Fotumai e Ta‘e-taaú; ‘Ūusi e Nima Fafanga‘angá? Featured
Talēkita WHO Dr. Tedros Adhanom Ghebreyesus kuo lāunga'i ke fakafisi ko 'ene siokehe ka e fa'ifa'iteliha pe 'a Siaina 'o nau fufū'i 'a e fakatu'utāmaki 'o e COVID-19 ka e mafola 'o mate ai 'a e fu'u kakai tokolahi 'i māmani lahi. 'Oku 'eke'i 'e he ngaahi fonua 'o e Uēsité ke faka'ilo 'a Siaina kenau totongi 'a e maumau kuo mole ai 'a mo'ui 'a e fu'u kakai tokolahi. Kuo ta'ofi ai 'e Palesiteni Trump 'a e tauhi 'e 'Amelika ki he WHO ko e $500 miliona ka e fai 'a e fakamā'opo'opo ke faka'ilo 'a Siaina. Ko Dr. Tedros 'oku ha'u mei Ethiopia, pea 'oku lolotonga fai e langafonua lahi 'e Siaina 'ihe lolotongá ni.
Fotumai e Ta‘e-taaú; ‘Ūusi e Nima Fafanga‘angá?
Liliu Lea ‘a Sione Ake Mokofisi – Konga VIII
Washington, D. C., U.S.A. – Kuo tupulaki ‘a hono fakaanga‘i ‘o e Talēkita Seniale ‘o e WHO, Dr. Tedros Adhanom Ghebreyesus, fekau‘aki mo e mafola mei Siaina ‘a e COVID-19 ki māmani lahí. Lolotonga foki eni ‘oku langa lahi ‘e Siaina ‘a ‘Ethiopiá ki he pa‘anga lau-piliona, ko e fonua ‘oku ha‘u mei ai ‘a Dr. Tedros.
Ko ia ‘oku fai ai ‘a e hu‘uhu‘u kuo ta‘etokonga ‘a e talēkitá ke ha‘i ‘a Siaina ki honau fatongiá ko e ‘ata-tasilomai kitu‘a ‘enau ngāué. Kā kuo fieta‘a ‘a Dr. Tedros ‘o kape mai ki ‘Ameliká kenau tali ‘a e ngaahi puha mate ‘e fokotu‘una ‘i honau ngaahi falemahakí. (Ko e kape eni 'a e tokotaha tuku'uta, 'oku 'ikai mahino ki ai 'oku totongi 'e 'Amelika hono vāhenga ngāué 'i he WHO?).
Ko e lahitaha ‘o e lāunga‘i ‘o Dr. Tedros kuo ha‘u mei he ngaahi fonua Uēsité. Pea ‘oku tu‘unga ‘enau lāungá he ko ‘Amelika ‘okú nau totongi lahitaha ki hono fakalele ‘o e WHO: $500 miliona. ‘Oku totongi pē ‘e Siaina ‘a e $20 miliona ‘i he ta‘u. Ko ia ‘oku ta‘e-fakafiemālie ‘a e siokehe ‘a Dr. Tedros ka e fa‘ifa‘iteliha pe ‘a Siainá ia ka e lau-miliona ‘a e kakai kuo mate mei he COVID-19.
Ta‘ofi ‘e Trump $500 miliona; Faka‘ilo ‘a Siaina?
Kuo tukuaki‘i ‘e Palesiteni Trump, mo e tokolahi ‘o e kau fakafofonga Fale Aleá (Congress) ‘o ‘Ameliká, tokua na‘e fufū‘i ‘e Siaina ‘a e kamakamata mafolamai ‘a e COVID-19, pea kauatu ki ai mo e WHO ‘i hono faka-laloa‘i ‘e Dr. Tedros ‘o Siainá. Hili ko iá, ko e ‘inasi ‘o Siaina ki he WHO ko e $20 miliona pē. Kā 'okú ne hikihiki'i'i pē 'a Siaina 'ihe taimi kotoa.
Pea fakalalahi e ‘ingo‘ingo ‘a e kau taki ‘Ameliká ko e fakamafola ‘e he Pule‘anga Siainá mei he ‘enau ngaahi ‘ōfisi ‘Amipasitoá ‘i māmani kotoá ‘o pehē: Tokua na‘e fetukuange ‘e he kau sōtia ‘Ameliká ‘a e COVID-19 ki Wuhan ‘i ‘Okatopa, 2019. Na‘e ‘a‘ahiange ‘a e kau sōtiá ki he ngaahi polokalama faka-kaume‘a mo e kau sōtia Siainá. Hili ko iá na‘e ‘ikai ha fokoutua ia ‘a e kau sōtia ‘Ameliká hili ‘enau fokimaí. Pea 'oku tui 'a e tokolahi 'i māmani ki he fakamafola loi (propaganda) 'a e Paati Kominiusi Siainá.
