Palani ‘e Semisi Sika ke fakamalōlō’i ‘a Tonga mei he IRL - TNRL Featured
Semisi Sika koe Sea Malōlō TNRL
15 Mē, 2020. ‘Oku tukuaki'i pea tui ta’e toe veiveiua ‘a e poate TNRL ko Semisi Sika na’a ne palani’i hono tuku ‘o e TNRL (Tonga National Rugby League) ki tu’a mei he RLIF (Rugby League International Federation) 'a ia 'oku toe 'iloa ko e IRL (International Rugby League).
Fakatatau ki he fakamatala kuo tuku mai mei he Poate TNRL na'a nau pehe ai ‘oku ‘ikai ha’anau toe tala'a koe palani ko’eni na’e fakahoko pe ‘e Sika pea na’a ne me’angāue ‘aki hono lakanga ‘i he Pule’anga ko e Tokoni Palēmia pea na’e Palēmia Le’ole’o ‘i he taimi na’a ne fakahoko ai ‘a e ngaahi fetohi’aki ki he RILF ke tuli ‘a e TNRL.
‘I he fakamatala mei he TNRL koe fai ‘e Sika ‘a e ngaahi ngāue ko’eni ‘o fakafou ‘i hono fakahoko mo fetuku holo ‘a e ngaahi fakamatala ‘ikai mo’oni na’e makatu’unga ia ‘i he ‘ikai ke fie mavahe mei he lakanga Sea ‘i he Poate TNRL 'a ia na'e tu'utu'uni 'e he Fakamaau'anga Lahi ke fakamalōlō'i ia mei ai.
‘Oku ma’u foki ‘e he TNRL ‘a e tatau ‘o e tohi ‘a Sika ‘i he ‘aho 20 Sepitema 2019 ki he CEO ‘o e RLIF Nigel Wood ‘o toe muimui’i ‘ene tohi ‘o e ‘aho 13 ‘o Sepitema 2019 mo fakahā ‘a e tafa’aki ‘oku tu’u ai ‘a e Pule’anga ‘o e ‘aho koia pea ‘asi ‘i he tohi ko’eni kuo mole ‘a e falala ‘a e kakai mo e fonua pehe ki he ngaahi kalapu ‘akapulu ‘o kau ai ‘a e kau va’inga ‘oku nau fakafofonga’i ‘a e fonua mei he TNRL.
‘I he fakamatala mei he TNRL ‘oku mahino lelei heni ‘a e conflict of interest he na’e tu’utu’uni ‘e he Fakamaau’anga ‘i he ‘aho 11 Mē 2016 ‘i he Hopo Fika CV43/2014 ke fakahoko hano ‘atita’i ‘o e pa’anga ‘a e TNRL lolotonga ‘a e taimi na’e sea ai ‘a Sika pea na’e mahino na’e fai hono ngāue’aki ‘ikai ha totonu pea ‘ikai ha fakamatala pa’anga kiai 'a ia koe maumaulao 'eni na'e taki ai 'a Sika.
Na’e toe tu’utu’uni foki ‘e he Fakamaau’anga Lahi ‘i he ‘aho 12 ‘o Nōvema 2018 ‘i he Hopo Fika CV21/2018 ke fakamalōlō’i ‘a Semisi Sika pehe ki he toenga ‘ene Poate mei he TNRL pea ke fakahoko ‘a e fili fo’ou ‘o iku ‘alu hake ai ‘a e Poate fo’ou ko’eni ‘oku sea ai ‘a Siaosi Koloamatangi ‘o fakalele mai ‘a e maa’imoa ni.
