolisi (strategic policy) ma’ae kakai ‘oe fonua.  Pea ‘oku ‘i ai leva ‘a e kau ngaue kuo ‘osi teu’i ‘ihe ngaahi Potungaue kehekehe ‘a e Pule’anga, kau ai ‘a e Potungaue Ako mo e Akongaue, ke nau fakahoko ‘a e ngaahi tu’utu’uni fakapolisi ko ia.  ‘I he’ene pehee, ‘oku taau ke ‘oange ha faingamalie ‘o e ‘Eiki Minisita Ako mo Akongaue kuo fili ‘e he kakai, ke fakahoko ‘ene ngaahi fokotu’utu’uu ‘o hange pe ko e faingamalie ne ‘oange kia ‘Ana neongo na’e ‘ikai fili ‘e he kakai.

Ko e fakamatala na’e tukuatu ‘e he ‘Eiki Minisita Ako mo Ako Ngaue ‘i he ‘aho 8 Sepitema 2015 ‘oku ne tuhu’i hangatonu atu ai ‘a e tefito’i vaivai’anga ‘o e ako he fonua ni.  Na’e ‘osi ‘ilo pe ‘e Dr ‘Ana Taufe’ulungaki ‘a e me’a ni ‘o hange ko ‘ene fakamatala ki he Ongoongo ‘ihe ta’u 2013 lolotonga ‘ene kei Minisitaa.

‘I he’ene pehe ‘oku toe tukuatu heni ‘a e fakamatala ‘a e ‘Eiki Minisita Ako mo Ako Ngaue ‘i he ‘aho 8 Sepitema 2015 fakataha mo e fakamatala ‘a Dr ‘Ana Taufe’ulungaki fekau’aki mo ‘ene ‘ilo’i ‘a e tu’unga ta’emahino mo ngali holoa ‘o e ako he taimi ko ia na’a ne kei Minisita ai.  ‘Oku ‘i ai ‘a e faka’amu ‘a e ‘Eiki Minista Ako mo Akongaue, Hon. Samuela ‘Akilisi Pohiva, ke ma’u ‘e he ni’ihi mamahi’i ako ko eni ha loto ma’ulalo ke nau lava mai ke fai ha talanoa.

'Ofisi Palemia