Tu‘utu‘uni ai ‘e Palesiteni Trump ke ta‘ofi ‘a e $500 miliona ki he WHO, ka e fai ‘a hono fakatonutonu ‘a e ngaahi me‘a na‘e hokó. Na‘á ne fakahā ai ‘e fakamā'opo'opo ‘e ‘Ameliká ‘a e fakaikiiki ‘o e ngaahi me‘a na‘e hokó, pea ‘e kau ai mo hono faka‘ilo ‘o Siaina kenau totongi ‘a e ngaahi mo‘ui kuo molé ko e ta‘e-tokanga ‘a e Pule‘anga Siainá.
Fakamanamana‘i ‘o ‘Amelika, ‘Aositelēliá
Pea tuai-e-kemo kuo ‘ohake ‘e he Pule‘anga Siainá ‘enau $30 miliona (Ko e ngata pe ia honau ivi?) ki he WHO ke tāpuni ‘a e mole mei he ta‘ofi ‘o e $500 miliona mei ‘Ameliká ('Oku faikehekehe lahi 'a e $500 milioná mo e $30 milioná). Kā kuo mahino‘i ‘i māmani kotoa na‘e mafolamai ‘a e COVID-19 mei Wuhan, Siaina, ‘i Nōvema mo Tīsema, 2019. Pea kuo ‘asimai ‘a honau anga-fieta‘á ki he lau ‘a Palesiteni Trump ‘e faka‘ilo ‘a Siainá.
“‘Oku ‘ikai kemau loto fiemālie ‘i he ngaahi me‘a kuo hoko mo Siainá,” lau ‘a Trump. “Ko e ‘uhí ‘oku mau tui na‘e totonu ke ta‘ofi ‘a e mahakí ni ‘i hono kamata‘angá. Na‘e mei lava ke ta‘ofi ‘i he vavetahá ke ‘oua ‘e movete holo ‘i māmani,” hokoatu ‘a Trump. “Pea ‘e laka ia ‘i he $162 piliona kuo fakafuofua‘imai ‘e he nusipepa Siamané.” Ko e fokotu‘utu‘umai ia ‘a e nusipepa mei Siamané ke ‘eke‘i mei Siaina.
Pea kuo kaumai mo ‘Aositelēlia ‘i hono ‘eke‘i ‘o e maumau lahi ki he mo‘ui ‘a e fu‘u tokolahi kuo mole ta‘e ‘i ai ha‘a nau kovi na‘e fai. Fiema‘u ai ‘e he Pule'anga ‘Aositelēliá ke fakatotolo‘i e totonú, pea ke ‘eke‘i ‘a e ngaahi maumaú ki Siainá, Pea kuo ‘ingo ai ‘a e kau ‘amipasitoa Siaina ‘o nau fakamanamanamai tokua ‘e kaivevela ‘a ‘Aositelēlia ‘o kapau tenau fakafepakimai ki Siaina, ko Cheng Jingye ia ko e ‘amipasitoa ki ‘Aositelēliá.
‘Analaiso ‘a e Tongá
‘Oku faka‘ali‘alimai ‘e he kau Siainá honau anga fieta‘a mo e ta‘e fieauna. Ko e ‘uhi kuo mafola honau mālohi fakapa‘angá mo e faka-‘ekonōmiká ‘i māmaní, ‘oku faingofua ai kenau fakamanamana‘i mai, mo ‘enau pule fakaaoaó. Ko e tokāteline ia ‘a e Paati Kominiusi Siainá.
“Tukumai keu fakamaama atu ki ‘Aositelēlia,” lau ‘a e ‘ētita-lahi ko Hu Xijin, ‘o e Global Times: “‘O kapau ko honau anga-tangutúmaí ia ki Siainá ke ‘alu ki he koviangé, ‘e holoki ‘e he ngaahi kautaha Siainá ‘enau fetokoni‘aki faka-‘ekonōmika mo ‘Aositelēliá, pea ko e tokolahi ‘o e fānauako Siainá mo e kau ‘eve‘evá ‘e holoki foki.” ‘Oku ‘ikai kenau papaka ke fakamanamana mai?
Ko e fakatokanga eni ki māmani kotoa ‘oku nau fetokoni‘aki mo Siainá ‘i he ngaahi ngāue lalahi langafonuá. Ko e taumu‘a ‘a e Paati Kominiusi Siainá ko hono ma‘u faka-kominiusi kotoa ‘o māmani, pea kenau punou kotoa ki he Paati Kominiusi Siainá.
(Hokoatu Konga IX ‘amuiange ‘a e kōlomu ‘a Sione Ake Mokofisi. Ko e to‘oto‘o lalahi eni ‘o e ongoongo mahu‘inga kau ki he COVID-19, ko e fekumi mo e liliu lea Tonga ‘o e ngaahi ouau mahu‘ingataha ‘i tu‘apule‘angá ‘i hotau kuongá ni.)
