Fu'u fiema’u ke le’ohi malu hotau potutahi ^Featured

Neongo ‘oku te’eki ke a’u mai ‘a e mahaki fakalilifu ko’eni ki Tonga ni ka ‘oku hoko ‘a e mateuteu ‘a e fonua hange koia ‘oku lolotonga hoko ai ‘a e ngaahi fakataputapui ko’eni kene ‘omai ‘a e fakatu’amelie ki he kakai mo e malu ‘a e fonua.

‘Oku fakapotopoto ‘a e ngaahi nga’unu ko’eni ‘a e fonua pea tapuni hotau ngaahi kau’āfonua ‘i he fefolau'aki vakapuna sivile ka ‘oku ‘i ai ‘a e tokanga makehe ia ki hotau ngaahi potutahi he ‘oku fu’u lahi fau ke le’ohi telia na’a hū mai ai ha ngaahi vaka ‘iote, vaka toutai pe koha fa’ahinga vaka pe tene ‘omai ha kau pasese ‘e malava ke ‘omai ai ‘a e COVID-19.

‘Oku ‘oku ‘ikai ke puli ia ‘oku lolotonga ngāue kiai ‘a e Va’a Tautahi ‘a e Kautau ‘Ene ‘Afio ki hono le’ohi hotau ngaahi potu tahi pea 'oku tau fiefia lahi he ngāue lahi ko'eni ka ‘oku mahu’inga ke malu mo e tafa’aki ko’eni pea fakapapau’i ‘oku tau hao mo’oni.

'I he tafa'aki 'e taha koe 'elia tahi 'o Tonga ni 'oku fu'u lahi faufaua ia ki he me'angāue mo e ngaahi vaka 'oku lolotonga 'i he nima 'o e Va'a Tautahi 'a e Kautau 'a 'Ene 'Afio pea 'oku 'uhinga pehe 'a e hoha'a ia ko'eni.

‘Oku fu’u mahu’inga ‘i he taimi tatau ki he kakai ‘o e fonua kenau talangofua ‘i he taimi faingata’a ni pea fepoupouaki mo e ma’u mafai ke kei hokohoko atu ai pe 'e tau kau 'i he ngaahi fonua tokosi'i 'oku nau kei hao mei he peau kula ko'eni 'oku tailiili kiai 'a e mamani.

Ka malu mo hao hotau potutahi pea 'oku 'i ai ta'etoeveiveiua mo e fakatu'amelie 'e hao pe 'a Tonga mai he COVID-19.