Tukupā Palēmia ‘Initia Ke Fakalahi Tokoni Hono Fonua ki he Ngaahi Fonua Pasifiki ^Featured

Ko e tukupā ko’eni ‘oku fakatefito ia ki hono fakapa’anga ‘a e ngaahi ma’u’anga ivi mei he la’ā ‘a ia ‘oku ‘iloa ko e sola ‘o kau kiai mo e hono foaki ‘a e ngaahi faito’o ke tokoni ki he mo’ui ‘a e kakai ‘o e Pasifiki. ‘Oku kau foki ‘i he tukupāko’eni hano fakapa’anga ‘o hano faka ivi sola ‘a e ngaahi ‘api ‘e lau afe ‘i he tukuimotu ‘o e Pasifiki.

Ko e tumutumu ‘o e tokoni ko’eni lo hano fakahā ‘e Modi ‘e langa ‘e hono fonua ha ngaahi tekinolosia ‘oku fekau’aki mo e vavā (space) ‘a ia ‘e tokoni ki he mateuteu ki ha fakatamaki fakaenatula ‘o kau kiai mo hano muimui’i ofi mo ma’u ha ngaahi fakamatala falala’anga ki he feliuliuaki ‘a e ‘ea (climate change).

Na’e fakahā foki heni ‘e fakalahi ‘a e ngāue mai ‘a e Va’a Tautahi ‘a ‘Initia ki he potutahi ‘o e Pasifiki pea kau kiai mo hano ‘unuaki kimu’a ‘a e fefakatau’aki ‘a hono fonua mo e ngaahi fonua ‘o e Pasifiki pehē ki hano fakalakalaka’i ‘a e tu’unga ‘oku ‘i ai ‘a e mo’ui.
Fakatatau ki he tukupā ‘a Modi, ‘oku fakafou mei hono fonua ‘a e faito’o ki he ngaahi fonua langalangahake ka ‘oku mamafa.

‘I he’ene pehē leva ‘oku fakakaukau ‘a hono fonua ke fokotu’u ha ngaohi’anga faito’o ‘i he Pasifiki pea ke senitā mei ai hano tufaki ‘o e faito’o ki he ngaahi fonua kaunga’api. Na’a ne pehē ‘e malava ke fakangofua ke fakahoko ha nō mei hono fonua ki he poloseki ko’eni.
Ko e konga foki ‘eni ‘a e feinga ‘a e Pule’anga ‘Initia ke fakalahi ‘ene vā fengaue’aki mo e Pasifiki ‘o makatu’unga ‘i he ‘alu ke toe fakalalahi ange ‘a e tokoni ‘a Siaina ki he feitu’u ni.

Ko e ola foki ‘eni ‘a e fakaafe ‘a e Pule’anga ‘Initia ki he kau Taki ‘o e ngaahi fonua ‘o e Pasifiki hili ange ia ha’ane ‘a’ahi fakakaume’a mai ki Fisi ‘i he 2014. Na’e kau atu foki ‘a e ‘Eiki Palēmia ‘o Tonga mo hono kau muimui ki he fakataha ko’eni pea ‘oku ‘i ai ‘a e ‘amanaki lelei ki ha ola lelei 'o e tukupā ko’eni ki hotau ki'i fonua ni.