Feinga Liukava‘i ‘o Palesiteni Trump; Fulikivanu Kākā Mītiá & Paati Temokalatí ^Featured

KŌLOMU ‘ANALAISO MĪTIÁ – Kuo tukumai ki tu‘a ‘e he ‘Āteni Seniale ‘Ameliká, William Barr, ‘a e ngaahi lekooti fakapulipuli na‘e sila‘i kau ki hono faka‘ilo ‘o Palesiteni Donald Trump ‘i he 2018. ‘Oku ‘asi mata‘ā‘ā ai ‘a e tukuaki‘i loi ‘e he FBI, tokua na‘e ‘omai ‘e Trump ‘a e tokoni ‘a e Pule‘anga Lūsiá ‘o ne ikuna ai ‘i he fili palesiteni, 2016.

Pea kauatu ki ai ‘a e 90% ‘o e mītiá ‘Ameliká ‘a ‘enau fakamafola mo poupou‘i ‘a e loí ‘a e FBI mo e Paati Temokalatí.  Ko e hokoatu pe ia ‘o ‘enau mamahi ‘i he ulungia ‘a Hilary Clinton, ka e fakafokifā ‘a e ikuna ‘a Trump. Ko e ngaahi kautaha faiongoongo tatau pe eni kuo nau fakamafola ‘a e loi ‘a e FBI mo e kapineti ‘a Obama. Ko ‘enau feinga liukava ke liuaki ‘a e fili palesitení, ke to‘o ‘a e palesiteni na‘e fili totonu ‘e he kakaí.       

Kuo fakahā ‘e he ngaahi lekooti na‘e tukumai ‘e Bill Barr ko e fasitu‘u mo e loi kotoa ‘a e taki ‘o e FBI, James Comey, mo e kapineti ‘o e pule‘angá ‘o Palesiteni Mālōlō Barack Obama. Fakataha mo e poupou ‘a e mītiá, na‘á nau tala hokohoko ‘a ‘enau loí ‘o lava e māhina ‘e 16 ‘a e fakatotolo‘i ‘o Trump, mo e fakamole laka ‘i he $25 miliona. Na‘e ‘osiangé ko e koto loi kotoá.  

Kau ‘a Obama Feinga Liukavá 

‘Osi ia pea hokomai mo e faka‘ilo ‘e he Paati Temokalatí ‘i Fale Aleá (House of Representatives) ‘a Trump ‘i Tīsema, 2019, ‘i he ‘ene telefoni mo e palesiteni ‘o Ukrain, Volodymyr Zelensky, ‘i Siulai, 2019. Ma‘u ai honau faingamālie ke hokoatu ‘enau feinga liukavá. 

Tokua na‘á ne kole ke ‘omai ha fakaongoongo kovi‘i ‘o e tokoni palesiteni ‘o Barack Obama, Joe Biden, ‘a ia ‘oku lele ‘i he tikite fili palesiteni ‘o e ta‘ú ni mei he paati temokalatí. Ka ‘i hono faka‘osi ki he Fale Aleá Senató (U.S. Senate) na‘e ‘ikai pe ha fakamo‘oni fe‘unga ‘a e Paati Temokalatí ke fakahifo ‘a Trump. Pea toe hao aipē ‘a Trump.

Ka e ‘osiange iá, kuo toki fakahā ‘e he ngaahi lekooti ‘a e Potungāue Laó ‘a e maumau lao ‘a James Comey ‘o e FBI mo Barack Obama mo ‘ene kapinetí. ‘I he ‘enau feinga liukavá, na‘á nau fa‘ufa‘u ‘a e palani kākā ke tauhele‘i mo tukuaki‘i loi ‘a Trump mo ‘ene kapinetí. Na‘á nau tāketi‘i ai ‘a e tangata fale‘i malu‘i fonuá (national security advisor), Kēnolo Michael Flynn. 

