Ka lahi leva e loi pea ui ia ko e tuinga loi ^Featured

‘Etita,

‘Oku ou tokanga atu ki he fu’u hulu pea ope ‘a e loi hotau fonua ni pea koe kovi ia ‘a e papalangi he’ene fokotu’u e me’a koe feisipuka ke hange ha 'uhila 'a e mafola 'a e loi hotau fonua ni.

Ko e feinga pe ha taha ke fakatokanga’i kuo ne fatu ‘a e fo’i loi pea koe loi ‘e ni’ihi koe matu’aki nounou fakavesitapolo pea ko e loi ‘e ni’ihi koe mahaki ‘oku faingata’a ia ke toe faito’o.

Ko e Loi ‘oku Loi pea ka ua pea hilo loi pea ka lahi pea tuinga loi.

Neu ongo’i ‘eku miss e fefine fetifeti ne fa’a ‘ai ‘ai me’a mai he TV Tonga mo ‘ene fatunga polokalama fakanafala mo e kau tangata 'oku 'ikai keu toe sio 'oku nau heka holo he ngaahi me'alele Pule'anga.

Ko ia neu hakule 'EfaPI ‘o sio hifo ki si’ono ki’i fofonga ne toe lele ‘ene ki’i niusi pea na'a ku ongo'i faka'ofa'ia pea hili e tuku mai 'ene ongoongo peau pehe koe fetifeti koe hui mo e fa'o.

Neu toe femaleleaki hono fakatokanga'i hifo ‘oku ‘ikai ke kei lele ‘ene niusi ‘i ha loto fale niusi hange koe me'a na'a ku fa'a sio ai ka koe tapa’i fale’i niusi pe.

Kaekehe ne kei fai ai pe mata’i fiepoto pea fakamahiki mo hono ngaahi kemo 'o fakalaka ia he kau fainiusi ‘a e SI’ENA’ENA.

Ka koe pango koe fo’i niusi na'a ne kofekofe mai ai ko hono tukuaki’i si’i pule’anga ‘o Tonga ‘o pehe ‘e heka mai e tokoni Palemia he Vakapuna ‘a e ‘Ea Nu’usila pea toe fanongo koaa ‘e me’a mai mo e Ta’ahine Kuini 'o Tonga.

Na'a ku sio hifo he ongoongo 'a e Letio Tonga na'e 'ikai heka mai ha pasese ia he vakapuna na'e niusi mai kiai 'a e tuinga loi peau fakakaukau leva na'a koe me'a ia kuo puli ai mei he TV 'a e fonua.

Ko e fakahu’uhu’u kovi ai pe ‘ene fo’i niusi pea koe fa’ahinga kalasi niusi ‘oku ‘ikai toe ma’u hano saisi ‘i he kolope.

Kuo to atu ia ki he ki he tuituinga loi pea ‘oku ou faka’amu ke a’u atu ki he fefine ni ke kataki pe kae feinga ki fale lotu hei’ilo na’a lava ke hu’i atu ai ‘a e fu’u tuinga loi ka 'ikai pea 'alu kiha Zumba.

Malo e ma'u faingamalie.

Covid-Loi

Hala Tahi