Hoha’a tokolahi e kakai e fonua ki he vakapuna mo e tokoni mei Siaina ^Featured

‘Oku ‘i ai ‘a e hoha’a lahi ‘a e kakai ‘o e fonua fekau’aki mo e ngaahi fakamatala ‘oku pehe ‘oku ‘i ai ‘a e vakapuna ‘e puna mai mei Siaina ke ‘omai ‘a e tokoni fakafaito'o ki Tonga ni.

'I he'ene pehe leva 'oku faka'amu 'a e Kolomu Filihi ke fai hano filihi moha vakai ki he kaveinga ko'eni he 'oku lahi e talanga kiai 'o tatau he mitia mo e mitia faka-sosiale pea 'oku mahu'inga foki he 'oku mafatukituki.

‘Oku mahino foki koe tokoni ko’eni ‘oku fakataumu’a ia ki he teuteu ‘a e fonua ke matatali kapau 'e hoko mai 'a e mahaki pipihi fakamamani lahi koe COVID-19 ‘a ia ‘oku toe ‘iloa koe Coronavirus ‘a ia ‘oku ne mafola ‘i he Kolope.

‘Oku mahu’inga ‘a e tokoni ia pea ‘oku ‘ikai ke puli ‘oku tau fiema’u mo’oni ka ‘oku hoha’a ‘a e tokolahi ‘o e kakai ‘o e fonua telia na’a koe matapā ‘eni ke hū mai ai ‘a e COVID-19 ki Tonga ni.

'Oku 'ikai fai ha ta'efalala ia ki Siaina he koe tokoni lahi 'oku ne fakahoko ki hotau fonua ka koe 'uhinga tefito pe 'o e hoha'a koe mahaki faka'auha ko'eni 'oku fai kiai 'a e ilifia na'e tupu mei Siaina pea 'oku kei 'i Siaina pe.

Ko Tonga ni foki ‘oku kau ‘i he ngaahi fonua si’isi’i ‘i mamani ‘oku kei hao ‘o ‘ikai ke ‘asi ai ‘a e mahaki ni ‘i he’ene a’u mai ki he taimi ni pea ‘oku ‘uhinga ai ‘a e hoha’a ia ko’eni ‘a ia ‘oku totonu ke 'oua tukunoa’i.

‘Oku mole ke mama’o hano faka’ikai’i ‘a e fakamatala ia ‘a e kau mataotao ‘oku nau taukave’i tokua ‘e ‘ikai malava ke hū mai ‘a e mahaki ia 'i he folau ko’eni ka ‘oku ‘i ai pe mo ‘etau lea fakamamani lahi ‘oku sai ange pe ‘a e faka’ehi’ehi kei taimi.

Ko ‘Amelika telē ‘ena na’e fakahā ‘e he Palesiteni ‘o ‘Amelika Donald Trump he ngaahi ‘aho si’i kuo tau situ’a kiai ko e COVID-19 ‘oku ‘ikai ha hoha’a lahi ki ai pea ‘e foki pe ‘a ‘Amelika ki he nomolo he ngaahi uike si’i mei heni.

Na’e makatu’unga ‘ene lea pehē he na'e falala ki he fale’i ‘ene kau mataotao ka ‘oku a’u ki he ‘aho ni kuo laka he tahakilu ‘a e kau puke ‘i ‘Amelika pea lauafe ‘a e mate pea kuo toe fakahā ‘e Trump ngalingali na’a toki foki ‘a ‘Amelika ‘o nomolo he taimi ‘o e pekia.

Ko e fakamahino ia ‘e malava pe ke fehalaaki ‘a e fakamatala ‘a e kau mataotao pea ‘oku malava pe ke tonu pea 'oku 'aonga pe mo e fanga ki'i seniti 'oku laku mai 'e he kakai 'o e fonua ki loto.

‘Oku totonu ke fakamahino mai ‘e he Pule’anga ki he kakai ‘o e fonua ‘a e tu’unga ‘o e tokoni ko’eni he ‘oku ‘i ai mo e ngaahi fehu’i mahu’inga ‘oku totonu ke fai ha ‘ilo kiai mo hano filihi hange ko ‘eni;

1. Ko e pule’anga na’a ne alea’i ‘a e tokoni ko’eni?
2. Ko e vakapuna fakakautau ‘eni ‘e ‘omi ai ’a e tokoni?
3. Kapau ‘oku ‘ikai koha vakapuna fakakautau pea koe vakapuna mei fē?
4. Ko e fē ‘a e ngaahi taulanga ‘e fou mai ai ‘a e vaka ni he ‘oku ‘ikai anga maheni ke puna hangatonu mai ha vakapuna mei Siaina ki Tonga ni.
5. ‘E fakangofua nai ‘e he ngaahi fonua koia ke fakaava honau ngaahi mala’evakapuna ke fou mai ai 'a e vaka tokoni?
6. ‘Oku ‘i ai ha fonua he ngaahi fonua ‘e fou mai ai ‘a e vaka tokoni ‘oku kei hao mei he COVID-19
7. Kuo fakapapau’i mo’oni ‘e ‘ikai ‘omai ‘a e COVID-19 he vaka ko ‘eni mei Siaina?
8. Ko e hā ‘oku ‘ikai tokoni mai ai ‘a Nu’usila mo ‘Aositeleia ‘oku na ofi mai?
9. Kuo fai ha kole tokoni ki Nu’usila mo ‘Aositelelia?
10. 'Oku tau mai 'a e vakapuna tokoni ko'eni 'afe?

‘Oku fai e poupou kakato ki he ngaahi ngāue lahi mo ‘osikiavelenga ‘a e Pule’anga ki hono malu’i ‘a Tonga mei he peau kula ko’eni ka ‘oku fiema’u pē he taimi tatau ke ‘oatu pe mo e hoha’a ‘a e kakai ‘o e fonua he koe fie langovaka atu pe ki he’etau ngāue pea ‘oku fai pe he taumu’a fietokoni.

‘Oku mole ke mama’o ha ta’efalala ki he ngāue lahi kuo fakahoko ‘e he Pule’anga mo e kau taki ka ‘oku mahu’inga ‘i he taimi ko’eni ke fai hano siofi ‘a e nga’unu kotoa he koe ‘osi ange ‘a e ‘aho ‘oku taumu’a tatau ‘a e Tonga kotoa ke haofaki e fonua mei he fakatamaki faka-mamani lahi ko’eni pea 'oku tau lolotonga hao mei ai.

Tau lotu pe ke lahi pea tau tu'u fakataha pea ngāue’aki ‘a e fakapotopoto taha tetau ala malava ‘i he taimi faingata’a ni.