Kaungā Loi Mo e Mītiá

Ko e maumau lao mamafa eni ‘i ‘Ameliká: ko hono tukuaki‘i loi ‘e he pule‘angá ke mo‘ua ta‘e-fakalao ha tahá. Na‘e ‘asi ai foki mo e ngāue fakataha ‘a e FBI mo e kautaha CNN TV ‘i he ‘enau hū ki he ngaahi ‘api ‘o faka‘ilo ‘a e ngaahi maheni ‘o Trump. Pea na‘e kau ‘a Obama ‘i he ngaahi fakataha fokotu‘utu‘u liukavá ‘o fakangofua ai ‘a e tukuaki‘i mo e faka‘ilo ta‘e-fakalao ‘o e tokolahi.

Ko e ngaahi founga ngāue faka-pōpula pehē ni ‘oku fai ‘e he ngaahi pule‘anga kominiusí ‘o Lūsiá, Siainá, mo e pule‘anga Nazi ‘o Siamané ‘i he Tau Lahi II. Pea ‘oku fakalilifu ‘a e founga ‘a e FBI mo e kapineti ‘o e palesiteni ‘o ‘Ameliká ko hono toe poupou‘i ‘e he mītiá. Ko e fatongia ‘o e mītiá ko e “kulī le‘o” ‘o e pule‘angá, ka ‘oku ‘ikai ko ha “kulī pele‘i.”

‘Oku a‘u ki hono fakamatala loi ‘i he TV ‘a e ngaahi lea mo e tali fehu‘i ‘a Trump mo ‘ene kapinetí.  Fakatātā: Na‘e faka‘eke‘eke ‘a e ‘āteni senialé, William Barr, ‘i he CBS News TV. Pea fehu‘i ki ai ‘e he fefine ko Catherine Herridge: “‘I hono tohi ‘o e hisitōliá ni, ‘okú ke pehē ‘e fēfē hono tohi? Ko e hā ha‘á ne lau ki ho‘o founga fakakaukaú?”

Kākā ‘a e CBS News TV

William Barr: “Sai, ‘oku tohi ‘a e hisitōliá ‘e he tokotaha na‘e mālohí. Ko ia ‘e mamafaange pe ki he tokotaha ‘okú ne tohí ‘a e hisitōliá. Ka ‘oku ou pehē ‘e aú ko e hisitōlia totonú ‘e tala ai ko e fakakaukau lelei he ‘okú ne poupou‘i ‘a e laó. Na‘e tokoni, na‘e fakapapau‘i ai ‘a e tu‘unga ‘o e Potungāue Fakamaau Totonú, pea na‘e ta‘ofi ai ‘a e ta‘e-totonú.

Kā ‘i hono fakamatalmai ‘i he TV ‘e he faiongoongo ko Chuck Todd, na‘á ne tu‘usi ‘a e konga na‘e pehē ai ‘e Barr “ko e fakakaukau lelei he ‘okú ne poupou‘i ‘a e laó.” Pea fakahokoatu ‘e ia ‘ene lau ‘o pehē na‘e ‘ikai fakahāmai ‘e Barr ‘okú ne poupou‘i ‘a e laó. Ko e fakamatala loi ia he na‘á ne tu‘usi ‘e ia ‘a e lau ‘a Barr ‘oku poupou‘i ‘e he ‘ene tu‘utu‘uní ‘a e laó, mo e fakamaau totonú.   

Na‘e lahi hono lāunga‘i pea toki fakatonutonu ‘e he CBS TV ‘a e fakamatala ‘a Chuck Todd, ka e ‘ikai pe kenau kole fakamolemole, pe kenau hilifaki ha tautea koe‘uhi ko e lipooti kākā. Mahinomai ‘a ‘enau founga fa‘u ongoongó ko ‘enau ‘āsenita fakafetau mo e fehi‘anekina‘i ‘a Trump mo ‘ene kapinetí. Ka kuo te‘eki ai ikuna ha‘á nau fokotu‘utu‘u kākā ‘e taha tupú mei he ‘enau loto fehi‘á kikihí.