Na’e toe hā foki ‘i he tohi ‘a Sika ‘a ‘ene fakamahino ki he RLIF kuo fokotu’u ‘a e Poate fo’ou ‘o ui ko e Tonga Ma’a Tonga Rugby League (TMTRL) pea ‘oku fiema’u ke poupou’i ‘a e sino ko’eni. Na’e toe fakahā foki ‘e Sika ‘oku poupou ‘a e TMTRL ke hoko ‘a e Tonga Sports Council (TSC) ‘a ia ‘oku tataki ‘e ‘Ikani Taliai koe Poate Fakataimi ia kene pule’i ‘a e ‘Akapulu Liiki ‘i Tonga pea kenau fakalele ‘a e Liiki ‘o ‘ikai ke toe tatali.
‘I he hoko atu ‘a e fakamatala mei he TNRL na’e toe takai hake pe ‘a Sika hili ‘ene tohi ki he IRLF ‘i he ‘aho 20 ‘o Sepitema 2019 ‘o toe tohi mai ki he Sea ‘o e Poate TNRL Siaosi Koloamatangi ‘i he ‘aho 24 ‘o Sepitema 2019 ‘i hono mafai ko e Palēmia Le’ole’o ‘o e fonua ‘o fakahā kiate ia kuo mole ‘a e falala ‘a e kau memipa ‘o e TNRL, ngaahi kalapu, kau va’inga pea ‘e ‘ikai malava ‘e he TNRL ke kumi ha kau va’inga lelei ke fakafofonga’i ‘a e fonua.
Na’a ne toe fakahā foki ‘oku ‘i ai mo e Poate fo’ou kuo fokotu’u koe TMTRL ‘a ia ‘oku nau fakafofonga’i ‘a kinautolu ‘oku ‘ikai tui mo ta'efiemalie ki he founga 'a e TNRL. Na’e toe fakamahino foki ‘e Sika ‘i he tohi ko’eni kuo ne ‘osi fetu’utaki ki he RLIF ‘o fakahoko kiai kenau poupou’i ‘a e TMTRL he koe founga ia ‘e hakeaki’i ai ‘a e ‘Akapulu Liiki ‘i Tonga.
Fakatatau ki he fakamatala mei he TNRL ‘oku nau fakame’apango’ia ‘i he fu’u e’a ‘a e taaufehi’a mo e conflict of interest ‘a ia ‘oku ta'e'amanekina ke tu’u hake pē ha sea na’e fakamalōlō’i koe maumau lao ke toe lipooti ‘a e kakai ‘oku nau fetongi ia pea ‘oku faingata’a ia ke mahino kiate kinautolu pe ‘oku anga fēfē ke hoko ‘eni ‘i ha kuonga maama.
‘Oku nau toe mo’utāfu’una hono ngāue’aki ‘a e mafai ke fakapolitikale’i ‘aki ‘a e sipoti ka koe me’a ia ‘oku totonu ke tau’atāina pea ko hono iku’anga koe mavaeua ‘a e fonua pea hoko ai mo e longoa’a ‘o au mai ki he ‘aho ni. Na’e fakamahino mei he TNRL koe hoko kotoa ‘a e ngaahi fetu’utaki ‘a Sika mo e RLIF ke fakamalōlō’i ‘a Tonga na’e fakahoko ia lolotonga ‘ene leo’ole’o ‘i he lakanga Palēmia ‘i he pekia ‘a ‘Akilisi Pohiva ‘i he ‘aho 12 ‘o Sepitema 2019 pea na’e fakavave’i ke fai mo hoko 'ene faka'amu siokita lolotonga ‘oku ‘i ai ‘a e mafai 'iate ia.
Na’e fakamahino foki mei he TNRL ‘oku nau kei tu’u pe ‘o fakatatau mo e lao ‘o e fonua pea ‘oku nau fakahoko ‘enau nga’unu kotoa ‘o fakatatau mo e pule ‘a e lao ‘a ia ‘oku nau fakahoko ‘a e fakatonutonu tatau mo e RLIF pea ‘oku nau tui koe me’a mahu’inga heni ke mahino ki he kakai ‘a e me’a ‘oku mo’oni mo totonu pea fai ai pe mo e ngāue mo e poupou ki hono langa hake ‘a e maa’imoa.
