Lotu fakatomala fakatahataha 'a e fonua ^Featured

Ko e Ouau mahu'inga eni ki he fonuá, ko e fakaefuefu mo e vete 'a e angahala kotoa pe 'a e fonuá, pea toe fakalelei hotau vā pea mo e 'Otuá. Ne 'afio tonu 'a e Hau 'o e 'Otu Tongá, HM Kingi Siaosi Tupou VI, pea me'a ai mo e Ta'ahine Pilinisesi, Salote Mafile'o Pilolevu Tuita, ko e fuifuilupé mo e Fale 'o Ha'a Moheofó.

Ne me'a he Ouau ni 'a 'Eiki Palemia, Hon. Samiuela 'Akilisi Pohiva, ko hono Tokoní, Hon. Semisi Sika pea mo e Hou'eiki Pule'angá, kae pehee foki ki he 'Eiki Sea Le'ole'o 'o e Fale Alea, Lord Tu'ilakepa mo e kau memipa 'o e Fale Alea 'o Tonga.

Ne kau mai ki he Ouau lotu ni 'a e Talafekau Lahi 'o 'Aositelelia mo Nu'u Sila, ko e Komisiona Polisí, Stephen Caldwell, pea pehee foki ki he kau memipa 'o e Fakataha Tokoní. Pea Ne taki mai 'e 'Emineni Katinali Soane Patita Paini Mafi e Tepile 'a e Kau Taki lotú, pea na'e kau mai mo e kau Hiva mei he ngaahi siasi kehekehe pe, pea mo e kakai tokolahi ne nau lonuku 'i Pangai Lahi he Ouau mahu'inga ko ení.

'I he polokalama ni, ne MC 'a e Sekelitali Lahi 'o e Siasi Uesiliana Tau'ataina 'o Tongá, Rev. Dr. Tevita Havea. Ne tu'uta foki e hā'elé he taimi 07:00pm, pea na'e tataki 'e he Ifi 'a e Kau Polisí e Fasi Fakafonuá.

'I he kamata e polokalamá, ne kamata 'aki ia e Himi 657 pea na'e lau ia 'e 'Eiki Fane-Tupou-Vava'u Tuita Tu'ivakanö. Ne hoko atu ki he Lotu Kamatá ne fakahoko ia 'e he Palesiteni 'o e Siasi Tokaikolo-'Ia-Kalaisí, Rev. Dr. Liufau Vailea Saulala. Ko e Lea Talitali ne fakahoko ia 'e he Sea 'o e Kosilio 'a e Kau Taki Lotú, ka ko e Takilotu 'o e Siasi Katolika Lomá, 'Emineni Katinali Soane Patita Paini Mafi. Ne hoko atu ki hOnó lau 'o e Ngaahi Folofolá, 'a ia ne kau ki ai 'a Hon. Semisi Sika, ko e 'Eiki Tokoni Palemiá; Pastor Niutoni Toe'api ko e Palesiteni 'o e Siasi Assembly of God; Rev. Penisimani Latu ko e Faifekau Pule Siasi Konisitutone Tau'ataina 'o Tongá; pea mo Rev. Saia Vea ko e Palesiteni 'o e Siasi 'Ahofitu.

Ne hoko atu ki he Ouau 'o e Lotu Fakatomalá, pea na'e 'i ai hono kaveinga lalahi 'e 4. Pea ko kinautolu ne nau tataki e ngaahi kaveinga lotú, ko Rev. Simote Fifita Sikuea pea mei he Siasi Tau'ataina 'o Tongá, ko Rev. Dr. Tevita Mohenoa Puloka ko e Faifekau Pule 'o e SUTT Vahefonua Ha'apaí, ko Rev. Dr. Tevita Feke Mafi ko e Palesiteni Malolo 'o e Siasi 'o Tongá, pea mo Kapiteni Sila Siufanga pea mei he The Salvation Army Church.

Ne hoko atu leva ki he Lea Fakamaloó, 'a ia ne toe fakahoko pe ia 'e he 'Eiki 'Epikopo 'o e Siasi Katolika Lomá, 'Emineni Katinali Soane Patita Paini Mafi. Ne hoko atu ai pē ki hono lau e Himi Tukú ko e #391 'a ia ne lau ia 'e Lord Tu'ilakepa ko e 'Eiki Sea Le'ole'o 'a e Fale Alea 'o Tongá, pea toki fakahoko 'e he Tangata'eiki Palesiteni 'o e Siasi Uesiliana Tau'ataina 'o Tongá, Rev. Dr. 'Ahio 'a e Tāpuakí mo e Kelesí. Ko e Ifi 'a e Kau Polisí na'a nau fakahoko 'a e Fasi Fakafonuá ki mu'a pea liuaki atu e Hau 'o e fonuá.

Ko e Ouau lotu fakamafana mo tapuaki'ia, he na'e mahino e fakaefuefu e Tonga kotoa ne tefua 'i Pangai Lahí. Ne ongo mai e le'o 'o e tangi mo e fakatomala mo'oni mei he fu'u kakai ne nau kau he ngaahi lotu hufiá.

Ne 'i ai foki e me'a fakaofo lahi ka ko hono pole'i 'e he Tangata'eiki Palesiteni Malolo 'o e Siasi 'o Tonga, Rev. Dr. Tevita Feke Mafi 'a e 'Eiki Palemia mo 'Ene Kapineti, pea ki he kotoa e Kau Taki Lotú ke nau hifo mei honau ngaahi seá 'o tu'ulutui kotoa he lotu na'e fakahokó. Ka na'e faka'ohovale 'a e mokoi lelei 'a 'Ene 'Afió, Kingi Siaosi Tupou VI ka ko e Hau 'o e 'Otu Tongá ke Ne kau fakataha mo e kakai 'o e fonuá he pelu tui 'o faka'apa'apa ki he Hau 'o e Ngaahi haú, ka e pehee foki ki he Ta'ahine Pilinisesi, Salote Mafile'o Pilolevu Tuita mo e Hou'eiki kotoa.

Ne kau kotoa e ngaahi Siasí ki he Ouau lotu ni, pea ne fakafiefia ko e toe kau mai mo e Kolisi Kuini Salote pea mo 'enau Kau Ifí, pea pehee foki ki he Akó Ma'olunga ko Tupou, pea mo e Apiako Mo'unga 'Olivé.

-Tongashow Jf First