Fulikivanu Fengutu ‘a e Mītia ‘Ameliká; Kau ‘a Obama Teu Liukavá ‘o Trump? ^Featured

Kōlomu ‘Analaiso Mītiá – ‘Oku anga-fulikivanu ‘a e fengutu ‘a e ngaahi kautaha mītia lalahi ‘o ‘Ameliká ke faka-tonuhia‘i ‘enau poupou ki he feinga liukava‘i kākā ‘o Palesiteni Trump. Kuo nau hangē ha kau leká kuo ma‘u ‘enau loí, pea ‘ikai toe ha‘á nau loi ke tata‘o‘aki ‘a e ‘uluaki fuhinga-loí. 

Kuo tala ‘e he tokolahi ‘o e kau mataotao laó ko e ngāue kākā‘aki e mafaí lahitaha eni ‘i he hisitōlia ‘Ameliká. Pea ko e hopo faka‘ilo ‘e hokomaí ‘e tokolahi e kau holo ki pilīsoné. ‘Oku ‘alu pē ‘ahó mo e ‘ilo tahatahamai ‘o e ngaahi hingoa ‘oku tukuaki‘i na‘á nau kau ‘i he teu liukavá ta‘e fakalaó. ‘Oku kau ai ‘a e hingoa ‘o Palesiteni Mālōlō Barack Obamá. 

Talu hono fakahā ‘e he ‘Āteni Seniale ‘Ameliká, William Barr, ‘i he uike ‘e tolu kuo ‘osí ‘a hono tukuaki‘i ke faka‘ilo ‘a e kau teu liukava‘i ‘o e pule‘anga ‘o Palesiteni Trump, mo e fengutu holo ‘a e kau faiongoongó taaufehi‘a kia Trump. He kuo mahinomai ‘enau kau faka-politikale ki he Paati Temokalatí ‘o Obamá, pea na‘á nau fakalili‘a ‘i he mālohi ‘a Trump ‘i he 2016.  

Tukuaki‘i Loi ‘o Trump & Lūsiá

‘Oku kauatu ‘a e New York Times, Washington Post, CNN Network, NBC, CBS, mo e 90% ‘o e mītia ‘Ameliká ki he mata‘ā‘ā ‘enau taaufehi‘a kia Trump. Ko kinautolu na‘á nau kikite‘i ‘e ikuna ‘a Hilary Clinton ‘i he fili palesiteni, 2016. Pea nau fa‘u ‘a e loi tokua na‘e kaumai ‘a e kau sipai Lūsia kia Trump ‘o nau kākā‘i ‘a e fili palesitení.

Kā ko e fakalilifútahá ‘a e toutou fakamatala ‘e he mītiá ‘a e loí mei he Paati Temikalatí ‘i he ta‘u ‘e tolu (3) kakto talu ‘a e ikuna ‘a Trump ‘i he 2016. Tupu mei he kele honau lotó ‘i he fehālaaki ‘enau kikite‘i tokua ‘e ikuna ‘a Clinton. Hokoai e fakapo‘uli honau ‘atamaí ‘o si‘aki honau fatongia ki he kakaí ko e tauhi ki he ‘enau tokāteline faiongoongó (journalism ethics).

Pea lolotonga ‘a e ta‘u ‘e tolu ko eni kuo ‘osí, mo e kei hala‘atā ke ma‘u ‘e he Paati Temokalatí, pe ko e mītiá ha‘á nau fakamo‘oni tonupā ki hono tukuaki‘i loi ‘o Trump. ‘A ia ‘oku ‘asimai ko e fu‘u koto loi kotoa mei he kapineti ‘a Obamá. Pea malanga‘imai ‘e he kau Mēmipa Fale Aleá Temokalatí, ‘o faka-konahi ai ‘e he mītiá ‘a e kakai ‘o e fonuá na‘á nau tui ki he loí.

Kau Takimu‘a FBI, CIA, Kapineti ‘a Obamá  

Kuo mahinomai ‘a e hoko ‘a e ngaahi kautaha mītiá ni ko e loungutu ‘o e kau Fakafofonga Falealea ‘o e Paati Temokalatí. Ko e fōfoa‘i ‘o e tukuaki‘i loi ‘o Trump na‘e fa‘ufa‘u ‘i he Kapineti ‘a Obamá. Lolotonga e fetongi pule‘angá ‘i he ta‘ufo‘oú 2017, na‘e fakataha ‘a Obama mo ‘ene kapinetí ‘i he ‘aho 5 Sānualí.

Fakatatau ki he miniti ‘o e fakatahá, na‘e alea‘i ai ‘e Obama mo e Talēkita FBI, Talēkita CIA, Tokoni Palesiteni, Joe Biden, mo e ni‘ihi ‘o e Kapinetí ‘a e teu liukava‘i ‘o Trump. Hili e fuakava‘i ‘o Trump ki he lakanga Palesiteni ‘o ‘Ameliká ‘i he 20 Sānualí, na‘e mavahe ‘a Obama ka e kei mahino aipē ‘a e hokoatu ‘o e feinga liukavá ‘e he Talēkita FBI, James Comey. Na‘á nau hokoatu ‘i he pule‘anga ‘o Trump mo e ni‘ihi kehé mei he pule‘anga ‘o Obamá. Ka e mahamahalo ‘a Trump na‘e kākā ‘a e talēkitá FBI peá ne kapusi ‘a Comey ‘i he 9 Mē, 2017.  

Ko e founga ‘o ‘enau liukavá ko e fa‘u ‘a e ngaahi loi ‘o fakamafola‘aki e poupou ‘a e mītiá. Pea kenau tauhele‘i ‘a Trump mo ‘ene Kapinetí ke ma‘u ai ha‘á nau fehālaaki ki he ngaahi lohiaki‘i na‘á nau fa‘ufa‘ú. ‘Oku kau ‘i heni ‘a e fa‘u loi tokua ‘o pehē na‘e fekau ‘e Trump ‘a e fefine pa‘umutu ke tu‘uofi ‘i he mohenga ‘i he hōtele ‘i Moscow, Lūsiá, tokua koe‘uhí ko e mohenga na‘e ‘osi mohe ai ‘a Obama. Ko e fu‘u loi na‘e fa‘u ‘e he FBI.