Hao Palemia 'Aositelelia Tony Abbott fili fakahaloto 'a e Paati Liberal ke tukuhifo ia meihe tu'unga taki. Featured
Na’e ikuna’i ‘i he ‘aho ni ‘e he Palemia lolotonga ‘o ‘Aositelelia hano tesi’i ‘o e tu’unga falala’anga ‘oku ‘oku ne taki ‘aki ‘a e fonua hili ia ha fakahoko ha fili fakahaloto ‘a e Fa’ahi Liberal ‘a e fonua ‘a ia ‘oku nau lolotonga Pule’anga he ‘aho ni pea taki ai ‘a Tony Abbott. Fakatatau ki he fakamatala ‘a e ongongo ‘a e BBC na’e loto ‘a e toko 61 ‘o e kau Fakafofonga Falealea ‘a e Paati Liberal ke hoko atu pe ‘a e taki ‘i he tu’unga Palemia ‘a Tony Abbott ka e ‘ikai ke loto kiai ‘a e toko 39 mei he Paati Liberal ai pe.
Na’e kole ai pe ‘e he Palemia Tony Abbott ke fakahoko ha ngaue ke fakangata ‘a e ngaahi nganga’ehu ‘oku hoko ‘i he fonua fekau’aki mo hono fehu’ia ‘o e tu’unga falala’anga ‘o e kau taki. ‘Oku ‘ikai foki sola ha taha ki hono toutou fetongi ‘o e kau Palemia ‘o e fonua talu mei he 2010 ‘a ia na’e to’o ai ‘e Julia Gillard ‘o e Fa’ahi Leipa ‘a e Palemia mei a Kevin Rudd ‘o e Fa’ahi Leipa ai pe. Na’e toe fakafoki pe foki ‘a e lakanga Palemia kia Kevin Rudd ‘i he ta’u 2013 hili ha fili fakahaloto natula tatau hange koia ne fakahoko ‘i he ‘aho ni.
Kapau na’e ‘ulungia ‘a e Palemia lolotonga he fili fakahaloto ‘o e ‘aho ni pea na’e meimei hoko hake ‘a e Minisita Fetu'utaki (Commuications) lolotonga Malcolm Turnbull ‘o e Fa’ahi Liberal ai pe kene pole’i ‘a e lakanga Palemia ‘o e fonua fakatatau ki he fakamatala ‘a e BBC. Na’e na’ina’i ai pe foki heni ‘a e Palemia lolotonga ki he mahu’inga ke tauhi ma’u ‘a e Pule’anga kae ‘oua leva kuo’osi ‘a e teemi na’e fili ai kinautolu 'e he kakai.
