Fokotu’u 'e he Komiti Fakafonua Fakafepaki’i Faihala ke fai Tanuhala 'e he Komiunitī ^Featured

Ko e tohi ko’eni na’e fakamo’oni kiai ‘a e Sea ‘o e Komiti Sione Teisina Fuko, Fale’i William Clive Edwards pea mo e Sekelitali ‘a e KFFF Soane Patita Vakautafefine Fifita ‘o fakahā ‘enau poupou ki he polokalama tanuhala ka ‘oku ‘ikai koe founga lolotonga.

‘Oku fokotu’u ‘e he Komiti Fakafonua ki hono Fakafepaki’i ‘a e Faihala ke ‘ave ‘a e polokalama tanuhala ki he komiunitī pea fakaivia ‘a e kakai kenau kau mai ki he langafonua ‘oku fakahoko.

Ko e fokotu’u ‘a e KFFF ‘oku ne ‘oatu ‘a e ‘ata ‘o e fengāue’aki fakataha ‘a e Pule’anga mo hono kakai pea ‘ikai ngata ai ka ‘oku tonu mo fe’unga ki he vīsone ‘a e Paati faka-Politikale na’e fokotu’u ‘e he Palēmia ko e Paati ‘a e Kakai.

‘Oku ‘ikai ngata heni ka ‘oku tafe ‘a e monū’ia ko’eni ki he kakai ka ‘oku ‘ikai koha tokoni’ihi pe ‘a ia ‘oku lahi hono fehu’ia pea longoa’a ai ‘a e fonua.

‘Oku anga pehe ni leva ‘a e fokotu’u ‘oku ‘oatu mei he KFFF ‘i hono ‘ata fālahi:

1. Ke vahe tolu ‘a Tongatapu ki he ngaahi Kosilio Faka Vahenga ‘e 4 ‘a ia ko Vahe Hahake, Vahe Loto, Vahe Hihifo mo Vahe Kolo.

2. Ke Vahe tolu ‘a Vava’u ki he ngaahi Kosilio Fakavhenga ‘e 3 ‘a ia ko Vahe Hahake, Vahe Hihifo, Vahe Loto.

3. Ke vahe ua ‘a Ha’apai ki he Kosilio Fakavhenga ‘e 2 ‘a ia ko Vahe Hahake, Vahe Hihifo.

4. Ke hoko ‘a ‘Eua ko e Kosilio Fakavahenga makehe pe ia pea hoko mo e Ongo Niua koe Kosilio Fakavahenga makehe pe moia.

5. Ko e ngaahi Kosilio ko’eni ‘oku nau fakafofonga’i ‘a e kakai katoa ‘o Tonga ni pea ke filifili kiai ‘a e kakai lelei, taukei mo faitotonu kenau fakalele ‘a e ngaahi kosilio ko’eni ‘i he fengāue’aki vāofi mo e kakai ‘o e ngaahi vahenga takitaha.

6. Ke lēsisita fakalao ‘a e ngaahi sino ko’eni pea ke fakahoko ‘enau ngāue ‘i he founga fakalao pea muimui kakato ki he ngaahi tu’utu’uni ngāue ‘a e Pule’anga.

7. Ke fakaivia pea fakahoko ‘a e founga mo e faingamalie tatau ki he ngaahi sino ko’eni ‘o fakatatau mo e founga ngāue kuo ‘osi fokotu’utu’u ‘e he Pule’anga ‘a ia koe ‘oange ‘a e faingamalie nō ma’a kinautolu mei he Pangike Fakalakalaka ka e malu’i ‘e he Pule’anga pea kumi mo ‘enau ngaahi me’angāue pea nau vahevahe leva hono tanu ‘o e ngaahi hala pehe ki hono tokanga’i ki he kaha’u.

8. Kenau fakahoko ‘a e polokalama tanuhala kae monitoa mo supavaisa ‘e he Potungāue ki he Ngaahi Ngāue Lalahi moha kau taukei fakatekinikale ‘e kole ‘e he Pule’anga mei he ngaahi kautaha tokoni mo e ngaahi hoa ngāue.

9. Moha toe fakalelei kehe ‘e toki fakakakato ‘a mui ki he ngaahi sino fakalao ko’eni pea kenau ngāue ke totongi fakafoki ‘enau ngaahi nō mei he Pule’anga ‘i ha peseta ma’ulalo.

‘Oku tui ‘a e KFFF koe founga ‘eni ‘e fakasi’isi’i ai ‘a e longoa’a pea fakatahataha’i ai mo e kakai ‘o e fonua ‘o hangē ko hono toutou malanga’i ko e Pule’anga ‘o e kakai pea fakaivia kinautolu kenau kau he lau.

‘I ha fakamatala mei he KFFF kapau ‘e hoko ha palopalema heni pea koe kakai pe ‘oku nau fakahoko ‘a e ngāue ka ‘oku ‘ikai toe tuhu takai holo. ‘Oku mahino mai ‘e fakaongoongo ‘a e KFFF ki ha tali mei he Pule’anga fekau’aki mo 'enau fokotu’u.

‘Oku toe pehe foki mei he KFFF ‘oku nau ‘osi maau ke fakahoko hano faikiiki ‘enau fokotu’u ki he Pule’anga ‘i ha taimi ‘e fiema’u ai.